નાગપુર, નવી દિલ્હી, 19 ઓક્ટોબર (હિ.સ.). રાષ્ટ્રીય સ્વયંસેવક સંઘનો વિજયા દશમી સમારોહ, નાગપુરના રેશિમબાગ મેદાનમાં યોજાશે. આ સમારોહ મંગળવાર, 20 ઓક્ટોબરના રોજ સવારે 7:40 વાગ્યે શરૂ થશે. આ સમારોહમાં સંઘના સરસંઘચાલક ડો. મોહન ભાગવતનું સંબોધન થશે. આ દરમિયાન સંઘની 100 વર્ષની યાત્રાના આકલન સાથે ભવિષ્યની કાર્યયોજના અને પ્રાથમિકતાઓને લઈને તેમના વિચારો પર દેશની નજર રહેશે.

આ સમારોહમાં દૈનિક જાગરણના પ્રધાન સંપાદક સંજય ગુપ્તા મુખ્ય અતિથિ તરીકે ઉપસ્થિત રહેશે. આ ઉપરાંત, પૂર્વ ઉપરાષ્ટ્રપતિ જગદીપ ધનખડ અને ઇઝરાયલના મુંબઈ સ્થિત મહાવાણિજ્યદૂત યાનિવ રેવાચને પણ આમંત્રિત કરવામાં આવ્યા છે. શતાબ્દી વર્ષના સમાપનની પૃષ્ઠભૂમિમાં આ વર્ષના વિજયા દશમી સમારોહનું વિશેષ મહત્વ છે.

રાષ્ટ્રીય સ્વયંસેવક સંઘની સ્થાપના ડો. કેશવ બલિરામ હેડગેવારે વર્ષ 1925માં વિજયા દશમીના દિવસે નાગપુરમાં કરી હતી. આ જ કારણ છે કે, વિજયા દશમી સંઘ માટે ફક્ત એક વાર્ષિક પરંપરા જ નહીં, પરંતુ સ્થાપના દિવસ તરીકે પણ વિશેષ મહત્વ ધરાવે છે. આ કાર્યક્રમ સાથે જ વિજયા દશમી પર સંઘના શતાબ્દી વર્ષનું સમાપન થઈ જશે.

સંઘની જન્મભૂમિ નાગપુરના રેશિમબાગ મેદાનમાં આયોજિત થનારો આ સમારોહ ઐતિહાસિક અને સંગઠનાત્મક દ્રષ્ટિએ મહત્વપૂર્ણ માનવામાં આવે છે. સંઘના શતાબ્દી વર્ષના અવસરે સંગઠનના વિસ્તરણ, શાખા વ્યવસ્થા, સ્વયંસેવકોના પ્રશિક્ષણ અને સામાજિક ક્ષેત્રમાં કરવામાં આવી રહેલા કાર્યોની સમીક્ષા મહત્વપૂર્ણ માનવામાં આવી રહી છે. આવા સમયે આ વર્ષનો વિજયા દશમી સમારોહ વીતેલા 100 વર્ષની યાત્રાનું આકલન કરવા અને આવનારા સમયની દિશા નક્કી કરવાના દ્રષ્ટિકોણથી મહત્વપૂર્ણ રહેશે.

વિજયા દશમી સમારોહમાં સરસંઘચાલકનું સંબોધન મુખ્ય આકર્ષણ રહે છે. આ સંબોધન દ્વારા સંઘ દેશના સામાજિક, સાંસ્કૃતિક અને રાષ્ટ્રીય મુદ્દાઓ પર પોતાનો દ્રષ્ટિકોણ રજૂ કરે છે. આ વખતે સામાજિક સમરસતા, રાષ્ટ્રીય એકતા, સ્વદેશી, નાગરિકોની સામાજિક જવાબદારી અને સંગઠનના વિસ્તરણ જેવા વિષયો પર તેમના વિચારોને લઈને ઉત્સુકતા છે. જોકે, આ મુદ્દાઓ પર સંઘની વાસ્તવિક ભૂમિકા તેમના સંબોધન પછી જ સ્પષ્ટ થશે.

શતાબ્દી વર્ષના સમાપન સાથે સંઘ સામે પોતાની અત્યાર સુધીની ઉપલબ્ધિઓનું આકલન કરવા અને ભવિષ્યની પ્રાથમિકતાઓને સ્પષ્ટ કરવાનો અવસર પણ છે.

આ વર્ષનો વિજયા દશમી સમારોહ ફક્ત પરંપરાગત આયોજન સુધી સીમિત નથી, પરંતુ સંઘની આગામી રણનીતિ અને કાર્યદિશાને સમજવાના દ્રષ્ટિકોણથી પણ મહત્વપૂર્ણ માનવામાં આવી રહ્યો છે. ડો. મોહન ભાગવતના સંબોધનથી સંઘની ભવિષ્યની યોજનાઓ અને સમકાલીન રાષ્ટ્રીય તેમજ સામાજિક મુદ્દાઓ પર તેના દ્રષ્ટિકોણ વિશે મહત્વપૂર્ણ સંકેતો મળવાની અપેક્ષા છે.

હિન્દુસ્થાન સમાચાર/મનીષ કુલકર્ણી/રામાનુજ શર્મા

હિન્દુસ્થાન સમાચાર / માધવી વ્યાસ