ચંદીગઢ, નવી દિલ્હી, 25 માર્ચ (હિ.સ): પંજાબ પોલીસે, મધ્યપ્રદેશથી આમ આદમી પાર્ટી (આપ) ના સુનૌર મતવિસ્તારના ધારાસભ્ય હરમીત સિંહ પઠાણમાજરાની ધરપકડ કરી છે, જેમને બળાત્કાર અને અન્ય આરોપોનો સામનો કરવો પડી રહ્યો છે. પઠાણમાજરા ઘણા મહિનાઓથી ફરાર હતા. 1 સપ્ટેમ્બર, 2025 ના રોજ, પંજાબના પટિયાલાના સિવિલ લાઇન્સ પોલીસ સ્ટેશનમાં એક મહિલા દ્વારા તેમના વિરુદ્ધ બળાત્કાર, છેતરપિંડી અને અન્ય આરોપોનો કેસ દાખલ કરવામાં આવ્યો હતો.

મહિલાએ આરોપ લગાવ્યો હતો કે, 2013-2014 થી 2024 સુધી (ખાસ કરીને, 12 ફેબ્રુઆરી, 2014 થી 12 જૂન, 2024 સુધી), પઠાણમાજરાએ લગ્નના ખોટા બહાના હેઠળ અને છૂટાછેડા લીધેલા હોવાનો ખોટો દાવો કરીને તેની સાથે જાતીય સંબંધો બાંધ્યા હતા. 2021 માં, તેમના લગ્ન લુધિયાણાના એક ગુરુદ્વારામાં થયા હતા, પરંતુ પઠાણમાજરા પહેલાથી જ પરિણીત હતા.

ત્યારબાદ 2 સપ્ટેમ્બરના રોજ, હરિયાણાના કરનાલમાં પઠાણમાજરાની ધરપકડ કરવામાં આવી હતી, પરંતુ ગોળીબાર અને પથ્થરમારા વચ્ચે તે પોલીસ કસ્ટડીમાંથી ભાગી ગયો હતો. આ ઘટનામાં એક પોલીસકર્મી ઘાયલ થયો હતો. ત્યારબાદ કેસ કોર્ટમાં પહોંચ્યો હતો.

ડિસેમ્બર 2025 માં, પટિયાલા કોર્ટે તેને ભાગેડુ જાહેર કર્યો હતો. ત્યારબાદ સમાચાર આવ્યા કે, તે ઓસ્ટ્રેલિયા ભાગી ગયો છે અને ત્યાંથી ઇન્ટરવ્યુ આપી રહ્યો છે. ત્યારબાદ કોર્ટે લુકઆઉટ નોટિસ જારી કરી હતી.

પટિયાલા એસએસપી વરુણ શર્માએ જણાવ્યું હતું કે, મધ્યપ્રદેશના ગ્વાલિયર નજીક શિવપુરી જિલ્લામાં મંગળવારે મોડી રાત્રે તેની ધરપકડ કરવામાં આવી હતી. આરોપી ધારાસભ્યના ત્રણ સહયોગીઓની પણ ધરપકડ કરવામાં આવી હતી. આરોપીને પટિયાલા લાવવામાં આવ્યો છે.

હિન્દુસ્થાન સમાચાર / સંજીવ શર્મા / મુકુંદ

હિન્દુસ્થાન સમાચાર / માધવી વ્યાસ