કચ્છ, 27 એપ્રિલ (હિ.સ.) : ભુજ શહેરમાં મહાવીરનગર નજીક આવેલા શ્રીજીનગર વિસ્તારમાં અચાનક આગ લાગવાની ઘટના સામે આવતા સ્થાનિકોમાં થોડીવાર માટે દોડધામ અને ગભરાટનો માહોલ સર્જાયો હતો. ખુલ્લા પ્લોટમાં લાગેલી આગે પળવારમાં વિકરાળ સ્વરૂપ ધારણ કરતાં આસપાસના રહેણાંક વિસ્તારમાં રહેતા લોકો ચિંતિત બન્યા હતા. ઘટનાની જાણ તાત્કાલિક ભુજ ફાયર સ્ટેશનને કરવામાં આવતાં ફાયર વિભાગની ટીમ મિનિટોમાં જ ઘટનાસ્થળે દોડી આવી હતી.

મળતી માહિતી મુજબ, મહાવીરનગર પાસે આવેલા શ્રીજીનગરના ખુલ્લા પ્લોટમાં સૂકી ઝાડીઓ, કચરો અને જ્વલનશીલ સામગ્રીના કારણે આગ ઝડપથી પ્રસરી હતી. ગરમી અને પવનના કારણે જ્વાળાઓ વધુ ફેલાય તે પહેલાં જ ભુજ ફાયર બ્રિગેડે સમયસર પાણીનો મારો ચલાવી આગને કાબૂમાં લેવાની કામગીરી હાથ ધરી હતી. આગના ધુમાડા દૂર દૂર સુધી દેખાતા સ્થાનિક લોકો મોટી સંખ્યામાં સ્થળ પર એકત્ર થયા હતા.

આ આગ બુઝાવવાની કામગીરીમાં ભુજ ફાયર બ્રિગેડના જવાનો દ્વારા જોખમ વચ્ચે રહી સતત મહેનત કરવામાં આવી હતી. ટીમમાં નરેશ લોહરા, યશપાલસિંહ વાઘેલા, ઈમ્તિયાઝ સમા સહિત ટ્રેનિંગ સ્ટાફના સભ્યોએ સક્રિય રીતે જોડાઈ આગ પર કાબૂ મેળવ્યો હતો. ફાયર સ્ટાફની સતર્કતા અને ઝડપી પ્રતિસાદના કારણે આગ નજીકના મકાનો કે વાહનો સુધી પહોંચે તે પહેલાં જ નિયંત્રણમાં આવી ગઈ હતી, જેના કારણે સંભવિત મોટી જાનહાનિ અને માલમત્તાના નુકસાનને અટકાવવામાં સફળતા મળી હતી.

સ્થાનિક રહિશોના જણાવ્યા અનુસાર, ઉનાળાની કાળઝાળ ગરમી વચ્ચે ખુલ્લા પ્લોટોમાં સૂકું ઘાસ, કચરો અને પ્લાસ્ટિકના જથ્થા હોવાને કારણે આવી આગની ઘટનાઓ બનવાની શક્યતા વધી જાય છે. આગ લાગવાનું ચોક્કસ કારણ હજી સામે આવ્યું નથી, પરંતુ પ્રાથમિક અનુમાન મુજબ કોઈ બેદરકારી અથવા સળગતી વસ્તુના સંપર્કથી આગ ભભૂકી હોવાનું માનવામાં આવી રહ્યું છે.

ઘટના બાદ ફાયર વિભાગ દ્વારા નાગરિકોને ખાસ અપીલ કરવામાં આવી છે કે ખુલ્લા પ્લોટોમાં કચરો ન નાંખવો, જ્વલનશીલ સામગ્રી એકત્રિત ન થવા દેવી અને ઉનાળામાં સાવચેતી રાખવી જરૂરી છે. ભુજ ફાયર બ્રિગેડની સમયસર કામગીરીના કારણે ફરી એકવાર શહેરમાં મોટી દુર્ઘટના ટળી હોવાનું લોકોમાં ચર્ચાઈ રહ્યું છે.

---------------

હિન્દુસ્થાન સમાચાર / Rohit R. Padhiyar