નવી દિલ્હી, 27 એપ્રિલ (હિ.સ.) ઇન્ડિયન પ્રીમિયર લીગ (આઈપીએલ) 2026માં 26 એપ્રિલનો દિવસ બોલરોના નામે રહ્યો, જ્યાં બે મેચોમાં કુલ 26 વિકેટ પડી, જેમાં સુપર ઓવરનો પણ સમાવેશ થાય છે. આ પ્રદર્શન બાદ પર્પલ કેપની રેસમાં મોટો ફેરફાર જોવા મળ્યો છે.

કગિસો રબાડાએ ચેન્નાઈ સુપર કિંગ્સ સામે શાનદાર બોલિંગ કરતા ચાર ઓવરમાં 25 રન આપીને ત્રણ વિકેટ ઝડપી અને પોતાની ટીમ ગુજરાત ટાઇટન્સને આઠ વિકેટથી જીત અપાવી.

ચેન્નાઈની પિચ પર હાજર ભેજને કારણે ફાસ્ટ બોલરોને વધારાની મદદ મળી, જેનો રબાડાએ પૂરેપૂરો ફાયદો ઉઠાવ્યો. તેજ રફ્તાર અને વધારાના ઉછાળ સાથે તેણે બેટ્સમેનોને સતત પરેશાન કર્યા.

આ પ્રદર્શન સાથે રબાડા હવે આઠ મેચોમાં 13 વિકેટ લઈને પર્પલ કેપની યાદીમાં સંયુક્ત રીતે ત્રીજા સ્થાને પહોંચી ગયો છે. જ્યારે અંશુલ કંબોજ અને ઈશાન મલિંગા 14-14 વિકેટ સાથે ટોચના સ્થાને યથાવત છે.

ઓરેન્જ કેપમાં મોટો ઉલટફેર

બેટિંગની વાત કરીએ તો એક જ દિવસમાં ઓરેન્જ કેપની રેસ સંપૂર્ણપણે બદલાઈ ગઈ. વિરાટ કોહલી 24 કલાકની અંદર પ્રથમ સ્થાનેથી ખસીને પાંચમા સ્થાને પહોંચી ગયો.

દિલ્હીમાં રમાયેલી મેચમાં કેએલ રાહુલે અણનમ 152 રન બનાવીને વીસ ઓવરના ફોર્મેટમાં કોઈ ભારતીયનો સર્વોચ્ચ સ્કોર નોંધાવ્યો અને 357 રન સાથે ટોચનું સ્થાન મેળવી લીધું.

જોકે, જયપુરમાં યુવા બેટ્સમેન વૈભવ સૂર્યવંશીએ 37 બોલમાં 103 રનની ઇનિંગ રમીને રાહુલની બરાબરી કરતા 357 રન બનાવી લીધા અને વધુ સારા સ્ટ્રાઈક રેટના આધારે ઓરેન્જ કેપ પોતાના નામે કરી લીધી.

આના થોડા સમય બાદ જ અભિષેક શર્માએ 29 બોલમાં 57 રનની ઇનિંગ રમીને 380 રન સાથે બેટિંગ યાદીમાં પ્રથમ સ્થાન મેળવી લીધું.

અભિષેક શર્મા 380 રન સાથે પ્રથમ સ્થાને છે. વૈભવ સૂર્યવંશી અને કેએલ રાહુલ 357-357 રન સાથે અનુક્રમે બીજા અને ત્રીજા સ્થાને છે.

હેનરિક ક્લાસેન 349 રન સાથે ચોથા સ્થાને પહોંચી ગયા છે, જ્યારે શુભમન ગિલ (330 રન) અને વિરાટ કોહલી (328 રન) અનુક્રમે તેમની પાછળ છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ