જામનગર, 05 નવેમ્બર (હિ.સ.) : જામનગર જિલ્લા કલેક્ટર અને જિલ્લા મેજિસ્ટ્રેટ કચેરીની મહેકમ શાખા દ્વારા વહીવટી સરળતા અને જાહેર હિતને ધ્યાનમાં રાખીને વર્ગ-૩ના ૨૯ સર્વેયર કર્મચારીઓની આંતરિક બદલીઓ કરવામાં આવી છે. આ મહત્વપૂર્ણ નિર્ણયથી જિલ્લાના વિવિધ તાલુકાઓ અને કચેરીઓમાં સરકારી કામગીરી વધુ ઝડપી અને સુચારુ બનશે તેવી અપેક્ષા છે. પ્રશાસનિક સ્તરે લેવાયેલા આ પગલાથી લાંબા સમયથી એક જ જગ્યાએ ફરજ બજાવતા કર્મચારીઓની બદલી થતાં કામગીરીમાં નવો ઉત્સાહ જોવા મળશે.

બદલી પામેલા કર્મચારીઓમાં જામનગર શહેરથી કાલાવડ, જોડિયા, જામનગર ગ્રામ્ય, જામજોધપુર, સુપ્રિટેન્ડેન્ટ લેન્ડ રેકર્ડ કચેરી તથા લાલપુર ખાતે વિવિધ કર્મચારીઓની નિયુક્તિ કરાઈ છે. જેમાં રાકેશકુમાર રામજીભાઈ સોલંકી અને વિશેષકુમાર હેમતભાઈ ચાંદ્રાને કાલાવડ ખાતે મોકલવામાં આવ્યા છે. આ ઉપરાંત નિધિ ધમસાણીયા અને સુધિરભાઈ રાવલને જામનગર ગ્રામ્ય ખાતે, ગૌતમકુમાર નાનજીભાઈ મકવાણા અને હાર્દિક સેવાભાઈ રાવલીયાને જામજોધપુર ખાતે જવાબદારી સોંપવામાં આવી છે.

વધુમાં, સુપ્રિટેન્ડેન્ટ લેન્ડ રેકર્ડ કચેરી જામનગર ખાતે હર્ષિદાબેન હિંમતભાઈ કણઝરીયાની બદલી કરાઈ છે, જ્યારે લાલપુર ખાતે કૃપા નિતીનભાઈ શુક્લ અને રાકેશ જગાભાઈ બેરાને નિયુક્ત કરવામાં આવ્યા છે. જામનગર ગ્રામ્યમાંથી જયદીપ રમેશભાઈ કબાવતને જામજોધપુર તથા અન્ય કર્મચારીઓને સુપ્રિટેન્ડેન્ટ લેન્ડ રેકર્ડ કચેરી અને લાલપુર ખાતે મોકલવામાં આવ્યા છે. પ્રશાસન દ્વારા દરેક તાલુકાની જરૂરિયાત મુજબ કર્મચારીઓનું યોગ્ય આયોજન કરવામાં આવ્યું છે.

કાલાવડથી જામનગર શહેર ખાતે ધાર્મિક મનસુખભાઈ લુણાગરીયા અને કર્મદિપસિંહ નરેન્દ્રસિંહ રાણાને ખસેડવામાં આવ્યા છે. સાથે જ સુપ્રિટેન્ડેન્ટ લેન્ડ રેકર્ડ કચેરી અને જામજોધપુર ખાતે પણ નિયમોનુસાર અન્ય સ્ટાફની બદલીઓ કરવામાં આવી છે. આ ફેરફારોથી કચેરીઓની કામગીરીમાં કોઈ પ્રકારનો વહીવટી અવરોધ ન આવે તેનું ખાસ ધ્યાન રાખવામાં આવ્યું છે.

જ્યારે સુપ્રિટેન્ડેન્ટ લેન્ડ રેકર્ડ કચેરી જામનગરથી નરેશભાઈ વેજાભાઈ આંબલીયાને કાલાવડ અને પ્રકાશ ગોવિંદભાઈ રાઠોડને લાલપુર મોકલવામાં આવ્યા છે. લાલપુરથી જામનગર શહેર ખાતે માનસી હર્ષદભાઈ ઉપાધ્યાય, દિનેશ મેરૂભાઈ માડમ અને કવિતા ભીમાભાઈ પીઠીયાની બદલી થઈ છે. સુપ્રિટેન્ડેન્ટ લેન્ડ રેકર્ડ કચેરી ખાતે જયદીપ પ્રવિણભાઈ ટાંક તેમજ સુરભિ જીતેન્દ્રભાઈ પરમાર અને અનિલભાઈ પરમારને જામનગર ગ્રામ્ય ખાતે સ્થાનાંતરિત કરાયા છે.

અન્ય વિસ્તારોમાંથી પણ કેટલાક કર્મચારીઓની બદલી કરાઈ છે, જેમાં જોડિયાથી જામનગર શહેર અને કાલાવડ ખાતે તેમજ ધનજીભાઈની જામજોધપુરથી જામનગર ગ્રામ્ય ખાતે નિમણૂક કરવામાં આવી છે. કલેક્ટર કચેરી દ્વારા આ તમામ સંબંધિત કર્મચારીઓને તાત્કાલિક અસરથી વર્તમાન જગ્યાએથી છૂટા થઈને પોતાની નવી નિયુક્તિવાળી જગ્યા પર હાજર થવા માટે સખત સૂચના આપવામાં આવી છે.

---------------

હિન્દુસ્થાન સમાચાર / Dhaval Nilesh bhai bhatt