ભાવનગર, 29 એપ્રિલ (હિ.સ.) : ભાવનગર શહેરમાં કાયદો અને વ્યવસ્થા જાળવવા પોલીસ દ્વારા સતત કાર્યવાહી હાથ ધરવામાં આવી રહી છે. તે જ ક્રમમાં ભાવનગર લોકલ ક્રાઇમ બ્રાન્ચને મોટી સફળતા મળી છે. વરતેજ પોલીસ સ્ટેશનમાં દાખલ થયેલા મારામારી તથા એટ્રોસિટી એક્ટ હેઠળના ગુનામાં લાંબા સમયથી ફરાર રહેલા આરોપીને ઝડપી પાડવામાં આવ્યો છે.

માહિતી અનુસાર, લોકલ ક્રાઇમ બ્રાન્ચના પોલીસકર્મીઓ વરતેજ પોલીસ સ્ટેશન વિસ્તારમાં પેટ્રોલિંગમાં હતા. તે દરમિયાન તેમને ગુપ્ત બાતમી મળી હતી કે ગુનામાં પકડવાના બાકી આરોપી સંજયભાઈ પ્રવિણભાઈ રાઠોડ ભંડારીયા ગામના બસ સ્ટેશન પાસે હાજર છે. બાતમીના આધારે પોલીસે તાત્કાલિક સ્થળ પર પહોંચી તપાસ હાથ ધરી હતી.

પોલીસે જણાવ્યા મુજબ, આરોપી સફેદ-વાદળી ચેક શર્ટ અને ભૂરા રંગના લોઅર પહેરીને બસ સ્ટેશન નજીક ઉભો હતો. ચોક્કસ ઓળખ મળતા પોલીસે તેને ઝડપી પાડ્યો હતો. આરોપી સંજયભાઈ રાઠોડ (ઉંમર ૩૦), જે હીરાના કામ સાથે સંકળાયેલા છે અને મૂળ ભંડારીયા ગામના રહેવાસી છે, તેની સામે કાયદેસર કાર્યવાહી કરવામાં આવી છે.

પકડાયેલ આરોપીને વધુ તપાસ માટે વરતેજ પોલીસ સ્ટેશનને સોંપવામાં આવ્યો છે. પોલીસ દ્વારા ગુનાની વિગતવાર તપાસ ચાલી રહી છે અને અન્ય સંડોવાયેલા લોકો અંગે પણ તપાસ હાથ ધરાઈ રહી છે.

આ કાર્યવાહીથી વિસ્તારના લોકોમાં સુરક્ષાનો ભાવ મજબૂત બન્યો છે. ભાવનગર પોલીસ દ્વારા ગુનેગારો સામે કડક કાર્યવાહી ચાલુ રાખવામાં આવશે તેવી ખાતરી પણ આપવામાં આવી છે.

---------------

હિન્દુસ્થાન સમાચાર / GONDALIYA DISHANT