ગૌહાટી (અસમ), નવી દિલ્હી, 04 નવેમ્બર (હિ.સ.). ગૌહાટીની હોટેલ 'વિલાસ ઇન'માં છેલ્લા દિવસોમાં પાંચ લોકોની ગોળી મારીને હત્યા કરવાના આરોપી ઘનકાંત ગોગોઈને આજે વહેલી સવારે લગભગ 3:10 વાગ્યે પોલીસે પિસ્તોલ છીનવીને કસ્ટડીમાંથી ભાગવાનો પ્રયાસ કરતા ઠાર માર્યો.

સાત દિવસની પોલીસ રિમાન્ડ પૂરી થયા પછી, પોલીસે મંગળવારે ઘનકાંતને કામરૂપ મહાનગર જિલ્લાના મુખ્ય ન્યાયિક દંડાધિકારી (સીજેએમ)ની અદાલતમાં રજૂ કર્યો. અદાલતે તેને ન્યાયિક કસ્ટડીમાં જેલમાં મોકલવાનો આદેશ આપ્યો. શિવસાગર પોલીસ ઘનકાંત ગોગોઈને લઈને ગુવાહાટી કેન્દ્રીય કારાગારથી શિવસાગર રવાના થઈ.

જણાવવામાં આવ્યું છે કે, રસ્તામાં આજે વહેલી સવારે લગભગ 3.10 વાગ્યે ફૂલપાની સિગાર રંગમન ઢાબા પાસે પોલીસ ટીમ પર હુમલો કરીને ઘનકાંતે એક પોલીસકર્મીની પિસ્તોલ છીનવીને ફરાર થવાનો પ્રયાસ કર્યો. પ્રાથમિક માહિતી અનુસાર, ઘનકાંતના હુમલામાં શિવસાગર શહેરના સબ ઇન્સ્પેક્ટર દેવાશીષ શર્મા ઘાયલ થયા. જવાબી કાર્યવાહીમાં ઘનકાંત ગોગોઈ ઘટનાસ્થળે જ ઠાર થયો.

26 ઓક્ટોબર, 2026ની રાત્રે લગભગ 9 વાગ્યે હોટેલ વિલાસ ઇનમાં ગોળીબારની ઘટના બની હતી. આ ઘટના પછી પોલીસે રાત્રે લગભગ 10 વાગ્યે આરોપી ઘનકાંતની ધરપકડ કરી હતી. આ ગોળીબારમાં ભૂદેવ ભરાલી (65), હેલેના ભરાલી (58), દેવર્ષિ કશ્યપ (39), રિનિકી કશ્યપ (30) અને નારાયણ દાસ (48)નું મૃત્યુ થયું હતું.

આમાં ભૂદેવ ભરાલી અને નારાયણ દાસનું ઘર બરપેટામાં છે. જ્યારે, હેલેના ભરાલી, દેવર્ષિ કશ્યપ અને રિનિકા કશ્યપ હાલમાં ગુવાહાટીના નવીન નગરના નિવાસી હતા, જોકે, તેઓ પણ મૂળભૂત રીતે બરપેટાના જ રહેવાસી હતા. ગોળીબારમાં ઘાયલ થયેલા સત્યેન્દ્ર પાઠક (43) બરપેટાના રહેવાસી છે. તેમની હાલમાં ગુવાહાટી ચિકિત્સા મહાવિદ્યાલય હોસ્પિટલ (જીએમસીએચ)માં સારવાર ચાલી રહી છે.

હિન્દુસ્થાન સમાચાર / અરવિન્દ રાય / મુકુંદ

હિન્દુસ્થાન સમાચાર / ડો.હિતેશ એન.વ્યાસ