નવી દિલ્હી, 27 ઓક્ટોબર (હિ.સ.). 12મો બ્રિક્સ સંસદીય મંચ મંગળવારે સંયુક્ત ઘોષણાપત્ર અપનાવવામાં આવતા સંપન્ન થયો. ઘોષણાપત્રમાં સરહદ પારના આતંકવાદ, આતંકવાદના ભંડોળ અને આતંકવાદીઓને સુરક્ષિત આશ્રય પૂરો પાડવાની નિંદા કરતા તેની સામે શૂન્ય સહિષ્ણુતા અપનાવવા અને બેવડા ધોરણોથી બચવાની અપીલ કરવામાં આવી. આ સાથે જ, વૈશ્વિક શાસનમાં ગ્લોબલ સાઉથને વધુ પ્રતિનિધિત્વ આપવા માટે સંયુક્ત રાષ્ટ્ર સુરક્ષા પરિષદ (યુએનએસસી) માં સુધારાઓનું સમર્થન કરવામાં આવ્યું.

ઘોષણાપત્રમાં સંયુક્ત રાષ્ટ્ર ચાર્ટરના સિદ્ધાંતો, સાર્વભૌમ સમાનતા, પરસ્પર સન્માન, દેશોના આંતરિક મામલાઓમાં હસ્તક્ષેપ ન કરવા અને આંતરરાષ્ટ્રીય વિવાદોના શાંતિપૂર્ણ સમાધાન પ્રત્યે સભ્ય દેશોની પ્રતિબદ્ધતા દોહરાવવામાં આવી. આમાં નવી દિલ્હી ઘોષણાપત્રમાં વ્યક્ત કરાયેલી સહમતિઓને પણ દોહરાવવામાં આવી.

ઘોષણાપત્રમાં વૈશ્વિક શાસન વ્યવસ્થાને વધુ સમાવેશી બનાવવાની આવશ્યકતા પર ભાર મૂકતા સંયુક્ત રાષ્ટ્ર સુરક્ષા પરિષદમાં સુધારાઓનું સમર્થન કરવામાં આવ્યું. આમાં કહેવામાં આવ્યું કે વૈશ્વિક નિર્ણય લેતી સંસ્થાઓમાં વિકાસશીલ દેશો, ખાસ કરીને ગ્લોબલ સાઉથની આકાંક્ષાઓ અને પ્રાથમિકતાઓને પર્યાપ્ત સ્થાન મળવું જોઈએ. આતંકવાદના તમામ સ્વરૂપો સામે એકજૂટ કાર્યવાહીની જરૂરિયાત પર ભાર મૂકતા સરહદ પારના આતંકવાદ, આતંકવાદના ભંડોળ અને આતંકવાદીઓને સુરક્ષિત આશ્રયસ્થાન ઉપલબ્ધ કરાવવાની નિંદા કરવામાં આવી. ઘોષણાપત્રમાં આતંકવાદ સામે બેવડા ધોરણો ન અપનાવવાનું પણ આહ્વાન કરવામાં આવ્યું.

લોકસભા અધ્યક્ષ ઓમ બિરલાએ સમાપન ભાષણમાં કહ્યું કે, વૈશ્વિક પડકારોનો કાયમી ઉકેલ સંઘર્ષને બદલે સંવાદ, યુદ્ધને બદલે શાંતિ અને સ્પર્ધાને બદલે સહયોગમાં રહેલો છે. તેમણે રાષ્ટ્રીય સાર્વભૌમત્વના સન્માન, આંતરરાષ્ટ્રીય વિવાદોના શાંતિપૂર્ણ સમાધાન અને તમામ દેશો માટે સમાન વિકાસની તકો પર આધારિત વૈશ્વિક વ્યવસ્થાનું આહ્વાન કર્યું.

બ્રિક્સ સભ્ય અને ભાગીદાર દેશોના પીઠાસીન અધિકારીઓ તથા સાંસદોને સંબોધિત કરતા બિરલાએ કહ્યું કે, સભ્ય દેશોની પૃષ્ઠભૂમિ અને પડકારો અલગ-અલગ હોવા છતાં માનવતાના કલ્યાણ, શાંતિ અને સમૃદ્ધિ પ્રત્યે સહિયારી પ્રતિબદ્ધતા આ સમૂહની તાકાત છે. તેમણે કહ્યું કે વૈશ્વિક શાંતિનો અર્થ સૌ માટે સુરક્ષા, સન્માન, ન્યાય અને બહેતર ભવિષ્ય સુનિશ્ચિત કરવાનો છે.

બિરલાએ કહ્યું કે, આવનારી પેઢીઓ વર્તમાન નેતૃત્વનું આકલન આ આધારે કરશે કે તેમને વારસામાં કેટલી સુરક્ષિત, શાંતિપૂર્ણ અને સમૃદ્ધ દુનિયા મળી. તેમણે કહ્યું કે બ્રિક્સ દેશો વચ્ચે સંસદીય સંવાદથી પરસ્પર સમજણ મજબૂત કરવા, સહિયારા પડકારોના ઉકેલ શોધવા અને આંતરરાષ્ટ્રીય સહયોગને પ્રોત્સાહન આપવામાં મદદ મળી શકે છે. તેમણે સંસદોને લોકતાંત્રિક મૂલ્યો, પારદર્શિતા અને જવાબદારીને મજબૂત કરતા નાગરિકોની અપેક્ષાઓ અનુસાર કામ કરવા વિનંતી કરી.

બિરલાએ કહ્યું કે, સંસદ ફક્ત કાયદા બનાવતી સંસ્થા નથી પરંતુ સંવાદ, સામાન્ય સહમતિ, જવાબદારી અને જનવિશ્વાસના મહત્વપૂર્ણ કેન્દ્રો છે. તેમણે સંસદોને પારદર્શી, પ્રભાવી અને જન-કેન્દ્રિત સંસ્થાઓ તરીકે વિકસિત થવા અને બદલાતા સમયની આવશ્યકતાઓ અનુસાર પોતાને ઢાળવાનું આહ્વાન કર્યું.

તેમણે કહ્યું કે કૃત્રિમ બુદ્ધિમત્તા (એઆઈ) અને ડિજિટલ ટેકનોલોજીનો જવાબદારીપૂર્વક ઉપયોગ સંસદીય કાર્યપ્રણાલીને વધુ પ્રભાવી બનાવી શકે છે અને નાગરિકોની ભાગીદારી વધારી શકે છે. જોકે, આ માટે ટેકનોલોજીનો વિકાસ માનવીય મૂલ્યો, નૈતિકતા, પારદર્શિતા અને જવાબદારીને અનુરૂપ હોવો જોઈએ.

સંયુક્ત ઘોષણાપત્રમાં ડિજિટલ પબ્લિક ઇન્ફ્રાસ્ટ્રક્ચર (ડીપીઆઈ) ના વિસ્તરણ અને એઆઈના નૈતિક શાસન સાથે આબોહવા પરિવર્તનનો સામનો કરવામાં સમાન પરંતુ અલગ જવાબદારીઓ અને સંબંધિત ક્ષમતાઓ (સીબીડીઆર-આરસી) ના સિદ્ધાંતના પાલન પર પણ ભાર મૂકવામાં આવ્યો. આમાં ભારતની બ્રિક્સ અધ્યક્ષતા માટે સર્વસંમતિથી સમર્થનનો ઉલ્લેખ કરવામાં આવ્યો.

બિરલાએ કહ્યું કે, બ્રિક્સની સફળતા ત્યારે જ સાર્થક થશે, જ્યારે સભ્ય દેશોની પ્રગતિનો લાભ વ્યાપક આંતરરાષ્ટ્રીય સમુદાય સુધી પહોંચે અને વૈશ્વિક નિર્ણય પ્રક્રિયામાં ગ્લોબલ સાઉથની આકાંક્ષાઓને યોગ્ય પ્રતિનિધિત્વ મળે.

12મા બ્રિક્સ સંસદીય મંચના સમાપન પર બિરલાએ વર્ષ 2027 માટે સમૂહની અધ્યક્ષતા ચીનને સોંપી અને તેના નેતૃત્વમાં સહયોગ આગળ વધવાની આશા વ્યક્ત કરી. બિરલાએ આ બે દિવસીય મંચનું ઉદ્ઘાટન સોમવારે કર્યું હતું.

હિન્દુસ્થાન સમાચાર / સુશીલ કુમાર / સંજીવ પાશ

હિન્દુસ્થાન સમાચાર / માધવી વ્યાસ