અલ મુખા (યમન), નવી દિલ્હી, 05 ઓક્ટોબર (હિ.સ.) લાલ સાગર અને અદનની ખાડીના મુખ પર વ્યાપારી જહાજોની સુરક્ષા અંગેની ચિંતા ફરી એકવાર વધી ગઈ છે. યમનના શહેર અલ મુખાથી લગભગ 60 નોટિકલ માઇલ દક્ષિણમાં એક ઓઇલ ટેન્કરની ખૂબ નજીક ઘણા ધડાકા થયા. યુનાઇટેડ કિંગડમ મેરીટાઇમ ટ્રેડ ઓપરેશન્સ (યુકેએમટીઓ) એ ધડાકાઓ પછી આ વિસ્તારમાંથી પસાર થતા જહાજો માટે એક્સ પર ચેતવણી જારી કરી.

ચેતવણી નંબર 151-26 અનુસાર, આ ઘટનાની જાણકારી જહાજના કંપની સિક્યોરિટી ઓફિસર (સીએસઓ) એ આપી. રિપોર્ટમાં કહેવામાં આવ્યું છે કે, જ્યારે જહાજ અલ મુખાના દક્ષિણમાં જળ વિસ્તારમાંથી પસાર થઈ રહ્યું હતું, ત્યારે તેની ખૂબ નજીક ઘણા જોરદાર ધડાકા જોવા મળ્યા. હજુ એ સ્પષ્ટ નથી કે ધડાકાઓનું કારણ શું હતું અથવા તેની પાછળ કોણ હતું. યુકેએમટીઓ એ આ ઘટનાને શંકાસ્પદ પ્રવૃત્તિ ગણાવી છે.

ધડાકાઓ પછી સૌથી રાહતની વાત એ છે કે, ટેન્કરનો આખો ક્રૂ સુરક્ષિત હોવાનું જણાવાઈ રહ્યું છે. યુકેએમટીઓ અનુસાર, ઘટના પછી પર્યાવરણને કોઈ પણ પ્રકારના નુકસાનની પણ સૂચના મળી નથી. એટલે કે, હાલમાં સમુદ્રમાં તેલ રિસાવ અથવા અન્ય કોઈ પર્યાવરણીય અસરનો રિપોર્ટ નથી.

યુકેએમટીઓ એ કહ્યું છે કે, આ મામલાની સત્તાવાર તપાસ શરૂ કરી દેવામાં આવી છે. હજુ એ સ્પષ્ટ થયું નથી કે, ધડાકા સૈન્ય પ્રવૃત્તિ, મિસાઇલ કે ડ્રોન હુમલા, અથવા અન્ય કોઈ કારણસર થયા. તેથી, હાલમાં આ ઘટનાને કોઈ ખાસ જૂથ કે દેશ સાથે જોડવામાં આવી નથી.

યુકેએમટીઓ એ દરિયાઈ માર્ગેથી પસાર થતા તમામ વ્યાપારી જહાજોને ખૂબ સાવચેતી રાખવાની સલાહ આપી છે. સાથે જ, કેપ્ટન અને શિપિંગ કંપનીઓને નિર્દેશ આપવામાં આવ્યો છે કે, તેઓ કોઈ પણ શંકાસ્પદ પ્રવૃત્તિની તરત યુકેએમટીઓ ને જાણ કરે.

અલ-મુખાના દક્ષિણમાં આવેલો આ દરિયાઈ વિસ્તાર વ્યૂહાત્મક રીતે મહત્વપૂર્ણ બાબ અલ-મંદેબ જળસંધિની ખૂબ નજીક છે. આ લાલ સાગરને અદનની ખાડી સાથે જોડે છે. તાજેતરમાં આ વિસ્તારમાં પ્રાદેશિક તણાવ અને સૈન્ય પ્રવૃત્તિઓમાં વધારો જોવા મળ્યો છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ