અમરેલી, 29 એપ્રિલ (હિ.સ.) : ઇંગોરાળા ગામે ભવ્ય સંત ભંડારાનું આયોજન કરવામાં આવ્યું હતું, જેમાં મોટી સંખ્યામાં ભક્તજનો ઉપસ્થિત રહ્યા હતા. આ પવિત્ર પ્રસંગે પ્રસિદ્ધ સંત ભક્તિ બાપુ ઉપસ્થિત રહ્યા અને ભક્તોને આશીર્વાદ આપ્યા હતા. તેમના આશીર્વચનોથી સમગ્ર વાતાવરણ આધ્યાત્મિક ઊર્જાથી ઓતપ્રોત બની ગયું હતું.

ભક્તિ બાપુએ પોતાના પ્રવચનમાં સંતો અને ભંડારાના મહત્ત્વ વિશે વિસ્તૃત સમજ આપી. તેમણે જણાવ્યું કે સંતોનું જીવન માનવ સમાજ માટે પ્રેરણાસ્ત્રોત છે અને તેમના માર્ગદર્શનથી વ્યક્તિ જીવનમાં સાચો માર્ગ અપનાવી શકે છે. ભંડારો માત્ર પ્રસાદ વિતરણનો કાર્યક્રમ નથી, પરંતુ તે સેવા, દયા અને પરોપકારના સંદેશને પ્રસરાવવાનો એક મહત્વપૂર્ણ ઉપક્રમ છે.

તેમણે વધુમાં ઉમેર્યું કે ભંડારામાં સહભાગી થવાથી મનમાં શાંતિ અને સંતોષની અનુભૂતિ થાય છે અને સમાજમાં એકતા અને સહકારની ભાવના મજબૂત બને છે. કાર્યક્રમ દરમિયાન ભક્તોએ ભક્તિપૂર્વક સંતોના આશીર્વાદ લીધા અને પ્રસાદ ગ્રહણ કર્યો. આ ભવ્ય આયોજનથી ઇંગોરાળા ગામમાં ધાર્મિક અને સામાજિક એકતાનું સુંદર દ્રશ્ય સર્જાયું હતું, જે ભક્તોમાં લાંબા સમય સુધી યાદગાર રહેશે.

---------------

હિન્દુસ્થાન સમાચાર / Gondaliya Abhishek Nandrambhai