અમરેલી, 01 માર્ચ (હિ.સ.) : સાવરકુંડલા શહેરના વ્યાયામ મંદિર ખાતે સિનિયર સિટીઝનો માટે વિશેષ સ્પર્ધાનું આયોજન કરવામાં આવ્યું હતું, જેમાં 150થી વધુ ભાઈઓ અને બહેનો ઉત્સાહપૂર્વક જોડાયા હતા. કાર્યક્રમમાં સંતો, સામાજિક આગેવાનો તેમજ રાજકીય અગ્રણીઓની પણ હાજરી રહી, જેના કારણે સમગ્ર કાર્યક્રમને વિશેષ ગૌરવ મળ્યું હતું.
આ સ્પર્ધાનો મુખ્ય હેતુ વરિષ્ઠ નાગરિકોમાં આરોગ્ય જાગૃતિ, તંદુરસ્તી અને સામાજિક સક્રિયતા વધારવાનો હતો. વિવિધ રમતો, યોગ, હળવી કસરત અને મનોરંજક પ્રવૃત્તિઓ દ્વારા સિનિયર સિટીઝનોમાં નવચેતના અને આનંદનો માહોલ સર્જાયો હતો. વડીલોએ પોતાની ઉંમરને પાછળ મૂકી ઉત્સાહપૂર્વક ભાગ લીધો અને ઉમંગભેર કાર્યક્રમને સફળ બનાવ્યો.
કાર્યક્રમ દરમિયાન આયોજક મંડળ દ્વારા ભાગ લેનાર તમામ વરિષ્ઠ નાગરિકોને પ્રોત્સાહન આપવામાં આવ્યું અને શ્રેષ્ઠ પ્રદર્શન કરનાર સ્પર્ધકોને સન્માનિત કરવામાં આવ્યા. આગેવાનો દ્વારા વડીલોનું માર્ગદર્શન અને સન્માન કરવામાં આવ્યું હતું.
આવા કાર્યક્રમો સમાજમાં વડીલોને સક્રિય અને ખુશ રાખવામાં મહત્વપૂર્ણ સાબિત થાય છે. સમગ્ર કાર્યક્રમ આનંદમય અને પ્રેરણાદાયી વાતાવરણ વચ્ચે સફળતાપૂર્વક પૂર્ણ થયો હતો.
---------------
હિન્દુસ્થાન સમાચાર / Gondaliya Abhishek Nandrambhai
