નવી દિલ્હી, 27 એપ્રિલ (હિ.સ.). વડાપ્રધાન નરેન્દ્ર મોદીનો પૂર્વોત્તર રાજ્ય સિક્કિમનો બે દિવસીય પ્રવાસ આજથી શરૂ થઈ રહ્યો છે. તેઓ સિક્કિમનો પ્રવાસ પૂર્ણ કરી મંગળવારે સાંજે બે દિવસના પ્રવાસે ઉત્તર પ્રદેશના વારાણસી પહોંચશે. વડાપ્રધાન સિક્કિમમાં 4,000 કરોડથી વધુની યોજનાઓનું શિલાન્યાસ અને ઉદ્ઘાટન કરશે. તેઓ પોતાના સંસદીય મતવિસ્તાર વારાણસીમાં પણ 6,350 કરોડ રૂપિયાથી વધુના વિકાસ કાર્યોનું ઉદ્ઘાટન અને શિલાન્યાસ કરશે. આ માહિતી વડાપ્રધાનનો સિક્કિમ પ્રવાસ શરૂ થવાના આગલા દિવસે સરકારી યાદીમાં આપવામાં આવી હતી.

યાદી મુજબ, વડાપ્રધાન નરેન્દ્ર મોદી આજે બપોરે લગભગ 3 વાગ્યે ગંગટોક પહોંચશે. 28 એપ્રિલે સવારે લગભગ 9:30 વાગ્યે વડાપ્રધાન ગંગટોક સ્થિત ઓર્કિડેરિયમની મુલાકાત લેશે. રાજ્યના પારિસ્થિતિક અને પુષ્પ વારસાને પ્રદર્શિત કરવા માટે સ્વર્ણજયંતિ મૈત્રી મંજરી પાર્કને અત્યાધુનિક સુવિધાઓથી સજ્જ વિશ્વસ્તરીય ઓર્કિડ અનુભવ કેન્દ્ર તરીકે વિકસાવવામાં આવ્યું છે.

ત્યારબાદ, સવારે લગભગ 10 વાગ્યે વડાપ્રધાન પાલજોર સ્ટેડિયમમાં સિક્કિમના રાજ્ય સ્થાપનાના 50માં વર્ષના સમાપન સમારોહમાં ભાગ લેશે. અહીં તેઓ રાજ્યભરમાં 4,000 કરોડ રૂપિયાથી વધુની અનેક વિકાસ યોજનાઓનું ઉદ્ઘાટન, શુભારંભ અને શિલાન્યાસ કરશે. વડાપ્રધાન આ પ્રસંગે સભાને સંબોધિત પણ કરશે. આ યોજનાઓ પાયાની જરૂરિયાતો, કનેક્ટિવિટી, સ્વાસ્થ્ય સેવા, શિક્ષણ, વીજળી, શહેરી વિકાસ, પર્યાવરણ, પ્રવાસન અને કૃષિ સહિત અનેક ક્ષેત્રોને આવરી લે છે અને તેનો ઉદ્દેશ્ય સિક્કિમમાં સર્વાંગી અને સર્વસમાવેશક વિકાસને વેગ આપવાનો છે.

વડાપ્રધાન મોદી, નામચી જિલ્લાના યાંગાંગમાં 100 બેડની આયુર્વેદ હોસ્પિટલનો શિલાન્યાસ કરશે. તેઓ એનઆઈટી દેવરાલીમાં 30 બેડની સંકલિત સોવા રિગ્પા હોસ્પિટલનું પણ ઉદ્ઘાટન કરશે, જેનાથી રાજ્યમાં પરંપરાગત અને સંકલિત તબીબી પ્રણાલીઓ સુધીની પહોંચ મજબૂત થશે. વડાપ્રધાન યાંગાંગમાં સિક્કિમ યુનિવર્સિટીના કાયમી કેમ્પસ, ચાકુંગમાં નેતાજી સુભાષચંદ્ર બોઝ ઉત્કૃષ્ટતા યુનિવર્સિટીના વહીવટી બ્લોક, ગંગટોક જિલ્લાના સોચેયગાંગમાં હેલેન લેપ્ચા મેડિકલ કોલેજ અને ગ્યાલશિંગ જિલ્લાના ડેન્ટમમાં ડેન્ટમ વ્યાવસાયિક કોલેજનું ઉદ્ઘાટન કરશે. તેઓ ગ્યાથાંગમાં મોડેલ નિવાસી શાળાઓ, મંગન જિલ્લાના મંગશિલામાં એક નવી મોડેલ ડિગ્રી કોલેજ અને નામચી જિલ્લાના બૂમટાર ગુંપામાં એક મઠ આશ્રયસ્થાન-સહ-વર્ગખંડનું પણ ઉદ્ઘાટન કરશે. આ ઉપરાંત, તેઓ સિક્કિમની 160 શાળાઓમાં આઈટી-સક્ષમ શૈક્ષણિક માળખાગત સુવિધાઓના અમલીકરણની શરૂઆત કરશે.

સિક્કિમમાં કનેક્ટિવિટીને વધુ સારી બનાવવા માટે વડાપ્રધાન સિરવાની અને લોઅર સમદોંગમાં તીસ્તા નદી પર બનેલા બે ડબલ લેન સ્ટીલ આર્ચ બ્રિજનો શિલાન્યાસ કરશે, જે નામચી અને ગંગટોક જિલ્લાઓને જોડશે. તેઓ કિચુદુમરા થઈને બિરધાંગથી નામચી સુધીના રોડના વિસ્તરણ અને મજબૂતીકરણનું પણ ઉદ્ઘાટન કરશે, જેનાથી આંતર-જિલ્લા જોડાણ વધશે, મુસાફરીની ક્ષમતામાં સુધારો થશે અને લોકો તથા માલસામાનની સરળ અવરજવર સુનિશ્ચિત થશે.

વીજ ક્ષેત્રમાં વડાપ્રધાન ગંગટોકમાં ટ્રાન્સમિશન અને ડિસ્ટ્રિબ્યુશન (ટીએન્ડડી) નેટવર્કના સુધારા, અપગ્રેડેશન અને નવીનીકરણનું ઉદ્ઘાટન કરશે, જેનાથી આ વિસ્તારમાં વિશ્વસનીય વીજ પુરવઠો મજબૂત થશે. શહેરી વિકાસ અને વહીવટી માળખાગત સુવિધાઓના ક્ષેત્રમાં, વડાપ્રધાન લુમસેમાં જન સેવા સચિવાલય (મિની સચિવાલય) અને ગંગટોકમાં સિવિલ સર્વિસ ઓફિસર ઇન્સ્ટિટ્યૂટનું ઉદ્ઘાટન કરશે. તેઓ લિંગડિંગમાં સિક્કિમ શહેરી ગરીબ આવાસ યોજના, પોલીસ કર્મચારીઓ માટે આવાસ અને એસએપી પાંગથાંગમાં ગ્રેડ સી ક્વાર્ટર સહિતની આવાસ યોજનાઓનું પણ ઉદ્ઘાટન કરશે. આ ઉપરાંત, એમજી માર્ગ પર સદભાવ મંડપ (જાહેર સુવિધા કેન્દ્ર)નો શિલાન્યાસ કરશે.

પર્યાવરણ સંરક્ષણના પ્રયાસો હેઠળ વડાપ્રધાન મોદી નદી પ્રદૂષણ નિયંત્રણ પહેલ અંતર્ગત સિંગતમ નગરમાં ગટર વ્યવસ્થાના પુનઃનિર્માણનો શિલાન્યાસ કરશે. તેઓ ગંગટોકના ઝોન 3 માં રોરો ચૂ નદી દ્વારા રાની ચૂ નદીના પ્રદૂષણ નિયંત્રણ યોજનાનું પણ ઉદ્ઘાટન કરશે, જેનાથી શહેરી સ્વચ્છતા અને ટકાઉ ઇકો-સિસ્ટમમાં સુધારો થશે. પ્રવાસન અને તીર્થધામ ક્ષેત્રમાં, વડાપ્રધાન ગંગટોકમાં રિજ પ્રિસિંક્ટના પુનઃવિકાસ, સોરેંગના ડોડકમાં ઇકો-ટુરિઝમ અને તીર્થયાત્રા માળખાગત સુવિધાઓ, કૈલાસ માનસરોવર યાત્રા સંબંધિત સુવિધાઓ (જેમાં 18મા માઈલ અને હાંગુ તળાવની સુવિધાઓ સામેલ છે) અને નામફિંગના કૃષ્ણા પ્રણામી મંગલધામમાં યાત્રી નિવાસનું ઉદ્ઘાટન કરશે. તેઓ ગ્યાલશિંગ જિલ્લાના સિલનોનમાં એક ઇકો-પીલગ્રીમેજ કોમ્પ્લેક્સનો શિલાન્યાસ પણ કરશે.

વડાપ્રધાન મોદી સિક્કિમમાં ઇફકો પ્રોસેસિંગ પ્લાન્ટનું ઉદ્ઘાટન કરશે, જેનાથી કૃષિ પ્રક્રિયાને મોટો વેગ મળવાની અને રાજ્યમાં ખેડૂતોની આજીવિકા તથા મૂલ્ય શૃંખલા મજબૂત થવાની અપેક્ષા છે. વડાપ્રધાન યુવા ભાગીદારી અને રમતગમતના વિકાસને પ્રોત્સાહન આપવા માટે પાકયોંગ જિલ્લાના માઇનિંગ, રંગપોમાં ઇન્ડોર ક્રિકેટ સુવિધાઓનું પણ ઉદ્ઘાટન કરશે. વડાપ્રધાનની આ મુલાકાત સિક્કિમના રાજ્ય બનવાના સુવર્ણ જયંતિ વર્ષમાં એક મહત્વપૂર્ણ સિદ્ધિ છે અને રાજ્ય તથા પૂર્વોત્તર ક્ષેત્રના ઝડપી અને ટકાઉ વિકાસ પ્રત્યે વર્તમાન સરકારની સતત પ્રતિબદ્ધતાને દર્શાવે છે.

સરકારી પ્રવક્તાના જણાવ્યા અનુસાર, વડાપ્રધાન 28 એપ્રિલે સાંજે લગભગ 5 વાગ્યે વારાણસીમાં આયોજિત મહિલા સંમેલનમાં ભાગ લેશે, જ્યાં તેઓ લગભગ 6,350 કરોડ રૂપિયાની વિવિધ વિકાસ યોજનાઓનું ઉદ્ઘાટન અને શિલાન્યાસ કરશે. તેઓ આ પ્રસંગે સભાને સંબોધિત પણ કરશે. 29 એપ્રિલે સવારે લગભગ 8:30 વાગ્યે વડાપ્રધાન વારાણસીના શ્રી કાશી વિશ્વનાથ મંદિરમાં દર્શન અને પૂજન કરશે. ત્યારબાદ વડાપ્રધાન હરદોઈ જવા રવાના થશે અને લગભગ 11:30 વાગ્યે ગંગા એક્સપ્રેસ-વેનું ઉદ્ઘાટન કરશે. તેઓ આ પ્રસંગે સભાને સંબોધિત પણ કરશે.

વડાપ્રધાન વારાણસીમાં 1,050 કરોડ રૂપિયાથી વધુના ખર્ચની 48 પૂર્ણ થયેલી યોજનાઓ રાષ્ટ્રને સમર્પિત કરશે. મુખ્ય માળખાગત યોજનાઓમાં વારાણસી-આઝમગઢ રોડનું વિસ્તરણ, કજ્જાકપુરા અને કાદીપુરમાં મહત્વપૂર્ણ રેલ ઓવરબ્રિજનું ઉદ્ઘાટન અને ભગવાનપુરમાં 55 એમએલડી ક્ષમતાવાળા સુએજ ટ્રીટમેન્ટ પ્લાન્ટ (એસટીપી)ના ઉદ્ઘાટનનો સમાવેશ થાય છે.

તેઓ વિવિધ સામુદાયિક યોજનાઓનું ઉદ્ઘાટન કરશે. જેમાં જલ જીવન મિશન અંતર્ગત 30 ગ્રામીણ પીવાના પાણીની યોજનાઓ, ચંદ્રાવતી ઘાટનો પુનઃવિકાસ, સારનાથ પાસે સારંગનાથ મંદિરનો પ્રવાસન વિકાસ અને નાગવા સ્થિત સંત રવિદાસ પાર્કનું સૌંદર્યીકરણ અને જીર્ણોદ્ધાર કાર્ય સામેલ છે. જાહેર સેવાઓ અને રમતગમતમાં સુધારા પણ પ્રમુખતાથી કરવામાં આવી રહ્યા છે, જેમાં યુપી કોલેજમાં સિન્થેટિક હોકી ટર્ફ, રામનગરમાં 100 બેડનું વૃદ્ધાશ્રમ અને ભેલુપુરા જળ શુદ્ધિકરણ પ્લાન્ટમાં 1 મેગાવોટનો સોલર પાવર પ્લાન્ટ સામેલ છે. વડાપ્રધાન કેન્દ્રીય તિબેટીયન અભ્યાસ યુનિવર્સિટીમાં સોવા રિગ્પા ભવન અને હોસ્પિટલનું પણ ઉદ્ઘાટન કરશે, જે આધુનિક સ્વાસ્થ્ય સેવા પ્રણાલીઓ સાથે પરંપરાગત ચિકિત્સાને સાંકળવાની પ્રતિબદ્ધતા દર્શાવે છે.

વડાપ્રધાન લગભગ 5,300 કરોડ રૂપિયાની 112 થી વધુ યોજનાઓનો શિલાન્યાસ કરશે. જેમાં અમૃત 2.0 હેઠળ 13 ગટર અને પાણી પુરવઠા યોજનાઓ, શ્રી શિવ પ્રસાદ ગુપ્તા વિભાગીય જિલ્લા હોસ્પિટલમાં 500 બેડની મલ્ટી-સ્પેશિયાલિટી હોસ્પિટલ, ભોજુવીર અને સિગરામાં બજાર સંકુલ અને કચેરીઓનું નિર્માણ, તળાવોનું જીર્ણોદ્ધાર અને નવીનીકરણ, 198 બેડની હોસ્પિટલનું પુનઃનિર્માણ, 100 બેડના ક્રિટિકલ કેર બ્લોકનું નિર્માણ અને અસી ઘાટ, દશાશ્વમેધ ઘાટ અને નમો ઘાટ સહિતના મુખ્ય ઘાટો પર પ્રવાસન સુવિધાઓનો વિકાસ સામેલ છે. વહીવટી અને સામાજિક કલ્યાણ માળખાને મજબૂત કરવા માટે વડાપ્રધાન રામનગરમાં સંકલિત વિભાગીય કચેરી, નગર નિગમ કચેરી ભવન અને સરકારી બાળ આશ્રય ગૃહ તથા કિશોર ન્યાય બોર્ડનો શિલાન્યાસ પણ કરશે. વડાપ્રધાન બનાસ ડેરી સાથે જોડાયેલા ઉત્તર પ્રદેશના દૂધ ઉત્પાદકોને બોનસ તરીકે 105 કરોડ રૂપિયાથી વધુની રકમ પણ ટ્રાન્સફર કરશે.

વડાપ્રધાન મોદી વારાણસી જંક્શન-પંડિત દીનદયાળ ઉપાધ્યાય જંક્શનની ત્રીજી અને ચોથી રેલવે લાઈન યોજનાનો શિલાન્યાસ કરશે, જેમાં ગંગા નદી પર રેલ-સહ-રોડ પુલનું નિર્માણ પણ સામેલ છે. આ યોજના રેલ ટ્રાફિકમાં ભીડ ઘટાડીને, લોજિસ્ટિક્સ કાર્યક્ષમતા વધારીને, મલ્ટી-મોડલ કનેક્ટિવિટી મજબૂત કરીને અને ટ્રાફિકને સરળ બનાવીને વારાણસી અને ચંદૌલી જિલ્લાઓને ફાયદો પહોંચાડશે. તેનાથી કાશી વિશ્વનાથ ધામ, રામનગર વિસ્તાર અને નેશનલ હાઈવે-19 સુધીની પહોંચમાં સુધારો થશે, સાથે જ પૂર્વી ઉત્તર પ્રદેશ અને બિહાર સાથે રેલ જોડાણ મજબૂત થશે.

વડાપ્રધાન બે નવી અમૃત ભારત એક્સપ્રેસ ટ્રેનોને પણ લીલી ઝંડી બતાવશે. આ ટ્રેનો છે- બનારસ-પુણે (હડપસર) અને અયોધ્યા-મુંબઈ (લોકમાન્ય તિલક ટર્મિનસ). આ ટ્રેનો સસ્તી અને આધુનિક મુસાફરીના વિકલ્પો પૂરા પાડશે અને ઉત્તર પ્રદેશ, મધ્ય પ્રદેશ અને મહારાષ્ટ્ર વચ્ચે જોડાણ વધારશે. બનારસ-પુણે સેવાથી કાશી વિશ્વનાથ ધામ સુધી પહોંચવું સરળ બનશે, જ્યારે અયોધ્યા-મુંબઈ સેવાથી શ્રી રામ મંદિર તીર્થ ક્ષેત્ર સુધીનું જોડાણ વધુ સારું થશે અને મુખ્ય ધાર્મિક સ્થળો વચ્ચે કનેક્ટિવિટી મજબૂત થશે.

વડાપ્રધાન હરદોઈ જિલ્લામાં ગંગા એક્સપ્રેસ-વેનું ઉદ્ઘાટન કરશે, જે દેશમાં વિશ્વસ્તરીય માળખાગત સુવિધાઓના વિકાસમાં એક મહત્વપૂર્ણ સિદ્ધિ હશે. ગંગા એક્સપ્રેસ-વે 594 કિલોમીટર લાંબો, 6-લેન (8-લેન સુધી વિસ્તરણ કરી શકાય તેવો), એક્સેસ-કંટ્રોલ્ડ ગ્રીનફિલ્ડ હાઈ-સ્પીડ કોરિડોર છે, જેનું નિર્માણ લગભગ 36,230 કરોડ રૂપિયાના કુલ ખર્ચે કરવામાં આવ્યું છે. આ એક્સપ્રેસ-વે 12 જિલ્લાઓ- મેરઠ, બુલંદશહેર, હાપુર, અમરોહા, સંભલ, બદાઉન, શાહજહાંપુર, હરદોઈ, ઉન્નાવ, રાયબરેલી, પ્રતાપગઢ અને પ્રયાગરાજમાંથી પસાર થાય છે, જેનાથી ઉત્તર પ્રદેશના પશ્ચિમ, મધ્ય અને પૂર્વીય વિસ્તારોને એક જ અવિરત હાઈ-સ્પીડ કોરિડોર દ્વારા જોડવામાં આવ્યા છે.

આ યોજનાથી મેરઠ અને પ્રયાગરાજ વચ્ચે મુસાફરીનો સમય હાલના 10-12 કલાકથી ઘટીને લગભગ 6 કલાક થવાની ધારણા છે, જેનાથી અવરજવરમાં સરળતા અને પરિવહનમાં કાર્યક્ષમતા વધશે. આ યોજનાની મુખ્ય વિશેષતા શાહજહાંપુર જિલ્લામાં 3.5 કિલોમીટર લાંબી ઈમરજન્સી લેન્ડિંગ સુવિધા (હવાઈ પટ્ટી)નું નિર્માણ છે. આ દ્વિ-ઉપયોગી માળખાગત સુવિધા રાષ્ટ્રીય સુરક્ષા સજ્જતાને મજબૂત કરે છે અને આર્થિક લાભો ઉપરાંત વ્યૂહાત્મક મહત્વ પણ ધરાવે છે.

ગંગા એક્સપ્રેસ-વેને એક મુખ્ય આર્થિક કોરિડોર તરીકે જોવામાં આવે છે, જેના માર્ગમાં આવતા 12 જિલ્લાઓમાં લગભગ 2,635 હેક્ટર વિસ્તારમાં સંકલિત મેન્યુફેક્ચરિંગ અને લોજિસ્ટિક્સ કોરિડોર વિકસાવવામાં આવશે. આ એક્સપ્રેસ-વે લોજિસ્ટિક્સ ખર્ચ ઘટાડશે, સપ્લાય ચેઈનની કાર્યક્ષમતામાં સુધારો કરશે અને મેન્યુફેક્ચરિંગ સ્પર્ધાત્મકતાને પ્રોત્સાહન આપશે.

બહેતર કનેક્ટિવિટી વ્યવસ્થાથી ખેડૂતોને શહેરી અને નિકાસ બજારો સુધી સીધી પહોંચ મળશે, જેનાથી તેમને વધુ સારા ભાવ મળશે અને ગ્રામીણ આવકમાં વધારો થશે. આ યોજનાથી પ્રવાસનને પ્રોત્સાહન મળવાની, નવી આર્થિક તકો ખુલવાની અને સમગ્ર વિસ્તારમાં પ્રત્યક્ષ અને પરોક્ષ રોજગારીની તકો ઉભી થવાની પણ અપેક્ષા છે. ગંગા એક્સપ્રેસ-વે રાજ્યમાં વ્યાપક એક્સપ્રેસ-વે નેટવર્કની કરોડરજ્જુ તરીકે પણ કામ કરશે, જેમાં આગ્રા-લખનૌ એક્સપ્રેસ-વે, જેવર લિંક એક્સપ્રેસ-વે, ફર્રુખાબાદ લિંક એક્સપ્રેસ-વે અને મેરઠથી હરિદ્વાર સુધીના સૂચિત વિસ્તરણ સહિત અનેક લિંક કોરિડોર કાં તો કાર્યરત છે અથવા આયોજન હેઠળ છે. આ ઉભરતું એક્સપ્રેસ-વે નેટવર્ક ઉત્તર પ્રદેશમાં પૂર્વથી પશ્ચિમ અને ઉત્તરથી દક્ષિણ સુધી હાઈ-સ્પીડ રોડ કનેક્ટિવિટીનો વિસ્તાર કરશે, જેનાથી સંતુલિત પ્રાદેશિક વિકાસ શક્ય બનશે.

ગંગા એક્સપ્રેસ-વે માત્ર એક પરિવહન યોજના નથી, પરંતુ એક પરિવર્તનકારી પહેલ છે, જે લોજિસ્ટિક્સ ખર્ચ ઘટાડશે, ઔદ્યોગિક રોકાણને આકર્ષશે, કૃષિ અને ગ્રામીણ આવકને પ્રોત્સાહન આપશે, રોજગારીનું સર્જન કરશે અને સમગ્ર રાજ્યમાં સર્વાંગી આર્થિક વિકાસને વેગ આપશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ