- વિશાખાપટ્ટનમને મોટા મેરીટાઇમ ઔદ્યોગિક હબ તરીકે વિકસાવવા આહ્વાન

નવી દિલ્હી, 06 ઓક્ટોબર (હિ.સ.). રક્ષા મંત્રી રાજનાથ સિંહે મંગળવારે વિશાખાપટ્ટનમના હિન્દુસ્તાન શિપયાર્ડ લિમિટેડમાં પ્રથમ ફ્લીટ સપોર્ટ શિપ ‘સૂર્યા’ લોન્ચ કર્યું. આ ઉપરાંત, તેમણે બીજા ફ્લીટ સપોર્ટ શિપ એફએસએસ-5 ની કીલ મૂકી અને અપગ્રેડેડ સ્લિપવે-4 તેમજ 300 ટનના ગોલિયથ ક્રેનનું ઉદ્ઘાટન કર્યું. આ ભારતની સ્વદેશી શિપબિલ્ડિંગ ક્ષમતાને મજબૂત કરવા અને ભારતીય નૌકાદળની ઓપરેશનલ પહોંચ તેમજ સહનશીલતા વધારવાની દિશામાં એક મહત્વપૂર્ણ પગલું છે. રક્ષા મંત્રીએ વિશાખાપટ્ટનમને મોટા મેરીટાઇમ ઔદ્યોગિક હબ તરીકે વિકસાવવા આહ્વાન કર્યું અને ભારતીય શિપયાર્ડ્સને આત્મનિર્ભરતાથી આગળ વધીને વૈશ્વિક સ્પર્ધા તરફ આગળ વધવા વિનંતી કરી.

આ પ્રસંગે રક્ષા મંત્રીએ જણાવ્યું કે, આ ત્રણેય માઇલસ્ટોનનું મહત્વ અલગ-અલગ સિદ્ધિઓ કરતાં ઘણું વધારે છે. હિન્દુસ્તાન શિપયાર્ડ લિમિટેડ માત્ર પોતાની જહાજ બનાવવાની ક્ષમતાને મજબૂત કરી રહ્યું નથી, પરંતુ ભારતની દરિયાઈ શક્તિનો પાયો પણ મજબૂત કરી રહ્યું છે. તેમણે 1948માં વિશાખાપટ્ટનમમાં આઝાદ ભારતમાં બનેલા પ્રથમ જહાજ ‘જલા ઉષા’ના લોન્ચિંગને યાદ કરતાં ભારતના જૂના દરિયાઈ વારસા પર ભાર મૂકતા કહ્યું કે, દેશનો સમુદ્ર સાથેનો સંબંધ ખૂબ જ જૂના સમયથી છે. તેમણે આઠ દાયકાથી વધુ સમયથી દેશની દરિયાઈ અને સંરક્ષણ જરૂરિયાતોમાં તેના યોગદાનની પ્રશંસા કરી.

ફ્લીટ સપોર્ટ શિપ પ્રોગ્રામ વિશે રક્ષા મંત્રીએ જણાવ્યું કે, આ જહાજો હિંદ મહાસાગર ક્ષેત્રમાં નૌકાદળની પહોંચ, તાકાત અને ઓપરેશનલ અસરને મજબૂત કરશે. તેમણે કહ્યું કે દૂરના દરિયાઈ વિસ્તારોમાં લાંબા સમય સુધી કામ કરતી નેવીને માત્ર યુદ્ધ જહાજો જ નહીં, પરંતુ લોજિસ્ટિક્સ, મેન્ટેનન્સ, સતત સપોર્ટ અને ઓપરેશનલ તાકાત પણ જોઈએ છે. ફ્લીટ સપોર્ટ શિપ્સ સમુદ્રમાં સામાન ભરીને અને નેવીના ઓપરેશન્સને સતત સપોર્ટ આપીને આ જરૂરી ક્ષમતા પૂરી પાડે છે. રક્ષા મંત્રીએ શિપ ‘સૂર્યા’ના લોન્ચને નેવીની ઓપરેશનલ પહોંચ અને તાકાતને મજબૂત કરવાની દિશામાં એક મહત્વપૂર્ણ પગલું ગણાવ્યું, જ્યારે એફએસએસ-5 ની કીલ લેઇંગ ભારતના દરિયાઈ ભવિષ્ય માટે એક વધુ મજબૂત પાયો છે.

તેમણે જણાવ્યું કે, છેલ્લા એક દાયકામાં ભારતના ડિફેન્સ મેન્યુફેક્ચરિંગ ઇકોસિસ્ટમમાં મોટો બદલાવ આવ્યો છે, જેમાં એડવાન્સ્ડ સિસ્ટમ્સ અને પ્લેટફોર્મ્સના ઘરેલું ડિઝાઇન અને મેન્યુફેક્ચરિંગ પર વધુ ધ્યાન આપવામાં આવી રહ્યું છે. તેમણે સમયસર ડિલિવરી, પ્રોડક્ટિવિટી, સ્વદેશી ડિઝાઇન ક્ષમતા, સપ્લાય ચેઇનમાં લવચીકતા, કુશળ માનવબળ, ક્ષમતા અને ખર્ચ સ્પર્ધાત્મકતા ને એવા ખાસ ક્ષેત્રો તરીકે ઓળખાવ્યા જે ભારતની શિપબિલ્ડિંગ ક્ષમતાને ગ્લોબલ સ્પર્ધાત્મકતામાં બદલવાની ક્ષમતા નક્કી કરશે.

આ કાર્યક્રમમાં નૌકાદળના વડા એડમિરલ કૃષ્ણ સ્વામીનાથન, આંધ્ર પ્રદેશના માર્ગ, મકાન, ઇન્ફ્રાસ્ટ્રક્ચર અને વિકાસ મંત્રી જનાર્દન રેડ્ડી, વિશાખાપટ્ટનમના સાંસદ શ્રીભારત મથુકુમિલ્લી, રક્ષા ઉત્પાદન સચિવ સંજીવ કુમાર, પૂર્વીય નૌકાદળ કમાન્ડના ફ્લેગ ઓફિસર કમાન્ડિંગ-ઇન-ચીફ વાઇસ એડમિરલ સંજય ભલ્લા, પૂર્વીય સમુદ્રતટના તટરક્ષક કમાન્ડર એડિશનલ ડાયરેક્ટર જનરલ ડોની માઇકલ, હિન્દુસ્તાન શિપયાર્ડ લિમિટેડના ચેરમેન અને મેનેજિંગ ડિરેક્ટર રીઅર એડમિરલ સી રઘુરામ (નિવૃત્ત) અને ભારતીય નૌકાદળ તથા રક્ષા મંત્રાલયના વરિષ્ઠ અધિકારીઓ ઉપસ્થિત રહ્યા.

હિન્દુસ્થાન સમાચાર / સુનીત નિગમ / પવન કુમાર

હિન્દુસ્થાન સમાચાર / ડો.હિતેશ એન.વ્યાસ