અમદાવાદ,25 એપ્રિલ (હિ.સ.) વર્લ્ડ ઇન્ટેલેક્ચ્યુઅલ પ્રોપર્ટી ડે 2026 નિમિત્તે, અમદાવાદ મેનેજમેન્ટ એસોસિએશન દ્રારા “વાય.જે. ત્રિવેદી – એએમએ એકેડેમી ફોર ઇન્ટેલેક્ચ્યુઅલ પ્રોપર્ટી રાઇટ્સ”ના હેઠળ સ્પોર્ટ્સ અને આઈપી: ફીલ ધ બીટ ઓફ આઈપી વિષય પર નિષ્ણાતો દ્રારા એએમએ ખાતે એક રાઉન્ડટેબલ ડિસ્કશનનું આયોજન કરવામાં આવ્યું હતું.

આ કાર્યક્રમમાં રમતગમતની શ્રેષ્ઠતા અને ઇન્ટેલેક્ચ્યુઅલ પ્રોપર્ટી (આઈપી)ના વિકસતા સમન્વય વિશે ઊંડાણપૂર્વક ચર્ચા કરવામાં આવી હતી. આ ચર્ચામાં રમતગમત, વ્યવસાય, કાયદો, શૈક્ષણિક અને મીડિયા ક્ષેત્રના અગ્રણીઓએ એકસાથે આવીને આઈપી દ્રારા લાંબા ગાળાનું મૂલ્ય કેવી રીતે બનાવી શકાય તે અંગેના વ્યવહારુ દ્રષ્ટિકોણ રજૂ કર્યા હતા. એએમએના માનદ મંત્રી અને વાય. જે. ત્રિવેદી એન્ડ કંપનીના સિનિયર પાર્ટનર. ગોપી જતિન ત્રિવેદીએ પ્રારંભિક સંબોધન કર્યું હતું, જ્યારે પીમા કંટ્રોલ્સ પ્રાઈવેટ લિમિટેડના ડાયરેક્ટર અને ટાઇ અમદાવાદના વાઇસ પ્રેસિડેન્ટ વિનીત પરીખે આ રાઉન્ડટેબલ ડિસ્કશનનું સંચાલન કર્યું હતું.

રાઉન્ડટેબલ ચર્ચા દરમિયાન એ વાત પર ભાર મૂકવામાં આવ્યો હતો કે આધુનિક રમતગમત હવે માત્ર મેદાન પૂરતી મર્યાદિત નથી; નવી સ્પોર્ટ્સ ઇકોસિસ્ટમ એ મીડિયા, વેલનેસ, ડેટા અને ચાહકોના જોડાણને સાંકળતી એક જટિલ વ્યવસ્થા છે. સહભાગીઓએ નોંધ્યું હતું કે ખાનગી રોકાણ અને સ્પોર્ટ્સ સ્ટાર્ટઅપ્સને કારણે ભારતમાં રમતગમત હવે આર્થિક તકની દિશામાં મોટા બદલાવ તરફ આગળ વધી રહી છે.

સફળ સ્પોર્ટ્સ પ્રોપર્ટીઝમાં રહેલી મૂલ્યવાન ઇન્ટેલેક્ચ્યુઅલ પ્રોપર્ટીને ઓળખવા અને તેનું રક્ષણ કરવા પર મુખ્ય ધ્યાન કેન્દ્રિત કરવામાં આવ્યું હતું, જેમાં નીચેનાનો સમાવેશ થાય છે:

બ્રાન્ડિંગ: ટીમનું નામ, લોગો અને કાર્યક્રમની ઓળખ.

વ્યાવસાયિક અધિકારો: બ્રોડકાસ્ટિંગ (પ્રસારણ) અધિકારો અને એથ્લેટના ઈમેજ રાઈટ્સ.

નવીનતા (ઇનોવેશન): તાલીમ પધ્ધતિઓ, માલિકીની એપ્સ અને ટેકનોલોજી પ્લેટફોર્મ.

ડિજિટલ ફ્રન્ટિયર: કન્ટેન્ટ ક્રિએશન, ડેટા અને ફેન કોમ્યુનિટીઝ.

આ સંવાદમાં ખાસ કરીને ગુજરાતમાં પ્રીમિયર સ્પોર્ટ્સ બિઝનેસ હબ તરીકે ઉભરી આવવાની સંભાવનાઓ વિશે ચર્ચા કરવામાં આવી હતી. નિષ્ણાતોએ ચર્ચા કરી કે કેવી રીતે સ્થાનિક સંસ્થાઓ અને ખાનગી ક્ષેત્ર સાથે મળીને એવું વાતાવરણ તૈયાર કરી શકે જ્યાં સ્ટાર્ટઅપ્સ અને એકેડેમીઓ તેમના વિકાસના શરૂઆતના તબક્કાથી જ આઈપી થિંકિંગ (ઇન્ટેલેક્ચ્યુઅલ પ્રોપર્ટી અંગેના વિચાર)નો લાભ મેળવી શકે.

એએમએના એક્ઝિક્યુટિવ ડિરેક્ટર ઉન્મેશ દીક્ષિતે સમાપન કરતાં વિવિધ ક્ષેત્રો વચ્ચે મજબૂત સહયોગની હાકલ કરી હતી, જેથી સુનિશ્ચિત કરી શકાય કે ભારતીય રમતગમત સંસ્થાઓ મેદાનમાં જીતવા જેટલી જ સજાગ તેમની નવીનતાઓનું રક્ષણ કરવા માટે પણ હોય.

હિન્દુસ્થાન સમાચાર / હર્ષ શાહ