ઝઘડિયામાં મકાન-દુકાન માલિકો ઉપર પોલીસની લાલ આંખ

દધેડા ગામે બે પરપ્રાંતિય ઇસમોને પોલીસ વેરીફિકેશન વગર દુકાન ભાડે આપવી ભારે પડી

નારાયણલાલ કુમાવત અને મહાવીરલાલ કુમાવત (બંને મૂળ રાજસ્થાન) ભાડેથી દુકાન ચલાવતા હતા

ભરૂચ 07 માર્ચ (હિ.સ.) નર્મદા અને ભરૂચ જિલ્લાના ઔદ્યોગિક વિસ્તારોમાં ગુનાખોરી ડામવા માટે પોલીસ તંત્ર સજ્જ બન્યું છે. ઝઘડિયા તાલુકાના દધેડા ગામે પરપ્રાંતિય ભાડુઆતની વિગતો પોલીસ મથકમાં નોંધાવ્યા વિના દુકાન ભાડે આપનાર માલિક વિરુદ્ધ ઝઘડિયા જીઆઈડીસી પોલીસે જાહેરનામા ભંગનો ગુનો દાખલ કર્યો છે.

ઝઘડિયા જીઆઈડીસી પોલીસની ટીમ પેટ્રોલિંગમાં હતી તે દરમિયાન દધેડા ગામે તપાસ કરતા જાણવા મળ્યું હતું કે નારાયણલાલ કુમાવત અને મહાવીરલાલ કુમાવત (બંને મૂળ રહેવાસી: રાજસ્થાન) દધેડા ગામે ભાડેથી દુકાન ચલાવે છે.પોલીસે તપાસ કરતા માલૂમ પડ્યું કે આ દુકાનના માલિક રાજુ જૈન (રહે. દધેડા) એ આ બંને પરપ્રાંતિય ઇસમોને દુકાન ભાડે આપી હતી.પરંતુ, જિલ્લા મેજિસ્ટ્રેટના જાહેરનામા મુજબ કોઈપણ પરપ્રાંતિય વ્યક્તિને મકાન કે દુકાન ભાડે આપતા પહેલા તેની જાણ સ્થાનિક પોલીસ મથકે કરવી અનિવાર્ય છે, જે રાજુ જૈનએ કરી નહોતી.

પોલીસની કડક કાર્યવાહી

સ્થાનિક પોલીસમાં કોઈ પણ પ્રકારની નોંધણી કરાવ્યા વિના ભાડુઆત રાખવા બદલ પોલીસે દુકાન માલિક રાજુ જૈન વિરુદ્ધ જાહેરનામા ભંગ (IPC 188) હેઠળ ગુનો નોંધી કાયદેસરની કાર્યવાહી હાથ ધરી છે. ઔદ્યોગિક વિસ્તારોમાં પરપ્રાંતિય ઇસમો દ્વારા જાહેર સલામતીને જોખમમાં મુકતી પ્રવૃત્તિઓ ન થાય તે હેતુથી પોલીસ દ્વારા અવારનવાર ચેકિંગ હાથ ધરવામાં આવે છે.

મકાન-દુકાન માલિકો માટે મહત્વની સૂચના

કોઈપણ વ્યક્તિને ભાડે રાખતા પહેલા તેનું આધારકાર્ડ અને ફોટો મેળવવો.નજીકના પોલીસ સ્ટેશનમાં 'ભાડુઆત નોંધણી ફોર્મ' ભરીને જમા કરાવવું.ઓનલાઇન પોર્ટલ દ્વારા પણ આ વિગતો સબમિટ કરી શકાય છે.ચૂક કરનાર માલિકો સામે પોલીસ દ્વારા કડક હાથે કામ લેવામાં આવશે.

---------------

હિન્દુસ્થાન સમાચાર / અતુલકુમાર પટેલ