- ભ્રષ્ટાચાર મુક્ત, સમર્થ અને આત્મનિર્ભર ભારતના નિર્માણમાં યોગદાન આપવા આહ્વાન

ગાંધીનગર,03 નવેમ્બર (હિ.સ.) સતર્કતા જાગરૂકતા સપ્તાહની ઉજવણીના ભાગરૂપે ગાંધીનગર સ્થિત ગુજરાત લોકભવન ખાતે રાજ્યપાલ આચાર્ય દેવવ્રતએ લોકભવનના અધિકારીઓ અને કર્મચારીઓને વહીવટી કાર્યશૈલીમાં સત્યનિષ્ઠા, ઈમાનદારી અને કર્તવ્યપરાયણતા જાળવી રાખવાના શપથ લેવડાવ્યા હતા.

રાજ્યપાલએ જણાવ્યું હતું કે સરકારી વહીવટી વ્યવસ્થામાં પારદર્શિતા, નૈતિક મૂલ્યો અને સત્યનિષ્ઠા જ સામાન્ય જનતાના વિશ્વાસને વધુ મજબૂત બનાવે છે.

શપથ ગ્રહણ દરમિયાન લોકભવન પરિવારના દરેક સભ્યએ પોતાની દૈનિક કામગીરીમાં સંપૂર્ણ ઈમાનદારી, નિષ્પક્ષતા અને પારદર્શિતા જાળવવાનો પુનઃસંકલ્પ લીધો હતો.

આ તકે જીવનના દરેક ક્ષેત્રમાંથી ભ્રષ્ટાચારને જડમૂળથી નાબૂદ કરવા, નિરંતર સતર્ક રહેવા તેમજ કોઈપણ પ્રકારના ભય કે, પક્ષપાત વિના રાષ્ટ્ર સેવાના ભાવ સાથે પોતાના કર્તવ્યોનું પાલન કરવાની પ્રતિજ્ઞા લેવામાં આવી હતી.

ઉપસ્થિત સૌએ પોતાના દૈનિક જીવનમાં નૈતિકતા, સત્યનિષ્ઠા અને પારદર્શિતાના સિદ્ધાંતોને અપનાવીને એક ભ્રષ્ટાચાર-મુક્ત, સમર્થ અને આત્મનિર્ભર ભારતના નિર્માણમાં સક્રિય યોગદાન આપવા સંકલ્પ કર્યો હતો.

હિન્દુસ્થાન સમાચાર / હર્ષ શાહ