કચ્છ, 28 એપ્રિલ (હિ.સ.) : મહાનગરપાલિકા, નગરપાલિકા, જિલ્લા-તાલુકા પંચાયતોમાં બહુમતી સાથે સત્તા કબજે • કોંગ્રેસ સીમિત, આપનો નગણ્ય પ્રવેશ.

કચ્છ જિલ્લામાં યોજાયેલી સ્થાનિક સ્વરાજ્ય સંસ્થાઓની ચૂંટણીના જાહેર થયેલા પરિણામોએ જિલ્લાના રાજકીય નકશાને ફરી એકવાર ભગવામય બનાવી દીધો છે. ગાંધીધામ મહાનગરપાલિકાથી લઈને તાલુકા પંચાયતો સુધી ભાજપે બહોળા મતઅંતરથી જીત મેળવી પોતાની સંગઠન શક્તિ અને મતદારોમાં વિશ્વાસને મજબૂત રીતે સ્થાપિત કર્યો છે. અનેક બેઠકો પર કોંગ્રેસે પડકાર આપવાનો પ્રયાસ કર્યો હોવા છતાં એકંદર ચિત્ર ભાજપના એકહથ્થા પ્રભાવ તરફ ઝૂકેલું જોવા મળ્યું છે. આમ આદમી પાર્ટીનો પ્રવેશ ગણતરીની બેઠકો પૂરતો મર્યાદિત રહ્યો છે જ્યારે કેટલાક વિસ્તારોમાં બિનહરીફ ચૂંટાયેલા ઉમેદવારો પણ ચૂંટણીના રસપ્રદ પાસા બન્યા છે.

ગાંધીધામ મહાનગરપાલિકામાં ભાજપની ભવ્ય વાપસી

કચ્છની સૌથી પ્રતિષ્ઠિત શહેરી સંસ્થા ગણાતી ગાંધીધામ મહાનગરપાલિકાની કુલ 52 બેઠકોમાંથી ભાજપે 40 બેઠકો પર વિજય મેળવતા સત્તા પર પોતાની મજબૂત પકડ જાળવી રાખી છે. કોંગ્રેસને અહીં 11 બેઠકો મળતાં મુખ્ય વિરોધપક્ષ તરીકે સ્થાન મળ્યું છે, જ્યારે એક બેઠક બિનહરીફ જાહેર થઈ હતી. વેપારી, ઔદ્યોગિક અને વસાહતી મતવિસ્તારમાં ભાજપને મળેલું આ પ્રચંડ સમર્થન આગામી શહેરી વિકાસના એજન્ડા માટે મહત્વપૂર્ણ માનવામાં આવે છે.

જિલ્લા પંચાયત પણ ભાજપના ખાતામાં, ગ્રામ્ય મતદારોનો વિશ્વાસ યથાવત

કચ્છ જિલ્લા પંચાયતની કુલ 38 બેઠકોમાંથી ભાજપે 26 બેઠકો જીતીને સ્પષ્ટ બહુમતી મેળવી છે. કોંગ્રેસ માત્ર 4 બેઠકો સુધી સીમિત રહી છે. એક બેઠક બિનહરીફ જાહેર થતા કુલ જાહેર પરિણામોમાં ભાજપનો દબદબો સ્પષ્ટ બન્યો છે. ગ્રામ્ય વિસ્તારોમાં વિકાસના કામો, રસ્તા-પાણી-સિંચાઈના પ્રશ્નો અને કાર્યકર્તા સંપર્ક અભિયાન ભાજપ માટે ફાયદાકારક બન્યા હોવાનું રાજકીય વર્તુળોમાં ચર્ચાઈ રહ્યું છે.

ભુજ નગરપાલિકામાં ભાજપ આગળ, કોંગ્રેસે ટક્કર જાળવી

જિલ્લા મથક ભુજ નગરપાલિકાની કુલ 44 બેઠકોમાંથી ભાજપે 22 બેઠકો કબજે કરી છે, જ્યારે કોંગ્રેસે 13 બેઠકો મેળવી નોંધપાત્ર હાજરી આપી છે. અપક્ષ અને અન્ય પક્ષોને 3 બેઠકો મળી છે. 6 બેઠકો બિનહરીફ જાહેર થતાં અહીં સીધી ચૂંટણીની સંખ્યા ઘટી હતી. ભુજમાં ભાજપને બહુમતી મળવા છતાં કોંગ્રેસનો મતપ્રભાવ સંપૂર્ણપણે ઘટ્યો નથી તેવો સંદેશ પણ આ પરિણામોમાંથી બહાર આવ્યો છે.

માંડવી નગરપાલિકામાં ભાજપનો ક્લીન સ્વીપ

માંડવી નગરપાલિકાની તમામ 36 બેઠકો ભાજપના ખાતામાં જતાં અહીં કોંગ્રેસ અને અન્ય પક્ષો માટે કોઈ અવકાશ રહ્યો નથી. સંપૂર્ણ એકતરફી પરિણામે માંડવી શહેરમાં ભાજપના સંગઠન, સ્થાનિક નેતૃત્વ અને મતદારો સાથેની સીધી જોડાણની અસર સ્પષ્ટ દેખાઈ છે.

મુંદરા-બારોઈ, નખત્રાણા અને અંજારમાં પણ ભાજપનો પ્રભાવ

મુંદરા-બારોઈ નગરપાલિકાની 28 બેઠકોમાંથી ભાજપે 19 અને કોંગ્રેસે 9 બેઠકો જીતી છે.

નખત્રાણા નગરપાલિકામાં ભાજપે 19 બેઠકો સાથે લીડ મેળવી જ્યારે કોંગ્રેસ 3 બેઠકો સુધી મર્યાદિત રહી છે.

અંજાર નગરપાલિકામાં કુલ 36માંથી ભાજપે 20, કોંગ્રેસે 9 બેઠકો મેળવી છે અને 7 બેઠકો બિનહરીફ જાહેર થઈ છે.આ ત્રણેય નગરપાલિકાના પરિણામો દર્શાવે છે કે કચ્છના મધ્યમ કદના શહેરી વિસ્તારોમાં પણ ભાજપનો મત આધાર અડગ રહ્યો છે.

તાલુકા પંચાયતોમાં ભાજપનો વ્યાપક પ્રભાવ

કચ્છની તાલુકા પંચાયતોના પરિણામો પણ ભાજપ માટે ઉત્સાહજનક સાબિત થયા છે.

અબડાસા તાલુકા પંચાયત – ભાજપ 10, કોંગ્રેસ 3

અંજાર તાલુકા પંચાયત – ભાજપ 14, કોંગ્રેસ 5

ભચાઉ તાલુકા પંચાયત – ભાજપ 16, કોંગ્રેસ 1

ભુજ તાલુકા પંચાયત – ભાજપ 9, કોંગ્રેસ 4

લખપત તાલુકા પંચાયત – ભાજપ 9, કોંગ્રેસ 7

માંડવી તાલુકા પંચાયત – ભાજપ 8, કોંગ્રેસ 1

મુંદરા તાલુકા પંચાયત – ભાજપ 10, કોંગ્રેસ 8

નખત્રાણા તાલુકા પંચાયત – ભાજપ 11, કોંગ્રેસ 7

રાપર તાલુકા પંચાયત – ભાજપ 13, કોંગ્રેસ 2, આપ 1

આ આંકડાઓ દર્શાવે છે કે ગ્રામ્ય મતવિસ્તારોમાં ભાજપે મજબૂત સંગઠન અને બૂથ મેનેજમેન્ટના બળે જીતનો ધ્વજ ફરકાવ્યો છે, જોકે કેટલાક વિસ્તારોમાં કોંગ્રેસે સન્માનજનક લડત આપી છે.

બિનહરીફ બેઠકો બન્યાં ચૂંટણીનું વિશેષ આકર્ષણ

આ ચૂંટણીમાં અનેક બેઠકો બિનહરીફ જાહેર થવી પણ નોંધપાત્ર બાબત રહી છે. ખાસ કરીને અંજાર, ભચાઉ, ભુજ અને ગાંધીધામ જેવા વિસ્તારોમાં કેટલાક ઉમેદવારોને વિરોધી પક્ષ દ્વારા સીધો પડકાર ન મળતા તેઓ પૂર્વે જ વિજેતા બન્યા હતા. રાજકીય વિશ્લેષકોનું માનવું છે કે આ બિનહરીફ બેઠકો ભાજપના મજબૂત પૂર્વસંયોજન અને વિરોધ પક્ષની કમજોરીનું પ્રતિબિંબ છે.

કોંગ્રેસ માટે આત્મમંથનનો સમય, આપ માટે હજી લાંબી રાહ

ચૂંટણી પરિણામોમાં કોંગ્રેસને કેટલીક બેઠકો મળતાં કાર્યકર્તાઓમાં થોડું સંતોષ છે, પરંતુ સત્તા સુધી પહોંચે તેવી સંખ્યા ક્યાંય જોવા મળી નથી. ખાસ કરીને શહેરી વિસ્તારોમાં કોંગ્રેસનો પ્રભાવ અગાઉની સરખામણીએ સીમિત રહ્યો છે. આમ આદમી પાર્ટી માટે પણ આ ચૂંટણી કોઈ મોટી રાજકીય અસર ઉભી કરી શકી નથી અને માત્ર એકાદ બેઠક સુધી જ તેનો પ્રવેશ નોંધાયો છે.

મતદારોનો સ્પષ્ટ સંદેશ : સ્થિર નેતૃત્વને પ્રાથમિકતા

ચૂંટણીના કુલ પરિણામો પરથી સ્પષ્ટ થાય છે કે કચ્છના મતદારો આ વખતે સ્થિર નેતૃત્વ, વિકાસલક્ષી અભિગમ અને મજબૂત સંગઠન ધરાવતા પક્ષ તરફ વધુ ઝૂક્યા છે. ભાજપે ગ્રામ્ય અને શહેરી બંને વિસ્તારોમાં મતદારો સાથે સતત સંપર્ક જાળવી રાખ્યો હતો, જેનો સીધો લાભ મતપેટીમાં મળ્યો છે.

કચ્છની રાજકીય ધરતી પર આ પરિણામો માત્ર જીત-હાર નહીં પરંતુ આગામી વિધાનસભા અને લોકસભા ચૂંટણી માટેનું પ્રારંભિક રાજકીય સંકેત પણ માનવામાં આવી રહ્યા છે.

મુખ્ય આંકડા એક નજરે

ગાંધીધામ મહાનગરપાલિકા : ભાજપ 40 / કોંગ્રેસ 11

કચ્છ જિલ્લા પંચાયત : ભાજપ 26 / કોંગ્રેસ 4

ભુજ નગરપાલિકા : ભાજપ 22 / કોંગ્રેસ 13

માંડવી નગરપાલિકા : ભાજપ 36 (સંપૂર્ણ કબજો)

મુંદરા-બારોઈ નગરપાલિકા : ભાજપ 19 / કોંગ્રેસ 9

રાપર તાલુકા પંચાયત : ભાજપ 13 / કોંગ્રેસ 2 / આપ 1

“કચ્છમાં ફરી એકવાર કમળ ખીલ્યું, વિરોધ પક્ષો માટે સંગઠન અને વ્યૂહરચનાનો ગંભીર સંદેશ”

---------------

હિન્દુસ્થાન સમાચાર / Rohit R. Padhiyar