નવી દિલ્હી, 02 ઓક્ટોબર (હિ.સ.). શિવસેનાના રાજ્યસભા સાંસદ અને ગૌણ કાયદા સમિતિના અધ્યક્ષ મિલિંદ દેવડાએ, દુબઈથી તેલ અવીવ જઈ રહેલી ફ્લાયદુબઈની ઉડાનમાં અદમ્ય સાહસનો પરિચય આપીને 174 મુસાફરોનો જીવ બચાવનારા ભારતીય પાયલટ કેપ્ટન સ્મિત મચ્છરને શાંતિકાળના સર્વોચ્ચ વીરતા પુરસ્કાર 'અશોક ચક્ર'થી સન્માનિત કરવાની માંગ કરી છે. આ સંબંધમાં તેમણે શુક્રવારે વડાપ્રધાન નરેન્દ્ર મોદીને પત્ર લખીને કેપ્ટન મચ્છરની અસાધારણ બહાદુરીને ઔપચારિક રીતે માન્યતા આપવા વિનંતી કરી.

વડાપ્રધાનને લખેલા પત્રમાં દેવડાએ જણાવ્યું કે, મુંબઈમાં જન્મેલા કેપ્ટન સ્મિત મચ્છરે હવામાં ઉદ્ભવેલા અણધાર્યા અને ગંભીર સંકટ દરમિયાન જે સૂઝબૂઝ અને સાહસનો પરિચય આપ્યો, તે તેમની વ્યાવસાયિક જવાબદારીઓથી ક્યાંય આગળની ફરજ હતી. ઉડાન દરમિયાન સહ-પાયલટ દ્વારા કથિત રીતે વિમાનનો કાબૂ પોતાના હાથમાં લેવાના પ્રયાસ વચ્ચે કેપ્ટન મચ્છર પર કોકપિટમાં હુમલો કરવામાં આવ્યો અને તેઓ ગંભીર રીતે ઘાયલ થયા.

દેવડાએ પત્રમાં જણાવ્યું કે, ગંભીર ઈજાઓ હોવા છતાં કેપ્ટન મચ્છરે હિંમત ન હારી અને કોકપિટનો દરવાજો ખોલવામાં સફળતા મેળવી. આનાથી વિમાનમાં સવાર મુસાફરો અને ક્રૂ સભ્યોને પરિસ્થિતિમાં હસ્તક્ષેપ કરવાની તક મળી અને એક મોટી વિમાન દુર્ઘટના ટાળી શકાઈ. કેપ્ટન મચ્છરે પોતાના જીવની પરવા કર્યા વિના મુસાફરોની સુરક્ષાને સર્વોચ્ચ પ્રાથમિકતા આપી.

દેવડાએ પત્રમાં જણાવ્યું કે, કેપ્ટન મચ્છરની બહાદુરીની પ્રશંસા ભારતની સાથે વૈશ્વિક સ્તરે પણ થઈ છે. તેમને ઔપચારિક રીતે સન્માનિત કરવાથી દેશના યુવાનોને આ સંદેશ જશે કે, બહાદુરી કોઈ એક વ્યવસાય કે યુદ્ધના મેદાન સુધી સીમિત નથી. કોઈપણ નાગરિક અન્યોની સુરક્ષા માટે પોતાનો જીવ જોખમમાં મૂકીને સાહસ અને કર્તવ્યનિષ્ઠાનું ઉદાહરણ પૂરું પાડી શકે છે.

તેમણે કહ્યું કે, એક મુંબઈકર હોવાના નાતે તેમને કેપ્ટન મચ્છરની બહાદુરી પર વિશેષ ગર્વ છે.

ઉલ્લેખનીય છે કે, 30 સપ્ટેમ્બરના રોજ દુબઈથી તેલ અવીવ જઈ રહેલી ફ્લાયદુબઈની આંતરરાષ્ટ્રીય ઉડાન દરમિયાન કોકપિટમાં અચાનક હિંસક પરિસ્થિતિ સર્જાઈ હતી. આ દરમિયાન ભારતીય મૂળના મુખ્ય પાયલટ કેપ્ટન સ્મિત મચ્છર પર કથિત રીતે હુમલો કરવામાં આવ્યો અને તેમને ગંભીર ઈજાઓ થઈ. આ જ સમયે સહ-પાયલટ દ્વારા કથિત રીતે વિમાનનો કાબૂ પોતાના હાથમાં લેવાનો પ્રયાસ કરવામાં આવ્યો. ગંભીર રીતે ઘાયલ હોવા છતાં કેપ્ટન મચ્છરે સૂઝબૂઝ અને સાહસનો પરિચય આપતા કોકપિટનો દરવાજો ખોલવામાં સફળતા મેળવી. આ પછી મુસાફરો અને ક્રૂ સભ્યોને હસ્તક્ષેપ કરવાની તક મળી અને વિમાનને સુરક્ષિત રીતે ઉતારી શકાયું. આ ઘટનામાં વિમાનમાં સવાર તમામ 174 મુસાફરો અને ક્રૂ સભ્યોનો જીવ બચી ગયો.

હિન્દુસ્થાન સમાચાર / પ્રશાંત શેખર / સંજીવ પાશ

હિન્દુસ્થાન સમાચાર / માધવી વ્યાસ