નવી દિલ્હી, 06 ઓક્ટોબર (હિ.સ.). કેન્દ્ર સરકારે દેશની વૈશ્વિક લોજિસ્ટિક્સ સ્પર્ધાત્મકતાને પ્રોત્સાહન આપવા માટે, સંકલિત પરિવહન અને લોજિસ્ટિક્સ પ્રાધિકરણ (આઈટીએલએ) ની સ્થાપનાને મંગળવારે મંજૂરી આપી દીધી. આ પ્રાધિકરણ ભારતના પરિવહન સંબંધિત ક્ષેત્રોમાં સંકલનને મજબૂત કરવા માટે એક સર્વોચ્ચ રાષ્ટ્રીય સંસ્થા હશે. આઈટીએલએ રાષ્ટ્રીય લોજિસ્ટિક્સ નીતિ (2022), સંશોધન, તાલીમ અને કૌશલ્ય વિકાસમાં સહયોગ કરશે.

પ્રધાનમંત્રી નરેન્દ્ર મોદીની અધ્યક્ષતામાં, મંગળવારે મંત્રીમંડળની બેઠકમાં પરિવહન મંત્રાલયના આ પ્રસ્તાવને મંજૂરી આપવામાં આવી. સૂચના અને પ્રસારણ મંત્રી અશ્વિની વૈષ્ણવે રાષ્ટ્રીય મીડિયા કેન્દ્રમાં પત્રકાર પરિષદમાં તેની જાણકારી આપી. તેમણે જણાવ્યું કે પ્રાધિકરણનો ઉદ્દેશ્ય મજબૂત બહુસ્તરીય કનેક્ટિવિટી, વધુ કાર્યક્ષમ માળખાકીય સુવિધા અને ઓછો લોજિસ્ટિક્સ ખર્ચ સુનિશ્ચિત કરવાનો છે. આનાથી ભારતની વૈશ્વિક લોજિસ્ટિક્સ સ્પર્ધાત્મકતાને પ્રોત્સાહન મળશે.

તેમણે કહ્યું કે, આઈટીએલએ 500 કરોડ કે તેથી વધુ ખર્ચવાળી પરિયોજનાઓ માટે તકનીકી મૂલ્યાંકન કરશે, અમલીકરણનું નિરીક્ષણ કરશે અને પૂર્ણ થયા પછી અસરનું આકલન કરશે. તે ફાસ્ટેગ, વાહન અને જીપીએસ આધારિત પ્રણાલીઓ જેવા સ્ત્રોતોનો ઉપયોગ કરીને એક સંકલિત પરિવહન ડેટા ભંડાર પણ બનાવશે.

આઈટીએલએ 10 વર્ષ કે તેથી વધુની યોજના અવધિ સાથે એક દીર્ઘકાલીન રાષ્ટ્રીય પરિવહન માસ્ટર પ્લાન તૈયાર કરશે. યોજનામાં માર્ગ, રેલવે, બંદર, વિમાનન, જળમાર્ગ, શહેરી ગતિશીલતા અને લોજિસ્ટિક્સ શામેલ હશે. તે પરિવહન મંત્રાલયોની વાર્ષિક અને અલ્પકાલીન ક્ષેત્રીય યોજનાઓને સંરેખિત કરવામાં મદદ કરશે.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / ડો.હિતેશ એન.વ્યાસ