- દરેકને પોતાના મૂળભૂત અધિકારનો ઉપયોગ કરીને નિશ્ચિતપણે મતદાન કરવા અપીલ કરી

વડોદરા, 25 એપ્રિલ (હિ.સ.) : વડોદરાની 104 વર્ષીય સવિતા મંગળદાસ શાહ, જેઓને સૌ પ્રેમથી ‘સવિતા બા’ તરીકે ઓળખે છે, ફરી એકવાર 2026ની નગરપાલિકા ચૂંટણીમાં મતદાન કરવા માટે ઉત્સાહ સાથે તૈયાર છે. તેમની અડગ ઈચ્છાશક્તિ અને લોકશાહી પ્રત્યેની પ્રતિબદ્ધતા દરેકને પ્રેરણા આપે છે. તેજસ્વી સ્મૃતિ, હંમેશા સ્મિત ભરેલો ચહેરો અને આનંદી સ્વભાવ ધરાવતી સવિતા બાએ ક્યારેય કોઈ ચૂંટણી ચૂકી નથી અને આ વર્ષે પણ પરિવાર સાથે મતદાન કરવા માટે દૃઢ નિશ્ચય કર્યો છે.

તેઓ સૌને અપીલ કરે છે કે, દરેક નાગરિકે પોતાના મૂળભૂત અધિકારનો ઉપયોગ કરી મતદાન કરવું જ જોઈએ.

તેમનું જીવન ઇતિહાસ સાથે જીવંત જોડાણ ધરાવે છે. સવિતા બા,તેમણે પોતે શાળાના કાર્યક્રમમાં ગાંધીજી સાથે થયેલી મુલાકાતનો પ્રસંગ યાદ કર્યો હતો. આટલુ જ નહી તેમણે દાંડી યાત્રા પસાર થઇ હતી તે જોવાનો અનુભવ પણ વ્યક્ત કર્યો હતો અને ઐતિહાસિક ગોલ્ડન બ્રિજના ઉદ્ઘાટન પ્રસંગમાં પણ હાજરી આપી હોવાનું જણાવ્યું હતું.

સરળ અને નિયમિત જીવન જીવતી સવિતા બા રોજ ધાર્મિક ગ્રંથોનું વાંચન અને પ્રાર્થના કરવામાં સમય પસાર કરે છે. તેમના રમૂજી અને મીઠા સ્વભાવને કારણે તેઓ દરેક વયના લોકો સાથે સહજ રીતે જોડાઈ જાય છે.

મંજલપુર ખાતે પોતાની દીકરી યોગિની શાહ સાથે રહેતી સવિતા બા પરિવાર અને પાડોશમાં ખૂબ જ પ્રિય વ્યક્તિ છે. તેમની સકારાત્મકતા પરિવારજનોને નજીક લાવે છે, જેમાં તેમની વહુ મેઘના શાહ પણ નિયમિત મુલાકાત લે છે. પોતાની અવિરત ઊર્જા અને નાગરિક ફરજ પ્રત્યેની લાગણી દ્વારા, સવિતા બા અને તેમનો પરિવાર એક શક્તિશાળી સંદેશ આપે છે,મતદાન કરો, અવશ્ય કરો.

હિન્દુસ્થાન સમાચાર / હર્ષ શાહ