નવી દિલ્હી, 03 ઓક્ટોબર (હિ.સ.). નેપાળ નજીક તિબેટમાં શનિવારે સવારે લગભગ એક કલાકની અંદર બે ભૂકંપ નોંધાયા. નેશનલ સેન્ટર ફોર સિસ્મોલોજી (એનસીએસ) અનુસાર, બંને ભૂકંપની તીવ્રતા 3.6 અને 3.1 રહી. ભૂકંપીય ગતિવિધિ હિમાલયના સંવેદનશીલ ક્ષેત્રમાં નોંધવામાં આવી.

મીડિયા રિપોર્ટ્સમાં એનસીએસના હવાલાથી જણાવવામાં આવ્યું છે કે, પહેલો ભૂકંપ સવારે 6:00 વાગ્યે આઈએસટી પર આવ્યો. તેની તીવ્રતા 3.6 હતી અને તેનું કેન્દ્ર જમીનથી લગભગ 15 કિલોમીટર નીચે હતું. ભૂકંપનું સ્થાન 29.623° ઉત્તર અક્ષાંશ અને 92.503° પૂર્વ રેખાંશ પર નોંધવામાં આવ્યું. તેના લગભગ 55 મિનિટ પછી સવારે 6:55 વાગ્યે આઈએસટી પર 3.1 તીવ્રતાનો બીજો ભૂકંપ આવ્યો. તેનું કેન્દ્ર લગભગ 14 કિલોમીટરની ઊંડાઈમાં હતું અને તેના નિર્દેશાંક 28.459° ઉત્તર અક્ષાંશ અને 92.196° પૂર્વ રેખાંશ નોંધવામાં આવ્યા.

બંને ભૂકંપ તિબેટ ક્ષેત્રમાં આવ્યા, જે હિમાલયી ભૂકંપીય ક્ષેત્રનો ભાગ છે. હાલમાં આ આંચકાઓથી કોઈ મોટા નુકસાન કે જાનહાનિની માહિતી સામે આવી નથી.

બંને ભૂકંપ એવા સમયે આવ્યા છે, જ્યારે નેપાળ તાજેતરના દિવસોમાં પૂર અને ભૂસ્ખલન સહિત ઘણી કુદરતી આફતોથી પ્રભાવિત થયું છે. ઓગસ્ટમાં નેપાળ-ચીન સરહદ નજીક હિમસ્ખલન અને ખડકોના ખસવા પછી અચાનક આવેલા પૂરથી ભોટે કોશી નદીનું જળસ્તર વધી ગયું હતું. તેનાથી ઘરો, રસ્તાઓ, પુલો અને જળવિદ્યુત પરિયોજનાઓને નુકસાન થયું હતું.

વળી, નેપાળ રેડ ક્રોસ સોસાયટીના 01 ઓક્ટોબરના સ્થિતિ રિપોર્ટ અનુસાર, 24 થી 27 સપ્ટેમ્બરની વચ્ચે સતત વરસાદને કારણે ઘણા પ્રાંતોમાં પૂર, ભૂસ્ખલન અને જળભરાવની સ્થિતિ સર્જાઈ. આ ઘટનાઓમાં 30 લોકોના મોત, 15 લોકો ઘાયલ થયા અને ત્રણ લોકો લાપતા થયા હોવાની માહિતી આપવામાં આવી. લગભગ 2,000 પરિવારો પ્રભાવિત થયા હતા.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ