નવી દિલ્હી, 4 માર્ચ (હિ.સ.): રંગોનો પવિત્ર તહેવાર હોળી, આજે દેશભરમાં ખૂબ જ ઉત્સાહથી ઉજવવામાં આવી રહ્યો છે. આ પ્રસંગે રાષ્ટ્રપતિ દ્રૌપદી મુર્મુ, ઉપરાષ્ટ્રપતિ સીપી રાધાકૃષ્ણન અને વડા પ્રધાન નરેન્દ્ર મોદીએ, વિવિધ રાજકીય નેતાઓ સાથે મળીને રાષ્ટ્રને શુભેચ્છા પાઠવી અને પરસ્પર ભાઈચારો અને વિકસિત ભારત માટે સંકલ્પનો સંદેશ આપ્યો.

બુધવારે પોતાના સંદેશમાં રાષ્ટ્રપતિ દ્રૌપદી મુર્મુએ કહ્યું, રંગોનો તહેવાર લોકોના જીવનમાં પ્રેમ અને આશાનો સંચાર કરે છે અને એકતા અને ભાઈચારાને મજબૂત બનાવે છે. હું ઈચ્છું છું કે આપણે બધા સાથે મળીને વિકસિત રાષ્ટ્રના નિર્માણમાં યોગદાન આપીએ.

ઉપરાષ્ટ્રપતિ સીપી રાધાકૃષ્ણને હોળીને અનિષ્ટ પર સારાના વિજયનું પ્રતીક ગણાવતા કહ્યું કે, આ તહેવાર આપણી સભ્યતાની જીવંત ભાવનાને પ્રતિબિંબિત કરે છે. તેમણે દરેકને સમાવિષ્ટ, શાંતિપૂર્ણ અને વિકસિત ભારત તરફ કામ કરવા હાકલ કરી.

લોકસભાના અધ્યક્ષ ઓમ બિરલાએ હોળીને સકારાત્મક વિચારસરણી અને નવી શરૂઆતનું પ્રતીક ગણાવ્યું. તેમણે જરૂરિયાતમંદ લોકો સુધી આ તહેવારનો આનંદ ફેલાવવાની અપીલ કરી.

પ્રધાનમંત્રી નરેન્દ્ર મોદીએ હોળીના મહત્વ પર ભાર મૂકતા કહ્યું કે, હોળીનો તહેવાર સમગ્ર વાતાવરણમાં નવી ઉર્જાનો સંચાર કરે છે. દરેક જગ્યાએ છવાયેલા ખુશીના રંગો દરેકને આનંદ અને ઉલ્લાસથી ભરી દે છે.

કેન્દ્રીય ગૃહમંત્રી અમિત શાહે શુભેચ્છા પાઠવી હતી કે, રંગોનો આ તહેવાર દરેકના જીવનમાં પ્રગતિ, સમૃદ્ધિ અને સૌભાગ્ય લાવે.

કેન્દ્રીય માર્ગ અને પરિવહન મંત્રી નીતિન ગડકરીએ નકારાત્મકતાને બાળવાનો સંદેશ આપતા કહ્યું કે, આ તહેવાર નફરતને દૂર કરે અને જીવનમાં સુખ અને શાંતિ લાવે.

કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ હોળીને ભારતીય સંસ્કૃતિનો આત્મા ગણાવતા કહ્યું કે, આ તહેવાર આપણા બહુસાંસ્કૃતિક સમાજની વિવિધતામાં એકતા અને ભાઈચારાની પરંપરા ઉજવે છે, જે સદીઓથી આપણી ઓળખ છે.

કેન્દ્રીય પ્રવાસન અને સંસ્કૃતિ મંત્રી ગજેન્દ્ર સિંહ શેખાવતે પણ તેને 'ઇન્દ્રધનુષ્ય સંસ્કૃતિ'ના સુમેળભર્યા ઉજવણી તરીકે વર્ણવ્યું અને દેશવાસીઓને ખુશીની શુભેચ્છા પાઠવી.

હિન્દુસ્થાન સમાચાર / શ્રદ્ધા દ્વિવેદી / સંજીવ પાશ

હિન્દુસ્થાન સમાચાર / માધવી વ્યાસ