ભાવનગર,26 એપ્રિલ (હિ.સ.)ભાવનગર જિલ્લાના ઉમરાળા તાલુકાના દડવા ગામે સ્થાનિક સ્વરાજ્યની ચૂંટણી દરમિયાન એક અનોખું અને પ્રેરણાદાયક દૃશ્ય જોવા મળ્યું હતું. ૧૦૧ વર્ષની ઉંમરે પણ લોકશાહી પ્રત્યે અવિચળ શ્રદ્ધા ધરાવતા અમરબેન નાનુભાઈ વાઘેલાએ મતદાન મથકે પહોંચી પોતાના મતાધિકારનો ઉપયોગ કરીને સૌને આશ્ચર્યચકિત કર્યા હતા. તેમની આ જાગૃતતા અને દેશપ્રેમે સમગ્ર ગામમાં ગૌરવની લાગણી જગાવી દીધી હતી.

સદી પાર કરેલી ઉંમર છતાં અમરબેનમાં દેશપ્રેમ અને જવાબદારીની લાગણી આજે પણ યથાવત્ છે. મતદાન મથક સુધી પહોંચતા તેમની આંખોમાં દેખાતી ખુશી અને આત્મસંતોષ એ દર્શાવતું હતું કે મતદાન તેમના માટે માત્ર અધિકાર નહીં, પરંતુ લોકશાહી પ્રત્યેની પવિત્ર ફરજ છે. તેમની આ ભાવનાએ યુવા મતદારોમાં નવી ચેતના પ્રગટાવી હતી.

અમરબેન મતદાન મથકે પહોંચતા જ ત્યાં હાજર ગ્રામજનોમાં ભાવુકતા અને ગર્વનો માહોલ છવાઈ ગયો હતો. યુવાનો માટે તેઓ જીવંત પ્રેરણાસ્ત્રોત બની રહ્યા હતા. તેમના આ કાર્યએ ‘પહેલા મતદાન, પછી અન્ય કામ’નો સંદેશ વધુ મજબૂત કર્યો હતો અને ઘણા લોકોને મતદાન કરવા પ્રોત્સાહિત કર્યા હતા.

જિલ્લા વહીવટી તંત્ર દ્વારા વરિષ્ઠ નાગરિકો માટે ખાસ સુવિધાઓ ઉપલબ્ધ કરાવવામાં આવી હતી, જેના કારણે અમરબેન જેવા વડીલો સરળતાથી મતદાન પ્રક્રિયામાં જોડાઈ શક્યા હતા. આ સુવિધાઓ લોકશાહી પ્રત્યેની પ્રતિબદ્ધતાનું ઉત્તમ ઉદાહરણ છે.

દડવા ગામે આજનો દિવસ માત્ર ચૂંટણી પૂરતો મર્યાદિત રહ્યો નહોતો, પરંતુ લોકશાહી પ્રત્યેની શ્રદ્ધા, સંસ્કાર અને જવાબદારીનો જીવંત ઉત્સવ બની ગયો હતો. અમરબેનનું આ પ્રેરણાદાયક પગલું નિશ્ચિતપણે યુવાનો અને પ્રથમવાર મતદાન કરનારાઓ માટે લાંબા સમય સુધી યાદગાર બની રહેશે.

---------------

હિન્દુસ્થાન સમાચાર / GONDALIYA DISHANT