ઈન્દોર, નવી દિલ્હી,02 નવેમ્બર (હિ.સ.) મધ્યપ્રદેશના ઈન્દોરમાં 15 નવેમ્બરના રોજ યોજાનાર જાણીતા પંજાબી સિંગર દિલજીત દોસાંઝના કોન્સર્ટને, બોમ્બથી ઉડાવી દેવાની ધમકી મળી છે. આતંકવાદી સંગઠનના નામથી આવેલા એક ધમકીભર્યા ઈ-મેલમાં કોન્સર્ટ દરમિયાન, આઈઈડીથી વિસ્ફોટ કરવાની ચેતવણી આપવામાં આવી છે.

આ ધમકીભર્યો ઈ-મેલ, સોમવારે ઈન્દોરના મેયર પુષ્યમિત્ર ભાર્ગવની ઓફિસ અને ત્રણ શાળાઓને મોકલવામાં આવ્યો છે. આ ઈ-મેલ 'ખાલિસ્તાની નેશનલ આર્મી'ના નામથી મોકલવામાં આવ્યો છે. ઈ-મેલ મોકલનારાઓમાં પોતાને એન્જિનિયર ગુરનાખ સિંહ, રૂખન શાહવાલા, ડો. ગુરનિરવેર સિંહ અને બબ્બર ખાલસા (પરમાર-કનાડ)ના પ્રોફેસર ગુરકાલ સિંહ પીએચડી તરીકે ઓળખાવનારાઓના નામ લખેલા છે. ઈ-મેલમાં ઈન્દોર શો દરમિયાન આઈઈડી બ્લાસ્ટ કરવાની વાત કહેવામાં આવી છે.

ઈન્દોર ક્રાઈમ બ્રાન્ચના એડીસીપી રાજેશ દંડોતિયાએ જણાવ્યું કે, ઈન્દોરની ત્રણ શાળાઓને ધમકીભર્યા ઈ-મેલ મળ્યા છે. જેમાં ચેતવણી આપવામાં આવી છે કે 15 નવેમ્બરના રોજ યોજાનાર દિલજીત દોસાંઝના કાર્યક્રમમાં પોતાના બાળકોને ન મોકલો, કારણ કે ત્યાં બોમ્બ વિસ્ફોટ કરવામાં આવશે. જોકે, દંડોતિયાએ સાવચેતીના ભાગરૂપે શાળાઓના નામ જણાવવાનો ઇનકાર કર્યો છે. તેમણે કહ્યું કે, ઈ-મેલની ટેકનિકલ તપાસ કરવામાં આવી રહી છે.

હિન્દુસ્થાન સમાચાર / મુકેશ તોમર / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ