નવી દિલ્હી, 01 નવેમ્બર (હિ.સ.). ઉપરાષ્ટ્રપતિ સી.પી. રાધાકૃષ્ણને રવિવારે નવી દિલ્હીના તાલકટોરા સ્ટેડિયમમાં રાષ્ટ્રીય અંગ પ્રત્યારોપણ રમતો 2026નું ઉદ્ઘાટન કર્યું. આ આયોજન દેશભરમાંથી પ્રત્યારોપણ પ્રાપ્તકર્તાઓ, દાતાઓ, આરોગ્ય વ્યાવસાયિકો, પરિવારો અને હિતધારકોને એકસાથે લાવે છે.

આ દરમિયાન, ઉપરાષ્ટ્રપતિ એ દિવંગત અંગદાતાઓને શ્રદ્ધાંજલિ અર્પણ કરી અને તેમના પરિવારજનો પ્રત્યે ઊંડી સંવેદના વ્યક્ત કરી. તેમણે કહ્યું કે, તેમના નિઃસ્વાર્થ નિર્ણયથી જ અન્ય લોકોને જીવન જીવવાની બીજી તક મળે છે. તેમણે આ રમતોને હિંમત, દ્રઢ સંકલ્પ, કરુણા અને જીવનની અમૂલ્ય ભેટનો ઉત્સવ ગણાવ્યો.

આ પ્રસંગે કેન્દ્રીય સ્વાસ્થ્ય અને પરિવાર કલ્યાણ રાજ્ય મંત્રી પ્રતાપરાવ જાધવ, લોકસભા સાંસદ બંસુરી સ્વરાજ અને અન્ય મહાનુભાવો ઉપસ્થિત રહ્યા હતા. કાર્યક્રમ દરમિયાન, ઉપરાષ્ટ્રપતિ એ ‘જિંદગી દોબારા’ કેલેન્ડરનું વિમોચન કર્યું અને જર્મનીના ડ્રેસડેનમાં આયોજિત વિશ્વ અંગ પ્રત્યારોપણ રમતો 2025ના પદક વિજેતાઓને સન્માનિત કર્યા.

ઉપરાષ્ટ્રપતિ 570 અંગ પ્રત્યારોપણ પ્રાપ્તકર્તાઓ અને દાતાઓના એકસાથે તાડાસન કરવાના વિશ્વ રેકોર્ડ પ્રયાસના સાક્ષી બન્યા. સફળ પ્રયાસ બાદ આયોજકોને વિશ્વ અભિલેખ પુસ્તિકા, નવી દિલ્હી તરફથી પ્રમાણપત્ર પ્રદાન કરવામાં આવ્યું. ઉપરાષ્ટ્રપતિ એ સૌની સાથે અંગદાનની શપથ લીધી અને કબડ્ડી, ટેબલ ટેનિસ અને બેડમિન્ટનના પ્રદર્શન મેચો નિહાળ્યા.

નોંધનીય છે કે, રાષ્ટ્રીય પ્રત્યારોપણ રમતો 2026નું આજથી દિલ્હીના તાલકટોરા ઇન્ડોર સ્ટેડિયમમાં આયોજન કરવામાં આવી રહ્યું છે. રીનલ કેર ફાઉન્ડેશન, સર ગંગારામ હોસ્પિટલ અને નોટ્ટો દ્વારા આયોજિત આ રમત મહોત્સવમાં 570 અંગ પ્રાપ્તકર્તા ખેલાડીઓ ભાગ લઈ રહ્યા છે. તેનો ઉદ્દેશ્ય અંગદાન પ્રત્યે જાગૃતિ વધારવાનો અને ‘જિંદગી દોબારા’ની ઉજવણી કરવાનો છે.

હિન્દુસ્થાન સમાચાર / અનૂપ શર્મા / સંજીવ પાશ

હિન્દુસ્થાન સમાચાર / માધવી વ્યાસ