ઈસ્લામાબાદ, નવી દિલ્હી, 12 એપ્રિલ (હિ.સ.) યુનાઇટેડ સ્ટેટ્સ ઈરાન સાથે કોઈ સમજૂતી પર પહોંચ્યું નથી, તેમ ઉપરાષ્ટ્રપતિ જે. ડી. વેન્સે આજે સવારે જણાવ્યું હતું. શનિવારે બપોરે શરૂ થયેલા ઈસ્લામાબાદ સંવાદ હેઠળ 21 કલાકની ગંભીર ચર્ચા પછી તેમણે આ વાત કહી હતી. તેઓ બંને દેશો વચ્ચે સીધી વાતચીત બાદ પત્રકાર પરિષદને સંબોધિત કરી રહ્યા હતા. વેન્સે કહ્યું, અમે છેલ્લા 21 કલાકથી શાંતિ મંત્રણા પર કામ કર્યું છે અને ગંભીર ચર્ચા કરી છે. ખરાબ સમાચાર એ છે કે અમે કોઈ સમજૂતી પર પહોંચી શક્યા નથી

પાકિસ્તાનના અંગ્રેજી દૈનિક ડોન અનુસાર ઉપરાષ્ટ્રપતિએ કહ્યું, અમે સ્પષ્ટ કરી દીધું છે કે અમારા લક્ષ્યાંકો શું છે. અમે એ પણ સ્પષ્ટ કરી દીધું છે કે અમે ઈરાન પાસેથી શું સ્વીકારવા તૈયાર છીએ. પરંતુ ઈરાની પ્રતિનિધિમંડળે અમારી શરતો સ્વીકારવાનો ઇનકાર કર્યો છે. પત્રકાર પરિષદની શરૂઆતમાં, વેન્સે પાકિસ્તાનના વડા પ્રધાન શાહબાઝ શરીફ અને ચીફ ઓફ આર્મી સ્ટાફ ફિલ્ડ માર્શલ અસીમ મુનીરની પ્રશંસા કરી હતી અને તેમને ઉત્તમ યજમાન ગણાવ્યા હતા

તેમણે એ પણ સ્પષ્ટ કર્યું કે, પાકિસ્તાને મધ્યસ્થી તરીકે સારું કામ કર્યું છે અને ખરેખર મદદ કરવાનો પ્રયાસ કર્યો છે, જેથી આપણી વચ્ચેની ખાઈને દૂર કરી શકાય અને સમજૂતી પર પહોંચી શકાય. જ્યારે વેન્સને પૂછવામાં આવ્યું કે ઈરાને શું નકારી કાઢ્યું, ત્યારે તેમણે કહ્યું, હું તમામ વિગતોમાં જઈશ નહીં, કારણ કે હું 21 કલાકની ખાનગી વાટાઘાટો પછી હવે જાહેરમાં વાત કરવા માંગતો નથી. પરંતુ એકદમ સરળ રીતે, આપણને એક દ્રઢ ખાતરીની જરૂર છે કે તેઓ પરમાણુ શસ્ત્રો બનાવવાનો પ્રયાસ કરશે નહીં, ન તો તેઓ એવા માધ્યમો પ્રાપ્ત કરવાનો પ્રયાસ કરશે કે જેના દ્વારા તેઓ ઝડપથી પરમાણુ શસ્ત્રો પ્રાપ્ત કરી શકે

દરમિયાન, ઈરાનના વિદેશ મંત્રાલયના પ્રવક્તા ઇસ્માઇલ બકાઈએ એક્સ પર લખ્યુંઃ ઇસ્લામાબાદમાં પ્રતિનિધિમંડળ માટે તે વ્યસ્ત અને લાંબો દિવસ હતો. આ દરમિયાન બંને પક્ષો વચ્ચે અનેક સંદેશાઓ અને દસ્તાવેજોની આપ-લે થઈ હતી. વાટાઘાટોમાં મુખ્ય વિષયો હોર્મુઝની સમુદ્રધુની, પરમાણુ મુદ્દો, યુદ્ધ વળતર, પ્રતિબંધો હટાવવા અને દુશ્મનાવટની સંપૂર્ણ સમાપ્તિ હતા.

હિન્દુસ્થાન સમાચાર /મુકુંદ

હિન્દુસ્થાન સમાચાર / માધવી વ્યાસ