અમૃતસર, નવી દિલ્હી, 29 ઓક્ટોબર (હિ.સ.). ભારત-પાકિસ્તાન આંતરરાષ્ટ્રીય સરહદ પર સીમા સુરક્ષા બળ (બીએસએફ) એ, બે અલગ-અલગ અભિયાનોમાં 11 કિલોથી વધુ નશીલા પદાર્થો જપ્ત કર્યા છે. આ દરમિયાન જવાનોએ એક વિદેશી પિસ્તોલ અને દાણચોરીમાં ઉપયોગમાં લેવાતા ક્ષતિગ્રસ્ત ડ્રોનને પણ કબજે લીધું છે. જપ્તી બાદ પોલીસે સંબંધિત કાયદાઓ હેઠળ અલગ-અલગ કેસ નોંધીને તપાસ શરૂ કરી દીધી છે.

બીએસએફ અનુસાર, અમૃતસર જિલ્લાની કહનગઢ સીમા ચોકીના વિસ્તારમાં અભિયાન ચલાવીને 5 કિલોથી વધુ હેરોઈન જપ્ત કરવામાં આવી હતી. આ સંબંધમાં બીએસએફની ફરિયાદ પર ઘરિન્ડા પોલીસ સ્ટેશનમાં કેસ નોંધવામાં આવ્યો છે. સુરક્ષા એજન્સીઓ જપ્ત કરાયેલી હેરોઈનની દાણચોરી સાથે સંકળાયેલા સંભવિત સંપર્કોને શોધવા માટે મામલાની તપાસ કરી રહી છે.

બીજી કાર્યવાહી અટારી સ્થિત સંકલિત તપાસ ચોકી નજીક કરવામાં આવી હતી. અહીં બીએસએફના જવાનોએ 5.5 કિલો નશીલો પાવડર, એક વિદેશી પિસ્તોલ અને ક્ષતિગ્રસ્ત ડ્રોન જપ્ત કર્યું. જપ્ત કરાયેલી પિસ્તોલની ઓળખ તુર્કિયેની કંપની ટિસાસમાં નિર્મિત ઝિગાના પિસ્તોલ તરીકે થઈ છે. આ ઉપરાંત, ઘટનાસ્થળેથી ડીજેઆઈ મેટ્રિસ 400 મોડેલનું એક ક્ષતિગ્રસ્ત ચાર પાંખવાળું ડ્રોન પણ જપ્ત કરવામાં આવ્યું હતું.

સરહદી વિસ્તારમાંથી નશીલા પદાર્થો સાથે ડ્રોન અને હથિયારની જપ્તીએ સરહદ પાર દાણચોરીના સંભવિત નેટવર્કને લઈને સવાલો ઊભા કર્યા છે. તપાસ દરમિયાન એ જાણવાનો પ્રયાસ કરવામાં આવશે કે જપ્ત કરાયેલી સામગ્રી ક્યાંથી મોકલવામાં આવી હતી અને તે કોના સુધી પહોંચાડવાની હતી. બંને કાર્યવાહીમાં કુલ 11 કિલોથી વધુ નશીલા પદાર્થોની જપ્તી થઈ છે. હાલમાં પોલીસ અને સંબંધિત સુરક્ષા એજન્સીઓ મામલાઓની તપાસ કરી રહી છે.

હિન્દુસ્થાન સમાચાર / ગુરુશરણ સિંહ / સુનીત નિગમ

હિન્દુસ્થાન સમાચાર / માધવી વ્યાસ