વાપી, 27 એપ્રિલ (હિ.સ.) વાપી જી.આઈ.ડી.સી ના સેકન્ડ ફેઝમાં આવેલી ક્રિએટિવ ટેક્સટાઇલ મિલ પ્રા.લી. માં થયેલી આગની ઘટનાને લઈ ગુજરાત પોલ્યૂશન કંટ્રોલ બોર્ડ ના રીજનલ મેનેજરે પ્રાથમિક રીતે શોર્ટ સર્કિટને આગનું કારણ ગણાવ્યું છે. જોકે આ નિવેદન બાદ પણ સ્થાનિક સ્તરે અનેક સવાલો ઊભા થયા છે.માહિતી અનુસાર, ટેક્સટાઇલ યુનિટમાં લાગેલી આગે થોડા જ સમયમાં વિકરાળ સ્વરૂપ ધારણ કર્યું હતું, જેમાં મોટા પ્રમાણમાં કાચું માલ સળગી ગયું હતું. સદભાગ્યે કોઈ જાનહાની નોંધાઈ નથી, પરંતુ લાખો રૂપિયાનું નુકસાન થયાનું સામે આવ્યું છે.ઉલ્લેખનીય છે કે વાપી જેવા મોટા ઔદ્યોગિક હબમાં ખાસ કરીને માર્ચ અને એપ્રિલ મહિનામાં આવી આગની ઘટનાઓ વારંવાર સામે આવતી રહે છે. આવી સ્થિતિમાં પ્રશ્ન એ ઊભો થાય છે કે શું દરેક વખતે શોર્ટ સર્કિટ જ કારણ બની શકે?સ્થાનિક લોકો અને કામદારોમાં ચર્ચા ચાલી રહી છે કે કેટલીક ઔદ્યોગિક એકમોમાં વારંવાર આગ લાગવાની પાછળ ઈન્શ્યોરન્સ ક્લેમનો એંગલ પણ હોઈ શકે છે. જોકે આ મુદ્દે કોઈ સત્તાવાર પુષ્ટિ નથી અને હકીકત તપાસ બાદ જ બહાર આવશે.આ સાથે જ ટેક્સટાઇલ યુનિટોમાં કેમિકલ્સ અને જ્વલનશીલ કાચા માલના સંગ્રહને ધ્યાનમાં લેતા ફાયર સેફ્ટી અને મોનિટરિંગ અંગે પણ ગંભીર સવાલો ઊભા થયા છે.હાલમાં જી.પી.સી.બી દ્વારા પ્રદૂષણ અને નિયમોના પાલન અંગે તપાસ ચાલુ હોવાનું જણાવાયું છે, પરંતુ વિગતવાર રિપોર્ટ જાહેર થવાની રાહ જોવામાં આવી રહી છે.

---------------

હિન્દુસ્થાન સમાચાર / Krishna Ghanshyam Jha