નવી દિલ્હી, 03 ઓક્ટોબર (હિ.સ.) રાજ્યસભાના ઉપસભાપતિ હરિવંશના નેતૃત્વમાં ભારતીય સંસદીય પ્રતિનિધિમંડળ, 5 થી 9 ઓક્ટોબર સુધી તાન્ઝાનિયાના અરુષામાં યોજાનારી આંતર સંસદીય સંઘ (આઈપીયુ) ની 153મી મહાસભા અને તેની સંબંધિત બેઠકોમાં ભાગ લેવા માટે રવાના થઈ ગયું છે.

રાજ્યસભા સચિવાલય અનુસાર, આઈપીયુ મહાસભામાં દુનિયાભરના સાંસદો ‘સમાવેશીતા, વિશ્વાસ અને સૌના માટે તકો દ્વારા સુશાસનને પ્રોત્સાહન આપવા અને સમુદાયોને સશક્ત બનાવવા’ વિષય પર ચર્ચા કરશે.

ભારતીય પ્રતિનિધિમંડળમાં લોકસભા સાંસદો અનુરાગ સિંહ ઠાકુર, અપરાજિતા સારંગી, સંજય જયસ્વાલ, કમલજીત સેહરાવત, લતા વાનખેડે, બિજુલી કલિતા મેધી અને એન. કે. પ્રેમચંદ્રન તથા રાજ્યસભા સાંસદ ડૉ. સસ્મિત પાત્રાનો સમાવેશ થાય છે.

હરિવંશ આઈપીયુ ની શાસક પરિષદ, સામાન્ય ચર્ચા અને કટોકટીના વિષય પર યોજાનારી ચર્ચામાં ભાગ લેશે. તેઓ આઈપીયુ અધ્યક્ષ પદના ઉમેદવારો સાથે યોજાનારી સુનાવણીમાં પણ ભાગ લેશે.

ભારતીય પ્રતિનિધિમંડળના સભ્યો લોકશાહી અને માનવ અધિકાર, શાંતિ અને આંતરરાષ્ટ્રીય સુરક્ષા, ટકાઉ વિકાસ, મહિલાઓની ભાગીદારી, વિજ્ઞાન અને ટેકનોલોજી, આતંકવાદ વિરોધી પગલાં, આરોગ્ય, માનસિક સ્વાસ્થ્ય, મહત્વપૂર્ણ ખનિજો, કૃત્રિમ બુદ્ધિમત્તા અને કામના ભવિષ્ય જેવા વિષયો પર ચર્ચા કરશે.

આ ઉપરાંત દરિયાઈ સુરક્ષા, આબોહવા પરિવર્તન તથા પર્વતીય અને દરિયાઈ ઇકોસિસ્ટમના સંરક્ષણ સહિત સમકાલીન વૈશ્વિક મુદ્દાઓ પર પણ વિવિધ બેઠકો, પેનલ ચર્ચાઓ અને કાર્યશાળાઓમાં ભારતીય પ્રતિનિધિમંડળ પોતાનો પક્ષ રજૂ કરશે.

ભારતના સંસદીય પ્રતિનિધિમંડળની આ ભાગીદારી આઈપીયુ સાથે તેના સતત જોડાણ અને સંસદીય રાજદ્વારી, બહુપક્ષીય સંવાદ તથા વૈશ્વિક શાંતિ, વિકાસ, લોકશાહી અને સમુદાયોના સશક્તિકરણ સંબંધિત મુદ્દાઓ પર વિવિધ સંસદો વચ્ચે સહયોગ પ્રત્યે તેની પ્રતિબદ્ધતા દર્શાવે છે.

હિન્દુસ્થાન સમાચાર / સુશીલ કુમાર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ