વેલિંગ્ટન, નવી દિલ્હી, 12 નવેમ્બર (હિ.સ.). ભારતમાં સામેની ચોથી અને પાંચમી વનડે મેચ માટે ન્યૂઝીલેન્ડે પોતાની ટીમમાં ફેરફાર કર્યો છે. ન્યૂઝીલેન્ડ ક્રિકેટે ગુરુવારે 31 વર્ષીય ઝડપી બોલર બ્રેટ રૈન્ડેલને પહેલીવાર રાષ્ટ્રીય ટીમમાં સામેલ કરવાની જાહેરાત કરી છે. આ ઉપરાંત જોશ ક્લાર્કસનને પણ સિરીઝની પાંચમી અને અંતિમ વનડે માટે ટીમમાં પરત બોલાવવામાં આવ્યા છે.

અંતરરાષ્ટ્રીય ક્રિકેટમાં અત્યાર સુધી પદાર્પણ નહીં કરનાર રૈન્ડેલ તાજેતરમાં ડર્બીશાયર તરફથી કાઉન્ટી ચેમ્પિયનશિપ રમીને પરત ફર્યા છે. તેમની પાસેથી આ સિરીઝમાં ન્યૂઝીલેન્ડ માટે અંતરરાષ્ટ્રીય પદાર્પણ કરવાની અપેક્ષા છે.

જ્યારે, ક્લાર્કસન ન્યૂઝીલેન્ડ માટે અત્યાર સુધી છ વનડે મેચ રમી ચૂક્યા છે. તેમણે છેલ્લીવાર આ વર્ષે એપ્રિલમાં બાંગ્લાદેશ સામે રાષ્ટ્રીય ટીમનું પ્રતિનિધિત્વ કર્યું હતું.

આ બંને ખેલાડીઓને ટીમમાં સામેલ કરવાનો નિર્ણય ઈજાઓની સમસ્યા, ખાસ કરીને ઝડપી બોલિંગ વિભાગમાં ખેલાડીઓ ઈજાગ્રસ્ત થવાને કારણે લેવામાં આવ્યો છે.

ન્યૂઝીલેન્ડના મુખ્ય કોચ રોબ વાલ્ટરે જણાવ્યું કે, “જ્યારે કોઈ ખેલાડીને પહેલીવાર અંતરરાષ્ટ્રીય ટીમમાં સ્થાન મળે છે, ત્યારે તે હંમેશાં ખાસ અવસર હોય છે. અમે બ્રેટ માટે ખૂબ ખુશ છીએ. તેઓ છેલ્લા કેટલાક સમયથી ડોમેસ્ટિક ક્રિકેટમાં સતત સારું પ્રદર્શન કરી રહ્યા છે અને તેમણે આ તક મેળવી છે.”

તેમણે કહ્યું, “સમગ્ર સિરીઝ દરમિયાન ટીમમાં કેટલાક ફેરફાર થયા છે. આ સ્થિતિમાં અમે નસીબદાર છીએ કે બ્રેટ અને જોશને ટીમમાં સામેલ કરી શક્યા. આ સપ્તાહના અંતે હવામાન સારું રહેવાની અપેક્ષા છે. અમને આશા છે કે સિરીઝનો અંત શાનદાર અંદાજમાં થશે.”

ચોથી અને પાંચમી વનડે માટે નોર્ધર્ન ડિસ્ટ્રિક્ટ્સના પાથવે કોચ મિચ રેનવિક અને સ્ટ્રેન્થ એન્ડ કન્ડિશનિંગ કોચ કોરી માઈલ્સ પણ રોબ વાલ્ટર અને માર્ટિન ગુપ્ટિલ સાથે ટીમ સાથે જોડાઈ ગયા છે. જ્યારે, બોલિંગ કોચ જેકોબ ઓરમ, બેટિંગ કોચ લ્યુક રોન્ચી અને સ્ટ્રેન્થ એન્ડ કન્ડિશનિંગ કોચ ક્રિસ ડોનાલ્ડસન ટેસ્ટ મેચોની તૈયારી માટે વેલિંગ્ટન રવાના થઈ ગયા છે.

ચોથી વનડે માટે ન્યૂઝીલેન્ડની ટીમ: મિશેલ સેન્ટનર (કેપ્ટન), ફિન એલન, માઈકલ બ્રેસવેલ, ક્રિસ્ટીયન ક્લાર્ક, જેકોબ ડફી, મેટ ફિશર, ડીન ફોક્સક્રૉફ્ટ, મિચ હે (વિકેટકીપર), મેટ હેન્રી, કાઇલ જેમીસન, નિક કેલી, બ્રેટ રૈન્ડેલ, ટિમ સીફર્ટ (વિકેટકીપર) અને વિલ યંગ.

પાંચમી વનડે માટે ન્યૂઝીલેન્ડની ટીમ: મિશેલ સેન્ટનર (કેપ્ટન), ફિન એલન, માઈકલ બ્રેસવેલ, ક્રિસ્ટીયન ક્લાર્ક, જોશ ક્લાર્કસન, જેકોબ ડફી, મેટ ફિશર, ડીન ફોક્સક્રૉફ્ટ, મિચ હે (વિકેટકીપર), નિક કેલી, બ્રેટ રૈન્ડેલ, ટિમ સીફર્ટ (વિકેટકીપર), બ્લેયર ટિકનર અને વિલ યંગ.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ