વોશિંગ્ટન, નવી દિલ્હી, 2 એપ્રિલ (હિ.સ.). અમેરિકી રાષ્ટ્રપતિ ડોનાલ્ડ ટ્રમ્પે, અમેરિકાના હુમલાને ઈરાન અને તેના સાથીઓ દ્વારા લગભગ અડધી સદીથી ચાલી આવતી હિંસાનો બદલો ગણાવ્યો. તેમણે કહ્યું કે, ઈરાનને પરમાણુ શસ્ત્રો વિકસાવવાની મંજૂરી આપી શકાતી નથી. ટ્રમ્પે બુધવારે રાત્રે અમેરિકન મતદારો પાસેથી યુદ્ધ માટે સમર્થન મેળવવાનો પ્રયાસ કર્યો. રાષ્ટ્રને પોતાના લગભગ 20 મિનિટના સંબોધનમાં, રાષ્ટ્રપતિ ટ્રમ્પે યુએસ લશ્કરી અભિયાનની પ્રશંસા કરી અને ધીરજ રાખવાની અપીલ કરી. તેમણે યુદ્ધને અમેરિકનો માટે સુરક્ષિત ભવિષ્યમાં રોકાણ તરીકે વર્ણવ્યું. 28 ફેબ્રુઆરીથી શરૂ થયેલા યુદ્ધ દરમિયાન ઈરાન પર ધ્યાન કેન્દ્રિત કરતા રાષ્ટ્રપતિ ટ્રમ્પનું રાષ્ટ્રને આ પહેલું સંબોધન હતું.

સીએનએન ના અહેવાલ મુજબ, ટ્રમ્પે કહ્યું, મને એ જણાવતા આનંદ થાય છે કે આપણે આપણા મુખ્ય વ્યૂહાત્મક ઉદ્દેશ્યો પ્રાપ્ત કરવાની નજીક છીએ. તેમણે બોમ્બમારો કરવાના પોતાના વચનનો પુનરોચ્ચાર કરતા કહ્યું કે, આગામી બે થી ત્રણ અઠવાડિયામાં ઈરાનને પાછળ પાસાણ યુગમાં ધકેલી દઈશું. તેમણે ઈરાની પાવર પ્લાન્ટ પર હુમલો કરીને યુદ્ધને વધુ તીવ્ર બનાવવાની ધમકીનો પુનરોચ્ચાર કર્યો. તેમણે કહ્યું, ઈરાનના નવા નેતા ઓછા કટ્ટરપંથી અને વધુ સમજદાર છે. જો કોઈ સમજુતી નહીં થાય, તો અમે મુખ્ય લક્ષ્યો પર ધ્યાન કેન્દ્રિત કરીશું.

રાષ્ટ્રપતિ ડોનાલ્ડ ટ્રમ્પે કહ્યું કે, યુએસ અધિકારીઓ યુદ્ધનો અંત લાવવા માટે મધ્યસ્થી સાથે કામ કરી રહ્યા છે. વ્હાઇટ હાઉસથી સંબોધન દરમિયાન, તેમણે તેમના દાવાને પુનરાવર્તિત કર્યો કે, અમેરિકાએ શાસન પરિવર્તન પ્રાપ્ત કર્યું છે અને કહ્યું કે, બધા મૂળ નેતાઓ મૃત્યુ પામ્યા છે. ટ્રમ્પે કહ્યું, જો કોઈ સમજુતી ન થાય, તો અમે તેમના પાવર પ્લાન્ટ્સ પર એકસાથે હુમલો કરીશું.

તેમણે કહ્યું કે, અમેરિકાએ ઈરાનના તેલ સ્થાપનો પર હુમલો કર્યો નથી, ભલે તે સૌથી સરળ લક્ષ્યો હતા. રાષ્ટ્રપતિ ડોનાલ્ડ ટ્રમ્પે ઈરાન સાથેના યુદ્ધમાં અમેરિકાની સંડોવણીની તુલના આધુનિક ઇતિહાસના અન્ય સંઘર્ષો સાથે કરી. તેમણે કહ્યું, આપણે આ સંઘર્ષને પરિપ્રેક્ષ્યમાં મૂકવો ખૂબ જ મહત્વપૂર્ણ છે. તેમણે તાજેતરના યુદ્ધોમાં અમેરિકાની ભાગીદારીની લંબાઈની યાદી આપી: પ્રથમ વિશ્વયુદ્ધ: 1 વર્ષ, 7 મહિના, 5 દિવસ; બીજા વિશ્વયુદ્ધ: 3 વર્ષ, 8 મહિના, 25 દિવસ; કોરિયન યુદ્ધ: 3 વર્ષ, 1 મહિનો, 2 દિવસ; વિયેતનામ યુદ્ધ: 19 વર્ષ, 5 મહિના, 29 દિવસ; અને ઇરાક યુદ્ધ: 8 વર્ષ, 8 મહિના, 28 દિવસ.

તેમણે વિદેશમાં ક્યારેય ન સમાપ્ત થતા યુદ્ધો અને ઘરે ગેસના વધતા ભાવોથી ચિંતિત લોકોને યાદ અપાવવાનો પ્રયાસ કર્યો કે, તેઓ 32 દિવસથી સૌથી શક્તિશાળી દેશોમાંના એક ઈરાન સામેના આ લશ્કરી કાર્યવાહીમાં સામેલ છે. આ અભિયાન એટલું શક્તિશાળી અને અદભુત છે કે ઈરાન સંપૂર્ણપણે નાશ પામ્યું છે અને હવે આપણા માટે કોઈ વાસ્તવિક ખતરો નથી. આ તમારા બાળકો અને તમારા પૌત્રોના ભવિષ્યમાં એક સાચું રોકાણ છે.

રાષ્ટ્રપતિએ કહ્યું કે, ઈરાન યુદ્ધ સમાપ્ત થવાની નજીક છે. તેમણે અંદાજ લગાવ્યો કે તેમાં હજુ બે થી ત્રણ અઠવાડિયા લાગશે. આજે રાત્રે, મને એ કહેતા આનંદ થાય છે કે, આ મુખ્ય વ્યૂહાત્મક ઉદ્દેશ્યો પૂર્ણ થવાના આરે છે, ટ્રમ્પે કહ્યું. અમે બધું કરી લીધું છે. તેમની નૌકાદળ ખલાસ થઇ ગઈ છે. તેમની વાયુસેના ખલાસ થઇ ગઈ છે. તેમની મિસાઈલો લગભગ ખલાસ થઇ ગઈ છે અથવા નાશ પામી છે. એકંદરે, આ પગલાં ઈરાનની સેનાને અપંગ બનાવશે, આતંકવાદી જૂથોને ટેકો આપવાની તેમની ક્ષમતાને કચડી નાખશે અને તેમને પરમાણુ બોમ્બ બનાવવાની ક્ષમતાથી વંચિત રાખશે, ટ્રમ્પે કહ્યું. આપણા સશસ્ત્ર દળોએ અસાધારણ કાર્ય કર્યું છે.

તેમણે અમેરિકાની સુરક્ષા અને મુક્ત વિશ્વના સંરક્ષણ માટે યુદ્ધને જરૂરી ગણાવ્યું. ટ્રમ્પે તેમના ભાષણની શરૂઆતમાં તેમના પુરોગામીઓની પણ ટીકા કરી. તેમણે દાવો કર્યો હતો કે, અગાઉના યુએસ રાષ્ટ્રપતિઓએ સત્તા સંભાળતા પહેલા ઈરાની શાસન સાથે વ્યવહાર કરવો જોઈતો હતો. ટ્રમ્પે કહ્યું, આપણે ઈરાનમાં રહેવાની જરૂર નથી. અમને તેમના તેલની જરૂર નથી. અમને તેમની પાસેથી કંઈપણની જરૂર નથી. અમે અમારા સાથીઓને ટેકો આપવા માટે ત્યાં છીએ. રાષ્ટ્રપતિએ યુએસમાં ગેસના ભાવમાં વધારા માટે ઈરાની શાસનને દોષી ઠેરવ્યું.

તેમણે કહ્યું, લોકો ગેસના ભાવમાં તાજેતરના વધારા અંગે ચિંતિત છે. આ ટૂંકા ગાળાનો વધારો સંપૂર્ણપણે ઈરાની શાસન દ્વારા વાણિજ્યિક તેલ ટેન્કરો અને પડોશી દેશો પર આતંકવાદી હુમલાઓનું પરિણામ છે. આ વધુ પુરાવો છે કે ઈરાન પર ક્યારેય પરમાણુ શસ્ત્રો સાથે વિશ્વાસ કરી શકાય નહીં.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ