નવી દિલ્હી, 20 ઓક્ટોબર (હિ.સ.). જાહેર ક્ષેત્રની પંજાબ નેશનલ બેંક (પીએનબી) એ, કૃત્રિમ મેધા (એઆઈ) ની મદદથી અવાજની નકલ, 'ડીપફેક' અને 'ફિશિંગ' (ખોટા સંદેશાઓ દ્વારા ગુપ્ત માહિતી ચોરવાનો પ્રયાસ) જેવી સાયબર છેતરપિંડીના વધતા જતા કિસ્સાઓ અંગે ગ્રાહકોને સાવચેત કર્યા છે.

બેંકે જારી કરેલા એક નિવેદનમાં સાયબર છેતરપિંડીના વધતા જતા કિસ્સાઓ અંગે ગ્રાહકોને સાવચેતી રાખવા અને કોઈ સંદેશ કે કોલ પર પુષ્ટિ કર્યા વિના વિશ્વાસ ન કરવાની સલાહ આપી છે. પીએનબીએ જણાવ્યું કે, છેતરપિંડી કરનારા લોકો હવે અત્યાધુનિક ટેકનોલોજીનો ઉપયોગ કરી રહ્યા છે.

બેંકના મેનેજિંગ ડિરેક્ટર અને મુખ્ય કાર્યકારી અધિકારી (સીઈઓ) અશોક ચંદ્રાએ ગ્રાહકોને આપેલા સંદેશમાં જણાવ્યું, આજકાલ સાયબર છેતરપિંડીના ઘણા કિસ્સાઓમાં લોકોના વર્તન, ખાસ કરીને વિશ્વાસ, ડર, ઉતાવળ અને રોજિંદી ડિજિટલ ટેવોનો ફાયદો ઉઠાવવામાં આવે છે. છેતરપિંડી કરનારા તમારા પરિવારના સભ્યો, મિત્રો કે વિશ્વાસુ લોકોના અવાજ કે ચહેરાની પણ નકલ કરી શકે છે અને પૈસા તરત મોકલવા માટે કોઈ કટોકટીનો ખોટો દાવો કરી શકે છે.

તેમણે કહ્યું કે, આ જ રીતે નકલી ઈમેલ, એસએમએસ કે સંદેશાઓ ખૂબ જ વ્યક્તિગત અને બેંકના અસલી સંદેશાઓ જેવા દેખાઈ શકે છે. આનાથી તેમની ઓળખ કરવી મુશ્કેલ બની જાય છે. આવા સંદેશાઓ ગભરાટ પેદા કરે છે અને ગ્રાહકો પુષ્ટિ કર્યા વિના કાર્યવાહી કરી બેસે છે.

દેશભરમાં સાયબર અપરાધની વધતી ઘટનાઓને જોતા જાહેર અને ખાનગી ક્ષેત્રની બેંકો અદ્યતન એઆઈથી પેદા થતા જોખમો, ક્વોન્ટમ કમ્પ્યુટિંગ સાથે સંકળાયેલા જોખમો અને ભારતીય રિઝર્વ બેંક (આરબીઆઈ) ના કડક નિયમનકારી નિર્દેશોનો સામનો કરવા માટે માહિતી ટેકનોલોજી અને સાયબર સુરક્ષા પર રોકાણ વધારી રહ્યા છે.

ઉલ્લેખનીય છે કે, પંજાબ નેશનલ બેંક (પીએનબી) એ ગ્રાહકોને જણાવ્યું કે દર વર્ષે ઓક્ટોબરને રાષ્ટ્રીય સાયબર સુરક્ષા જાગૃતિ માસ તરીકે ઉજવવામાં આવે છે.

હિન્દુસ્થાન સમાચાર/પ્રજેશ શંકર/સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ