- આસો નવરાત્રિની આઠમે પરંપરાગત પતરી-જાતર વિધિ સંપન્ન- માતાજીના મસ્તકેથી પતરી ઝીલી રાજપરિવારે મેળવ્યા આશીર્વાદ, 700 કિલો લાપસીનો પ્રસાદ વહેંચાયો.

કચ્છ, 19 ઓક્ટોબર (હિ.સ.) : કચ્છની ઐતિહાસિક ધરોહર અને ધાર્મિક આસ્થાનું પ્રતીક ગણાતી ભુજની આશાપુરા માતાના મંદિરે આસો નવરાત્રિની આઠમના પવિત્ર દિવસે સાડા ચારસો વર્ષ જૂની રાજપરંપરા મુજબ પતરી એટલે કે જાતર વિધિ ભક્તિભાવપૂર્વક સંપન્ન થઈ હતી. કચ્છના રાજપરિવાર સાથે જોડાયેલી આ પરંપરામાં વર્ષોની શ્રદ્ધા, સંસ્કૃતિ અને માતાજી પ્રત્યેની અતૂટ આસ્થાનો અનોખો સંગમ જોવા મળ્યો હતો. માતાજીના જયઘોષથી મંદિર પરિસર ભક્તિમય બની ગયું હતું.

આ વર્ષે પણ મહારાણી પ્રીતિ દેવીના આદેશ અનુસાર દેવપરના ઠાકોર કૃતાર્થસિંહ જાડેજાએ પરંપરાગત ધાર્મિક વિધિમાં ભાગ લીધો હતો. કાર્યક્રમની શરૂઆત કચ્છના રાજભવન તરીકે ઓળખાતા ઐતિહાસિક પ્રાગમહેલની ટીલામેડી ખાતે પૂજનવિધિથી કરવામાં આવી હતી. અહીં પૂજા અર્ચના પૂર્ણ કર્યા બાદ ઠાકોર કૃતાર્થસિંહ જાડેજા હાથમાં ચામર લઈને ખુલ્લા પગે આશાપુરા માતાના મંદિર તરફ રવાના થયા હતા. રાજપરિવારની આ પરંપરાગત યાત્રા ધાર્મિક શ્રદ્ધા સાથે રાજકીય ઇતિહાસ અને સાંસ્કૃતિક વારસાની યાદ અપાવતી રહી હતી.

મંદિરે પહોંચતાં આશાપુરા માતાના પૂજારી જનાર્દન રાવલે હાર પહેરાવી તેમનું સ્વાગત કર્યું હતું. ત્યારબાદ પૂજારી દ્વારા રાજપરિવારના સભ્યોને માતાજીના નિજ મંદિર સુધી લઈ જવામાં આવ્યા હતા. ત્યાં માતાજીની રોજોકત પૂજા અર્ચના કરવામાં આવી હતી અને ચામર અર્પણ કર્યા બાદ પતરી ચડાવવાની મુખ્ય વિધિ શરૂ થઈ હતી.

આ વિધિ દરમિયાન માતાજીના મસ્તક પર ચડાવવામાં આવેલી પતરી રાજપરિવારના સભ્યોએ પોતાના ખેસમાં ઝીલી હતી. આ પરંપરાને માતાજીના આશીર્વાદ સાથે જોડાયેલી પવિત્ર માન્યતા તરીકે નિભાવવામાં આવે છે. સમગ્ર મંદિર પરિસર ‘જય આશાપુરા માતા’ના નાદથી ગુંજી ઊઠ્યું હતું. પતરી વિધિ આશાપુરા મંદિરના જયેશભાઈ દ્વારા સંપન્ન કરાવવામાં આવી હતી, જ્યારે પૂજારી કવચ અને મારુતે ગર્ભગૃહમાં વ્યવસ્થાની જવાબદારી સંભાળી હતી.

ધાર્મિક વિધિ પૂર્ણ થયા બાદ ભક્તો માટે અંદાજે 700 કિલો લાપસીના પ્રસાદનું વિતરણ કરવામાં આવ્યું હતું. આ રીતે ભુજમાં આશાપુરા માતાની આરાધના સાથે કચ્છની સદીઓ જૂની રાજપરંપરા ફરી એકવાર જીવંત બની હતી.

---------------

હિન્દુસ્થાન સમાચાર / Rohit Ramjibhai Padhiyar