કુવૈત શહેર, 30 માર્ચ (હિ.સ.) : ઈરાની હુમલાથી કુવૈતના પાવર અને વોટર ડિસેલિનેશન પ્લાન્ટને નુકસાન થયું છે. કુવૈતના અધિકારીઓનું કહેવું છે કે હુમલામાં એક ભારતીય કર્મચારીનું મોત થયું છે અને ઇમારતને ભૌતિક નુકસાન થયું છે. આ હુમલો એવા સમયે થયો છે જ્યારે યુદ્ધને કારણે પ્રાદેશિક તણાવ વધી રહ્યો છે.

અલ જઝીરા અને સીબીએસ ન્યૂઝના અહેવાલો અનુસાર, કુવૈતના વીજળી મંત્રાલયે સોમવારે એક નિવેદનમાં જણાવ્યું હતું કે, ઈરાને દેશમાં પાવર અને વોટર ડિસેલિનેશન પ્લાન્ટ પર સ્થિત એક સર્વિસ બિલ્ડિંગ પર હુમલો કર્યો હતો.

આ હુમલામાં એક ભારતીય કર્મચારીનું મોત થયું હતું અને ઇમારતને નોંધપાત્ર ભૌતિક નુકસાન થયું હતું.

નિવેદન અનુસાર, હુમલા પછીની પરિસ્થિતિનો સામનો કરવા અને સામાન્ય કામગીરી સુનિશ્ચિત કરવા માટે તાત્કાલિક તકનીકી અને કટોકટી પ્રતિભાવ ટીમો મોકલવામાં આવી હતી. ઈરાને હજુ સુધી હુમલા અંગે કોઈ સત્તાવાર ટિપ્પણી જારી કરી નથી. રાજ્ય મીડિયાએ કુવૈત મંત્રાલયને ટાંકીને કહ્યું કે હુમલાથી પ્લાન્ટને નોંધપાત્ર નુકસાન થયું છે. કુવૈતના સંરક્ષણ મંત્રાલયે ગઈકાલે સાંજે જણાવ્યું હતું કે કુવૈતી હવાઈ ક્ષેત્રમાં 14 મિસાઇલો અને 12 ડ્રોન જોવા મળ્યા હતા. આમાંથી ઘણા ડ્રોન એક લશ્કરી છાવણીને નિશાન બનાવી રહ્યા હતા, જેમાં 10 સૈનિકો ઘાયલ થયા હતા. 28 ફેબ્રુઆરીથી શરૂ થયેલ અમેરિકા, ઇઝરાયલ અને ઇરાન વચ્ચેનું યુદ્ધ સમય જતાં વધુ આક્રમક બની રહ્યું છે. ઇરાની સત્તાવાર મીડિયા અનુસાર, ઇરાનની સંસદના સ્પીકરે અમેરિકાને ભૂમિ હુમલા સામે ચેતવણી આપી છે, અને ધમકી આપી છે કે જો ઇરાન પર ભૂમિ હુમલો થશે તો અમેરિકી સાથી દેશો પર હુમલા વધુ તીવ્ર બનાવશે.

ઇઝરાયલી વડા પ્રધાન બેન્જામિન નેતન્યાહૂએ રવિવારે કહ્યું હતું કે ઇઝરાયલ દક્ષિણ લેબનોનમાં તેના આક્રમણનો વિસ્તાર કરશે. ઇઝરાયલી સેના પડોશી દેશમાં હાલની સુરક્ષા પટ્ટો વિસ્તારશે. અધિકારીઓએ જણાવ્યું હતું કે અમેરિકન મૂળના ઇઝરાયલી સૈનિક સાર્જન્ટ મોશે યિત્ઝાક હાકોહેન કાત્ઝ દક્ષિણ લેબનોનમાં લડાઈ દરમિયાન માર્યા ગયા હતા.

ડિસેલિનેશન પ્લાન્ટનો ઉપયોગ: દરિયાઈ પાણીમાંથી મીઠું અને અન્ય ખનિજો દૂર કરીને તેને પીવાલાયક બનાવવામાં આવે છે. તેનો ઔદ્યોગિક રીતે પણ ઉપયોગ થાય છે. આ પ્લાન્ટ્સને ઘણીવાર પાવર પ્લાન્ટ સાથે જોડવામાં આવે છે, કારણ કે ડિસેલિનેશન એ ઊર્જા-સઘન પ્રક્રિયા છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / હર્ષ શાહ