નવી દિલ્હી, 06 ઓક્ટોબર (હિ.સ.). કેન્દ્ર સરકાર 'લઘુ અને મધ્યમ ઉદ્યોગ વિકાસ ભંડોળ' (એસજીએફ) બનાવશે. તેને સરકાર વિવિધ રોકાણ ભંડોળો દ્વારા 10 હજાર કરોડ રૂપિયા ઉપલબ્ધ કરાવશે. આનાથી નાના અને મધ્યમ ઉદ્યોગોને સરળતાથી મૂડી મળી શકશે.

પ્રધાનમંત્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળે આજે ભારત સરકારની પ્રતિબદ્ધતાને મંજૂરી આપી. કેન્દ્રીય સૂચના અને પ્રસારણ મંત્રી અશ્વિની વૈષ્ણવે આજે રાષ્ટ્રીય મીડિયા કેન્દ્રમાં આયોજિત પત્રકાર પરિષદમાં તેની જાણકારી આપી.

વૈષ્ણવે કહ્યું કે, હાલની ઇક્વિટી સહાયનો મોટાભાગનો હિસ્સો પ્રારંભિક તબક્કાના અને સૂક્ષ્મ ઉદ્યોગોને પૂરો પાડવામાં આવે છે. આ ભંડોળનો ઉદ્દેશ્ય વ્યવહારુ લઘુ અને મધ્યમ ઉદ્યોગો માટે વિકાસ-મૂડીના અંતરને પૂરવાનો છે. આ ભંડોળ ટિયર-ટુ અને ટિયર-થ્રી ઔદ્યોગિક સમૂહોમાં ઉત્પાદન સાથે સંકળાયેલા લઘુ અને મધ્યમ ઉદ્યોગો પર ધ્યાન કેન્દ્રિત કરશે.

ભંડોળ ઉદ્યોગોને વિસ્તરણ કરવામાં, ટેકનોલોજી અપનાવવામાં અને વૈશ્વિક બજારોમાં પ્રવેશ મેળવવામાં સહયોગ કરશે. એસજીએફથી વિસ્તરણ, ઉત્પાદકતા અને નિકાસ સ્પર્ધાત્મકતાને પ્રોત્સાહન મળવાની અપેક્ષા છે.

ઉલ્લેખનીય છે કે, આ કેન્દ્રીય બજેટ 2026-27માં કરવામાં આવેલી તે સર્વગ્રાહી ઘોષણાઓનો એક ભાગ હતો. આ ઘોષણાઓનો ઉદ્દેશ્ય સમગ્ર રીતે એમએસએમઈ ઇકોસિસ્ટમ માટે સમાનતા, નાણાકીય સુલભતા અને વ્યાવસાયિક સહાય પૂરી પાડવાનો હતો.

હિન્દુસ્થાન સમાચાર / અનૂપ શર્મા / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ