નવી દિલ્હી, 25 એપ્રિલ (હિ.સ.): ચૂંટણી પંચે તમિલનાડુની તમામ બેઠકો અને પશ્ચિમ બંગાળમાં પ્રથમ તબક્કાના મતદાન બાદ ફોર્મ 17એ (મતદાર રજિસ્ટર) અને અન્ય ચૂંટણી દસ્તાવેજોની ચકાસણી પૂર્ણ કર્યા પછી જણાવ્યું છે કે, કોઈપણ કેન્દ્ર પર ફરીથી મતદાનની ભલામણ કરવામાં આવી નથી.

ચૂંટણી પંચે શનિવારે એક નિવેદનમાં જણાવ્યું હતું કે, આ પ્રક્રિયા 24 એપ્રિલના રોજ બંને રાજ્યોમાં ચૂંટણી અધિકારીઓની દેખરેખ હેઠળ અને નિરીક્ષકોની હાજરીમાં પૂર્ણ કરવામાં આવી હતી. પશ્ચિમ બંગાળની 152 વિધાનસભા બેઠકો પર થયેલા મતદાન બાદ 1,478 ઉમેદવારોને ચકાસણીની તારીખ, સમય અને સ્થળની જાણ કરવામાં આવી હતી. આ તપાસમાં 600 થી વધુ ઉમેદવારો અથવા તેમના પ્રતિનિધિઓએ ભાગ લીધો હતો. 44,376 મતદાન મથકોની તપાસ બાદ કોઈપણ કેન્દ્ર પર ફરીથી મતદાનની ભલામણ કરવામાં આવી નથી.

તમિલનાડુની તમામ 234 વિધાનસભા બેઠકો પર થયેલા મતદાન બાદ 4,023 ઉમેદવારોને ચકાસણી પ્રક્રિયામાં સામેલ થવા માટે સૂચના આપવામાં આવી હતી. 1,825 ઉમેદવારો અથવા તેમના પ્રતિનિધિઓએ તેમાં ભાગ લીધો હતો. 75,064 મતદાન મથકોની તપાસ બાદ પણ કોઈ કેન્દ્ર પર ફરીથી મતદાનની ભલામણ કરવામાં આવી નથી.

ચૂંટણી પંચે માહિતી આપી હતી કે, સમગ્ર પ્રક્રિયાનું વીડિયોગ્રાફી કરવામાં આવ્યું હતું અને તપાસ બાદ ફોર્મ 17એ અને સંબંધિત સામગ્રીને ફરીથી સીલ કરવામાં આવી હતી. ઈવીએમ અને વીવીપેટ મશીનોને સુરક્ષિત રીતે સ્ટ્રોંગ રૂમમાં રાખવામાં આવ્યા છે, જેમને ડબલ લોક વ્યવસ્થા, સીસીટીવી દેખરેખ અને 24 કલાક બે સ્તરીય સુરક્ષામાં રાખવામાં આવ્યા છે.

ચૂંટણી અધિકારીઓને નિર્દેશ આપવામાં આવ્યા છે કે, તેઓ દિવસમાં બે વાર સ્ટ્રોંગ રૂમનું નિરીક્ષણ કરે, જ્યારે જિલ્લા ચૂંટણી અધિકારી મુખ્યાલયમાં સ્થિત સ્ટ્રોંગ રૂમનું દરરોજ અને બહાર સ્થિત સ્ટ્રોંગ રૂમનું દર ત્રણ-ચાર દિવસે એકવાર નિરીક્ષણ કરશે. ઉમેદવારોના પ્રતિનિધિઓને પણ સ્ટ્રોંગ રૂમ પરિસરમાં દેખરેખ માટે કેમ્પ લગાવવાની મંજૂરી આપવામાં આવી છે.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ