નવસારી, 28 એપ્રિલ (હિ.સ.): નવસારી મહાનગરપાલિકાની તાજેતરની ચૂંટણીમાં ભાજપે ફરી એકવાર બહુમતી મેળવી છે. કુલ 13 વોર્ડની 52 બેઠકોમાંથી ભાજપે 50 બેઠકો જીતીને સત્તા જાળવી રાખી છે, જ્યારે કોંગ્રેસને માત્ર 2 બેઠકોથી સંતોષ માનવો પડ્યો. પરિણામો સ્પષ્ટ રીતે ભાજપના પ્રભુત્વ દર્શાવે છે, પરંતુ આ સાથે કોંગ્રેસના વધતા વોટ શેરે રાજકીય ચર્ચાને જન્મ આપ્યો છે.

વોર્ડ નંબર 6માં સૌથી વધુ ટક્કરભર્યો મુકાબલો જોવા મળ્યો, જ્યાં કોંગ્રેસના ઉમેદવાર પિયુષ ઢીમ્મર માત્ર 3 મતના ખૂબ જ ઓછા અંતરથી પરાજિત થયા. આટલો નાનો માર્જિન કોંગ્રેસ માટે મહત્વપૂર્ણ માનવામાં આવી રહ્યો છે, કારણ કે તે દર્શાવે છે કે પાર્ટી કેટલીક જગ્યાએ મજબૂત સ્પર્ધા આપી રહી છે.

વિશ્લેષણ મુજબ, ખાસ કરીને મુસ્લિમ બહુમતી ધરાવતા વિસ્તારોમાં આમ આદમી પાર્ટી અને AIMIMના પ્રવેશને કારણે મત વિભાજન થયું હોવાનું માનવામાં આવે છે. પરંપરાગત રીતે કોંગ્રેસ તરફ જતા મતોમાં ભાગ પડતા ભાજપને ફાયદો થયો હોવાનું કહેવાય છે. છતાં, કોંગ્રેસના ધીમે ધીમે વધતા વોટ શેરને ધ્યાનમાં લેતા, આગામી ચૂંટણીઓમાં સ્પર્ધા વધુ કઠિન બનવાની શક્યતા વ્યક્ત થઈ રહી છે.

---------------

હિન્દુસ્થાન સમાચાર / યજુવેન્દ્ર દુબે