આઇચી-નાગોયા, નવી દિલ્હી, 02 ઓક્ટોબર (હિ.સ.). ભારતીય બોક્સર લવલીના બોરગોહેને, એશિયન ગેમ્સમાં ઇતિહાસ રચતા મહિલાઓના 75 કિગ્રા વર્ગમાં ભારતને પ્રથમ વખત સુવર્ણ પદક અપાવ્યો. લવલીનાએ શુક્રવારે ફાઇનલમાં ચીનની બાઓ ઝીઇને 5-0ના સર્વસંમત નિર્ણયથી હરાવીને સુવર્ણ પદક પોતાના નામે કર્યો.

ગત એશિયન ગેમ્સમાં રજત પદક જીતનાર લવલીનાએ આ વખતે પોતાના પ્રદર્શનમાં એક કદમ આગળ વધીને સુવર્ણ પદક હાંસલ કર્યો. તે 2014 પછી એશિયન ગેમ્સમાં મહિલા બોક્સિંગનો સુવર્ણ જીતનાર મેરી કોમ પછી બીજી ભારતીય મહિલા બોક્સર પણ બની છે.

ચીની બોક્સર સામે લવલીનાએ આક્રમક અંદાજમાં શરૂઆત કરી. પહેલો રાઉન્ડ ખૂબ જ નજીકનો રહ્યો, પરંતુ ભારતીય બોક્સરે 3-2ના વિભાજિત નિર્ણયથી સરસાઈ મેળવી લીધી.

બીજા રાઉન્ડમાં ચીનની બાઓ ઝીઇએ દબાણ વધારવાનો પ્રયાસ કર્યો, પરંતુ લવલીનાએ ધીરજ જાળવી રાખી અને 4-1ના નિર્ણયથી આ રાઉન્ડ પણ પોતાના નામે કર્યો. ત્રણ જજોએ મુકાબલાને બરાબરીનો માન્યો, જ્યારે બે જજોએ લવલીનાના પક્ષમાં 20-18નો સ્કોર આપ્યો.

ત્રીજા અને અંતિમ રાઉન્ડમાં લવલીનાએ સમયનું શાનદાર વ્યવસ્થાપન કર્યું. તેમણે શરૂઆતના બે રાઉન્ડમાં બનાવેલી સરસાઈ જાળવી રાખી, જ્યારે બાઓ ઝીઇ સ્કોર પલટાવવા માટે સતત પ્રયાસ કરતી રહી. અંતિમ રાઉન્ડનો નિર્ણય પણ 4-1થી લવલીનાના પક્ષમાં રહ્યો અને કુલ મળીને તેમણે 5-0થી મુકાબલો જીતી લીધો.

લવલીનાનો આ એશિયન ગેમ્સમાં બીજો પદક છે. આ પહેલા તેમણે રજત પદક જીત્યો હતો. તે ટોક્યો ઓલિમ્પિક 2020માં કાંસ્ય પદક જીતી ચૂકી છે અને 2023 વર્લ્ડ ચેમ્પિયનશિપમાં સુવર્ણ પદક પણ હાંસલ કરી ચૂકી છે. 2026 કોમનવેલ્થ ગેમ્સમાં તેમણે રજત પદક જીત્યો હતો.

આસામના ગોલાઘાટ જિલ્લાના બરો મુખિયા ગામમાં 2 ઓક્ટોબર 1997ના રોજ જન્મેલી લવલીનાએ મર્યાદિત સંસાધનો વચ્ચે પોતાની બોક્સિંગ કારકિર્દીની શરૂઆત કરી. તેમણે 2018 અને 2019 વર્લ્ડ ચેમ્પિયનશિપમાં સતત કાંસ્ય પદક જીતીને આંતરરાષ્ટ્રીય સ્તરે ઓળખ બનાવી. ટોક્યો ઓલિમ્પિકનો કાંસ્ય પદક જીતીને તે ઓલિમ્પિક પદક જીતનાર ભારતની ત્રીજી બોક્સર અને બીજી ભારતીય મહિલા બોક્સર બની હતી.

લવલીનાને અર્જુન પુરસ્કાર અને મેજર ધ્યાનચંદ ખેલ રત્ન પુરસ્કારથી પણ સન્માનિત કરવામાં આવી છે. તેમના નામે 2026 એશિયન ચેમ્પિયનશિપનો કાંસ્ય, 2026 ઉસ્તી નાદ લાબેમ ગ્રાં પ્રીનો સુવર્ણ અને 2024 ગ્રાં પ્રી વર્લ્ડ ચેલેન્જ બોક્સિંગ ટુર્નામેન્ટનો રજત પદક પણ છે.

હિન્દુસ્થાન સમાચાર / સુનિલ દુબે

હિન્દુસ્થાન સમાચાર / માધવી વ્યાસ