નવી દિલ્હી, 30 ઓક્ટોબર (હિ.સ.). વડાપ્રધાન નરેન્દ્ર મોદી, આજથી ગુજરાતના બે દિવસીય પ્રવાસે રહેશે. આ દરમિયાન તેઓ બનાસકાંઠામાં 14,000 કરોડ રૂપિયાથી વધુના વિકાસ પ્રોજેક્ટ્સનો શિલાન્યાસ, ઉદ્ઘાટન અને લોકાર્પણ કરશે. આ સાથે જ પ્રધાનમંત્રી કિસાન સન્માન નિધિ (પીએમ-કિસાન)ના 24મા હપ્તા તરીકે દેશભરના ખેડૂતોને આશરે 19,000 કરોડ રૂપિયા જારી કરશે.

વડાપ્રધાન કાર્યાલયે ગુજરાત પ્રવાસની પૂર્વસંધ્યાએ જારી કરેલા નિવેદનમાં જણાવ્યું કે, મોદી 30 ઓક્ટોબરે બનાસકાંઠામાં ભ્રૂણ પ્રત્યારોપણ ટેકનોલોજી અને ઇન-વિટ્રો ફર્ટિલાઇઝેશન (ઈટી-આઈવીએફ) પ્રયોગશાળા અને ભારત ગોવંશ પ્રજનન અને સંશોધન કેન્દ્રની મુલાકાત લેશે. આ પછી તેઓ વિવિધ વિકાસ પ્રોજેક્ટ્સનો શુભારંભ કરશે, બે રેલ સેવાઓને લીલી ઝંડી બતાવશે અને જનસભાને સંબોધિત કરશે.

મોદી બનાસકાંઠાના ભીલડીમાં સ્થાપિત ભારત ગોવંશ પ્રજનન અને સંશોધન કેન્દ્રને રાષ્ટ્રને સમર્પિત કરશે. 127 એકરમાં ફેલાયેલું આ કેન્દ્ર ગોવંશની નસલોમાં સુધારા, આનુવંશિક ઉન્નયન અને આધુનિક પ્રજનન તકનીકોને પ્રોત્સાહન આપશે. આ કાંકરેજ નસલના ગોવંશ માટે દેશમાં પોતાની પ્રકારનું પ્રથમ કેન્દ્ર હશે. આના માધ્યમથી નસલ સુધારાની ગતિ 10 થી 20 ગણી વધારવાનું લક્ષ્ય છે.

વડાપ્રધાન બનાસ ડેરીના થરાદ અને રાધનપુરમાં સ્થાપિત થનારા બે બાયો-સીએનજી પ્લાન્ટ્સનો શિલાન્યાસ પણ કરશે. આ પ્લાન્ટ્સમાં દરરોજ અનુક્રમે 75 અને 100 મેટ્રિક ટન છાણના પ્રોસેસિંગની ક્ષમતા હશે. મોદી અમદાવાદ મેટ્રોના બીજા તબક્કા હેઠળ એરપોર્ટ અને ગિફ્ટ સિટી સુધીના વિસ્તરણ પ્રોજેક્ટ્સનો શિલાન્યાસ કરશે. એરપોર્ટ વિસ્તરણ ખંડ 6 કિલોમીટરથી વધુ લાંબો હશે અને તેમાં પાંચ સ્ટેશન હશે, જ્યારે ગિફ્ટ સિટી વિસ્તરણ ખંડ 3.3 કિલોમીટરથી વધુ લાંબો હશે અને તેમાં ત્રણ સ્ટેશન બનાવવામાં આવશે.

વડાપ્રધાન આશરે 2,600 કરોડ રૂપિયાના ખર્ચે અમદાવાદ-મહેસાણા રોડ (રાજ્ય ધોરીમાર્ગ-41)ને ચાર લેનથી આઠ લેનમાં અપગ્રેડ કરવાના પ્રોજેક્ટનો પણ શિલાન્યાસ કરશે. આ ઉપરાંત, ગુજરાતમાં 4,030 નવા બાળ-અનુકૂળ આંગણવાડી કેન્દ્રોનો શિલાન્યાસ કરશે અને 361 પૂર્ણ થયેલા કેન્દ્રોનું ઉદ્ઘાટન કરશે. આશરે 800 કરોડ રૂપિયાની આ પહેલથી ચાર લાખથી વધુ લોકોને લાભ મળવાની અપેક્ષા છે.

મોદી કૃષિ અવસંરચના કોષ હેઠળ પૂર્ણ થયેલા 521 પ્રોજેક્ટ્સ રાષ્ટ્રને સમર્પિત કરશે. આ પ્રોજેક્ટ્સ પર આશરે 4,950 કરોડ રૂપિયા ખર્ચ કરવામાં આવ્યા છે. તેમાં શીતગૃહ, ભંડારગૃહ, સાયલો, પોલીહાઉસ, ગ્રીનહાઉસ અને કૃષિ ઉત્પાદનોના પ્રોસેસિંગ સાથે સંકળાયેલી સુવિધાઓ શામેલ છે. તેઓ સાણંદરમાં બટાકા પ્રોસેસિંગ પ્લાન્ટના વિસ્તરણનું ઉદ્ઘાટન અને પાલનપુરમાં અતિ ઉચ્ચ તાપમાનવાળા ઉત્પાદનો માટે સ્વચાલિત સંગ્રહ અને નિકાસ પ્રણાલીનો શુભારંભ પણ કરશે.

વડાપ્રધાન સાબરમતી-વારાણસી એક્સપ્રેસ અને મહેસાણા-બેચરાજી-સાબરમતી મેમુ રેલ સેવાઓને લીલી ઝંડી બતાવશે. પીએમ-કિસાનનો 24મો હપ્તો જારી કરવા સાથે તેઓ 12 મંજૂર બાગાયતી ક્લસ્ટરની જમીની ગતિવિધિઓનો શુભારંભ પણ કરશે. લગભગ 1.46 લાખ હેક્ટર વિસ્તારમાં ફેલાયેલા આ ક્લસ્ટરથી 1.3 લાખથી વધુ ખેડૂતોને લાભ મળવાની અપેક્ષા છે. ઉત્તર ગુજરાતના બે ક્લસ્ટર બટાકા ઉત્પાદન પર કેન્દ્રિત હશે.

મોદી કેવડિયા સ્થિત એકતા નગરમાં ભારત પર્વ 2026નું ઉદ્ઘાટન કરશે. આ આયોજન 15 નવેમ્બર સુધી ચાલશે. તેમાં વિવિધ રાજ્યો અને કેન્દ્રશાસિત પ્રદેશોની લોક કલાઓ, પરંપરાગત વાનગીઓ, હસ્તકલા અને પર્યટન સ્થળોને પ્રદર્શિત કરવામાં આવશે. વડાપ્રધાન તે જ સાંજે એકતા પ્રકાશ પર્વ પણ જોશે, જેમાં દેશની સાંસ્કૃતિક વિવિધતા અને એકતા દર્શાવવા માટે રોશની અને કલાત્મક સજાવટની વ્યવસ્થા કરવામાં આવી છે.

વડાપ્રધાન બીજા દિવસે 31 ઓક્ટોબરે સરદાર વલ્લભભાઈ પટેલની 151મી જયંતિના અવસરે રાષ્ટ્રીય એકતા દિવસ સમારોહમાં ભાગ લેશે અને સ્ટેચ્યુ ઓફ યુનિટી પર પુષ્પાંજલિ અર્પણ કરશે. આ દરમિયાન એકતા નગરમાં 400 કરોડ રૂપિયાથી વધુના વિકાસ પ્રોજેક્ટ્સનો શિલાન્યાસ, ઉદ્ઘાટન અને લોકાર્પણ પણ કરવામાં આવશે.

આ પ્રોજેક્ટ્સમાં સીવેજ અને જળ શુદ્ધિકરણ પ્લાન્ટ, નર્મદા ઘાટનું અપગ્રેડેશન, ભવનો પર રોશનીની વ્યવસ્થા, ભારતીય રેલવે કેટરિંગ અને ટુરિઝમ કોર્પોરેશન (આઈઆરસીટીસી)નો હોટેલ અને વર્ષાવન સહિતની પર્યટન સુવિધાઓ શામેલ છે. આ ઉપરાંત શૂન્ય કચરા ઘન કચરા વ્યવસ્થાપન, પર્યાવરણ પર્યટન અને માર્ગ વિકાસ સાથે સંકળાયેલા પ્રોજેક્ટ્સનો શિલાન્યાસ પણ કરવામાં આવશે.

આ વર્ષે રાષ્ટ્રીય એકતા દિવસ પરેડમાં વામપંથી ઉગ્રવાદનો સામનો કરવામાં સુરક્ષા દળોની સિદ્ધિઓ અને પૂર્વ પ્રભાવિત ક્ષેત્રોમાં શાંતિ, સુરક્ષા અને વિકાસની દિશામાં થયેલા પરિવર્તનો પર વિશેષ ભાર રહેશે. રાષ્ટ્રીય નાટ્ય વિદ્યાલય દ્વારા ‘નક્સલ મુક્ત ભારત’ વિષય પર વિશેષ નાટ્ય પ્રસ્તુતિ આપવામાં આવશે, જેમાં વામપંથી ઉગ્રવાદથી પ્રભાવિત 126 જિલ્લાના આશરે 2,000 કલાકારો ભાગ લેશે. સમારોહની ઝાંખીઓ અને સાંસ્કૃતિક પ્રસ્તુતિઓનો મુખ્ય વિષય ‘વંદે માતરમ’ હશે. દેશભરમાંથી આવેલા આશરે 5,000 કલાકારો ભારતીય શાસ્ત્રીય અને લોક કલાઓ, સંગીત, નૃત્ય અને સાંસ્કૃતિક વારસાનું પ્રદર્શન કરશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ