બોટાદ,28 એપ્રિલ (હિ.સ.)બોટાદ જિલ્લામાં યોજાયેલી સ્થાનિક સ્વરાજ્યની ચૂંટણીમાં ભારતીય જનતા પાર્ટી (ભાજપ) એ ફરી એકવાર પોતાની મજબૂત હાજરી નોંધાવી છે. ભીમડાદ જિલ્લા પંચાયત તેમજ ગોરડકા તાલુકા પંચાયતની બેઠકો પર ભાજપના ઉમેદવારોએ જીત મેળવીને પાર્ટીના કાર્યકરોમાં ઉત્સાહનો માહોલ સર્જ્યો છે.

ભીમડાદ જિલ્લા પંચાયત બેઠક પર ભાજપના ઉમેદવાર ચંદુભાઈએ નોંધપાત્ર પ્રદર્શન કરતાં તેમના નજીકના પ્રતિસ્પર્ધીને આશરે 800 મતોથી પરાજિત કર્યા હતા. મતગણતરી દરમિયાન શરૂઆતથી જ ચંદુભાઈ આગળ રહ્યા હતા અને અંત સુધી લીડ જાળવી રાખી હતી. આ જીતને ભાજપના મજબૂત સંગઠન અને કાર્યકરોની મહેનતનું પરિણામ માનવામાં આવી રહ્યું છે.

તે જ રીતે ગોરડકા તાલુકા પંચાયત બેઠક પર ભાજપની ઉમેદવાર નયનાબેન રાઠોડે પણ વિજય હાંસલ કર્યો છે. તેમની જીતથી સ્થાનિક સ્તરે મહિલાઓની રાજકારણમાં વધતી ભાગીદારીનો સકારાત્મક સંદેશ પણ મળ્યો છે. નયનાબેનની જીત પાછળ સ્થાનિક વિકાસ મુદ્દાઓ અને જનસમર્થન મુખ્ય કારણો ગણાઈ રહ્યા છે.

આ બંને જીત સાથે ભાજપે બોટાદ જિલ્લામાં પોતાનું પ્રભુત્વ વધુ મજબૂત બનાવ્યું છે. પાર્ટીના આગેવાનો અને કાર્યકરોએ આ વિજયને લોકવિશ્વાસની જીત ગણાવી છે. વિજય પછી કાર્યકરોમાં આનંદનો માહોલ જોવા મળ્યો હતો અને અનેક સ્થળોએ ઉજવણી પણ કરવામાં આવી હતી.

આ ચૂંટણી પરિણામો આવનારા સમયમાં જિલ્લામાં વિકાસના નવા દ્વાર ખોલશે તેવી આશા વ્યક્ત કરવામાં આવી રહી છે.

---------------

હિન્દુસ્થાન સમાચાર / GONDALIYA DISHANT