નવી દિલ્હી, 27 ઓક્ટોબર (હિ.સ.) મતદાર યાદીના વિશેષ સઘન પુનરીક્ષણ (એસઆઈઆર)ને લઈને વિપક્ષ અને સત્તાપક્ષ વચ્ચે ચાલી રહેલી રાજકીય ચર્ચા વચ્ચે ભારતીય જનતા યુવા મોરચા (ભાજયુમો) 29 ઓક્ટોબર, ગુરુવારે તેની રાષ્ટ્રીય કાર્યકારિણીની બેઠક યોજવા જઈ રહ્યું છે. નવી ટીમની રચના પછી રાષ્ટ્રીય કાર્યકારિણીની આ પ્રથમ બેઠક હશે, જે દિલ્હી સ્થિત ભાજપના વિસ્તરણ કાર્યાલયમાં યોજાશે. બેઠકમાં એસઆઈઆરને લઈને વિપક્ષના આરોપોનો જવાબ આપવા, વિધાનસભાની આગામી ચૂંટણીઓ માટે યુવા કાર્યકર્તાઓની ભૂમિકા નક્કી કરવા અને સંગઠનને વધુ સક્રિય બનાવવા જેવા મુદ્દાઓ પર ચર્ચા થવાની સંભાવના છે.

પાર્ટી સૂત્રો અનુસાર, બેઠકમાં ભાજપના રાષ્ટ્રીય અધ્યક્ષ નિતિન નવીન, રાષ્ટ્રીય મહામંત્રી હરીશ દ્વિવેદી અને ભાજયુમોના રાષ્ટ્રીય અધ્યક્ષ હેમાંગ જોશી સામેલ થઈ શકે છે. બેઠકને નવી ટીમની સંગઠનાત્મક પ્રાથમિકતાઓ નક્કી કરવા અને આગામી રાજકીય કાર્યક્રમોની રણનીતિ તૈયાર કરવાના દૃષ્ટિકોણથી મહત્વપૂર્ણ માનવામાં આવી રહી છે.

બેઠકના મુખ્ય સંભવિત એજન્ડામાં એસઆઈઆરને લઈને વિપક્ષના આરોપોનો જવાબ આપવા માટે ભાજયુમો દ્વારા જમીની સ્તરે અભિયાન ચલાવવાનો મુદ્દો સામેલ છે. સૂત્રો અનુસાર, ભાજયુમોના કાર્યકર્તાઓ આ વિષય પર લોકો વચ્ચે જઈને ભાજપનો પક્ષ રજૂ કરી શકે છે અને એસઆઈઆર સાથે જોડાયેલા મુદ્દા પર જાગૃતિ અભિયાન ચલાવી શકે છે. એસઆઈઆરને લઈને વિપક્ષી દળોની આપત્તિઓ વચ્ચે ભાજયુમો આ વિષય પર પોતાની રણનીતિ તૈયાર કરી શકે છે. જોકે, અભિયાનની રૂપરેખા, કાર્યક્રમો અને તેમના અમલીકરણને લઈને અંતિમ નિર્ણય બેઠકમાં થનારી ચર્ચા પછી જ સ્પષ્ટ થશે.

બેઠકનો બીજો મુખ્ય સંભવિત એજન્ડા આગામી વિધાનસભા ચૂંટણીવાળા રાજ્યોમાં સંગઠનની ભૂમિકા નક્કી કરવાનો છે. બેઠકમાં સંગઠનના આંતરિક કામકાજની સમીક્ષા અને યુવા મોરચાને વધુ ગતિશીલ બનાવવાના ઉપાયો પર પણ ચર્ચા થવાની સંભાવના છે. રાજકીય પક્ષો માટે યુવા મતદારોના મુદ્દા, રોજગાર, શિક્ષણ, કૌશલ્ય વિકાસ અને ડિજિટલ માધ્યમો પર સંવાદ મહત્વપૂર્ણ વિષય બની રહ્યા છે. આવા સંજોગોમાં ભાજયુમોની આગામી રણનીતિમાં યુવા વર્ગ સાથે સંપર્ક વધારવા અને સંગઠનાત્મક ગતિવિધિઓને પ્રભાવી બનાવવા સાથે જોડાયેલા મુદ્દાઓ પર પણ ધ્યાન આપી શકાય છે.

હિન્દુસ્થાન સમાચાર / સૌરવ રાય / પવન કુમાર

હિન્દુસ્થાન સમાચાર / માધવી વ્યાસ