નવી દિલ્હી, 29 ઓક્ટોબર (હિ.સ.). દેશની સૌથી મોટી કાર નિર્માતા કંપની મારુતિ સુઝુકી ઇન્ડિયા લિમિટેડ (એમએસઆઈએલ) નો ઓગસ્ટ, 2025 થી ઓક્ટોબર, 2026 દરમિયાન ઇલેક્ટ્રિક વાહનો (ઈવી) ના નિકાસનો આંકડો 50 હજાર યુનિટને પાર કરી ગયો છે. કંપનીએ ઓગસ્ટ, 2025 માં જ વૈશ્વિક બજારોમાં ઈવી નો પુરવઠો શરૂ કર્યો હતો.

કંપનીએ ગુરુવારે જારી કરેલા નિવેદનમાં જણાવ્યું કે, એપ્રિલ-સપ્ટેમ્બર, 2026 દરમિયાન ભારતમાંથી થયેલા ઇલેક્ટ્રિક પેસેન્જર વાહનોના કુલ નિકાસમાં તેનો હિસ્સો લગભગ 93 ટકા રહ્યો. મારુતિ સુઝુકીએ જણાવ્યું કે, ઇ-વિટારાનું ઉત્પાદન ઓગસ્ટ, 2025 માં ગુજરાત સ્થિત હાંસલપુર પ્લાન્ટમાં શરૂ થયું હતું. આ વાહનને 100 થી વધુ દેશોમાં વેચાણ માટે તૈયાર કરવામાં આવ્યું છે.

મારુતિ સુઝુકી ઇન્ડિયા લિમિટેડના મેનેજિંગ ડિરેક્ટર (એમડી) અને ચીફ એક્ઝિક્યુટિવ ઓફિસર (સીઈઓ) હિસાશી તાકેઉચીએ જણાવ્યું, “આજે મારુતિ સુઝુકી લગભગ 50 દેશોમાં ઇલેક્ટ્રિક વાહનનો નિકાસ કરી રહી છે, જેમાં યુરોપ સૌથી મોટું બજાર છે. એપ્રિલ-સપ્ટેમ્બર, 2026 દરમિયાન ભારતના ઇલેક્ટ્રિક પેસેન્જર વાહન નિકાસમાં કંપનીનો હિસ્સો લગભગ 93 ટકા રહ્યો.”

કંપનીએ જણાવ્યું કે, હાંસલપુર પ્લાન્ટ સુઝુકીના પ્રથમ વૈશ્વિક બેટરી ઇલેક્ટ્રિક વાહનના નિર્માણનું એકમાત્ર કેન્દ્ર છે. મારુતિ સુઝુકીએ તાજેતરમાં આ પ્લાન્ટની વાર્ષિક ઉત્પાદન ક્ષમતા વધારીને 10 લાખ વાહન કરી દીધી છે. આ સાથે જ, આ એક જ સ્થળે આટલી ઉત્પાદન ક્ષમતા હાંસલ કરનાર સુઝુકીનો દુનિયાનો પ્રથમ ઉત્પાદન પ્લાન્ટ બની ગયો છે.

કંપની અનુસાર, હાંસલપુર પ્લાન્ટમાં કુલ 25,288.7 કરોડ રૂપિયાનું રોકાણ કરવામાં આવ્યું છે. આ પ્લાન્ટ નિકાસની દ્રષ્ટિએ પણ મહત્વપૂર્ણ છે અને નાણાકીય વર્ષ 2025-26 માં મારુતિ સુઝુકીના કુલ વાહન નિકાસમાં તેનો હિસ્સો લગભગ અડધો રહ્યો.

ઉલ્લેખનીય છે કે, કંપની પોતાની ઇલેક્ટ્રિક એસયુવી ‘ઇ-વિટારા’નો નિકાસ બ્રિટન, નોર્વે, જર્મની, જાપાન અને સ્વિટ્ઝર્લેન્ડ સહિત દુનિયાના લગભગ 50 દેશોમાં કરી રહી છે. યુરોપ તેના ઇલેક્ટ્રિક વાહનનું સૌથી મોટું નિકાસ બજાર છે.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ