-અત્યાર સુધી 5 કિલોના લગભગ 8,90,000 સિલિન્ડરનું વેચાણ

નવી દિલ્હી, 08 એપ્રિલ (હિ.સ.) પશ્ચિમ એશિયામાં સીઝફાયર (યુદ્ધવિરામ)ની જાહેરાતનું સ્વાગત કરતાં કેન્દ્ર સરકારે બુધવારે જણાવ્યું કે, આથી વિસ્તારમાં સ્થાયી શાંતિ સ્થાપિત થવાની આશા છે. સરકારે જણાવ્યું કે દેશમાં પેટ્રોલ અને ડીઝલની સપ્લાય સંપૂર્ણપણે સ્થિર છે. તેલ રિફાઇનરીઓ પૂરતા કાચા તેલ સાથે સંપૂર્ણ ક્ષમતાએ કાર્યરત છે, જ્યારે 23 માર્ચથી અત્યાર સુધીમાં 5 કિલોના લગભગ 8,90,000 ગેસ સિલિન્ડર વેચાઈ ચૂક્યા છે. કોલસા આધારિત વીજળી દેશની ઊર્જાની જરૂરિયાતોના લગભગ 70 ટકા હિસ્સો પૂરું પાડતી રહી છે.

પેટ્રોલિયમ અને નેચરલ ગેસ મંત્રાલયની સંયુક્ત સચિવ (માર્કેટિંગ અને ઓઇલ રિફાઇનરી) સુજાતા શર્માએ આંતર-મંત્રાલયીય પ્રેસવાર્તામાં આ માહિતી આપી. તેમણે જણાવ્યું કે છેલ્લા પાંચ દિવસમાં ઓઇલ માર્કેટિંગ કંપનીઓએ લગભગ 1,600 જાગૃતિ કેમ્પ યોજ્યા છે, જેમાં આશરે 14,000 સિલિન્ડર વિતરણ કરવામાં આવ્યા છે. તેમણે જણાવ્યું કે, ગઈકાલે લગભગ 1.1 લાખ ગેસ સિલિન્ડરની સપ્લાય કરવામાં આવી હતી, જેના કારણે 23 માર્ચથી અત્યાર સુધી 5 કિલોના ગેસ સિલિન્ડરની કુલ વેચાણ સંખ્યા લગભગ 8.9 લાખ સુધી પહોંચી ગઈ છે.

તેમણે જણાવ્યું કે, ઘરેલું જરૂરિયાતોને પ્રાથમિકતા આપવામાં આવી રહી છે, જેમાં ખાતર બનાવતા પ્લાન્ટોને લગભગ 95 ટકા ગેસ સપ્લાય આપવામાં આવી રહી છે. પેટ્રોલ અને ડીઝલની સપ્લાય સંપૂર્ણપણે સ્થિર છે અને ક્યાંય કોઈ અછત નથી, કારણ કે રિફાઇનરીઓ પૂરતા કાચા તેલ સાથે સંપૂર્ણ ક્ષમતાએ કાર્યરત છે. શર્માએ જણાવ્યું કે, સપ્લાય વધારવા માટે સરકારે સી3 અને સી4 સ્ટ્રીમને એલપીજી પૂલમાં મોકલવાના નિર્દેશ આપ્યા છે, જ્યારે પેટ્રોકેમિકલ્સ માટે તેનો મર્યાદિત ઉપયોગ કરવાની મંજૂરી આપવામાં આવી છે.

સુજાતા શર્માએ જણાવ્યું કે, નેચરલ ગેસ બાબતે ઘરેલું ગ્રાહકોને પ્રાથમિકતા આપવામાં આવી છે અને તેમની સપ્લાય સુરક્ષિત રાખવામાં આવી છે. સાથે સાથે ઉદ્યોગોને પણ નેચરલ ગેસની સપ્લાય શરૂ કરવામાં આવી છે. ડ્રાફ્ટ સ્ટેટ સીબીજી પોલિસી જાહેર કરવામાં આવી છે. જે રાજ્ય આ નીતિને અપનાવશે તેમને વધારાના કોમર્શિયલ એલપીજી ફાળવણીમાં પ્રાથમિકતા આપવામાં આવશે. ભારત સરકારે તમામ રાજ્ય સરકારો અને કેન્દ્રશાસિત પ્રદેશોને પત્ર લખીને એવા સુધારાઓ અમલમાં મૂકવા વિનંતી કરી છે જેથી પ્રાથમિકતા ધરાવતા કોમર્શિયલ એલપીજીની સપ્લાય સરળ બને. અત્યાર સુધીમાં લગભગ 18 રાજ્યોએ આ દિશામાં પગલાં લીધાં છે અને તેમને વધારાનું એલપીજી ફાળવવામાં આવ્યું છે.

પેટ્રોલિયમ અને નેચરલ ગેસ મંત્રાલયની સંયુક્ત સચિવએ જણાવ્યું કે, માર્ચથી અત્યાર સુધીમાં લગભગ 3,87,000 પીએનજી કનેક્શન આપવામાં આવ્યા છે અને આશરે 4,21,000 નવા ગ્રાહકો નોંધાયા છે. જેમના પાસે એલપીજી અને પીએનજી બંને કનેક્શન છે, તેમને એલપીજી કનેક્શન સરેન્ડર કરવા વિનંતી કરવામાં આવી છે. અત્યાર સુધીમાં 17,000થી વધુ ગ્રાહકોએ પોતાનું એલપીજી કનેક્શન સરેન્ડર કર્યું છે. સાથે જ તમામ નાગરિકોને અપીલ કરવામાં આવી છે કે તેઓ અફવાઓ પર ધ્યાન ન આપે અને પોતાની જરૂરિયાત મુજબ જ ઇંધણ ખરીદે.

શર્માએ જણાવ્યું કે, ગડબડીઓ રોકવા માટે દેખરેખ વધારી દેવામાં આવી છે. તાજેતરમાં લગભગ 4,000 દરોડા પાડવામાં આવ્યા અને છેલ્લા થોડા દિવસોમાં આશરે 56,000 સિલિન્ડર જપ્ત કરવામાં આવ્યા છે. ઓઇલ માર્કેટિંગ કંપનીઓએ 1,770 કારણ બતાવો નોટિસ જારી કરી છે, 51 ડિસ્ટ્રીબ્યુટરોને સસ્પેન્ડ કર્યા છે અને 175 સામે કાર્યવાહી કરી છે. પેટ્રોલ, ડીઝલ અને એલપીજીની સપ્લાય સતત ચાલુ છે. નાગરિકોને સલાહ આપવામાં આવી છે કે તેઓ ગભરાય નહીં અને માત્ર સત્તાવાર માહિતી પર જ વિશ્વાસ કરે.

સીઝફાયરનું સ્વાગત : વિદેશ મંત્રાલય

વિદેશ મંત્રાલયના પ્રવક્તા રણધીર જયસવાલએ ઈરાન અને અમેરિકા વચ્ચે થયેલા સીઝફાયરનું સ્વાગત કરતાં આશા વ્યક્ત કરી કે આથી પશ્ચિમ એશિયામાં સ્થાયી શાંતિ આવશે. તેમણે જણાવ્યું કે સંઘર્ષને શક્ય તેટલો વહેલો સમાપ્ત કરવા માટે તણાવ ઘટાડવો, સંવાદ અને કૂટનીતિ ખૂબ જ જરૂરી છે. આ સંઘર્ષને કારણે લોકો પહેલેથી જ ભારે મુશ્કેલીનો સામનો કરી રહ્યા છે અને વિશ્વભરમાં ઊર્જાની સપ્લાય તથા વેપાર નેટવર્ક પર પણ અસર પડી છે. તેમણે આશા વ્યક્ત કરી કે હોર્મુઝ જળમાર્ગ મારફતે જહાજોની અવરજવર સંપૂર્ણપણે સ્વતંત્ર રહેશે અને વૈશ્વિક વેપારનો પ્રવાહ યથાવત્ રહેશે. ભારત શાંતિ અને સ્થિરતા લાવતાં તમામ પગલાંનું સ્વાગત કરે છે. તેમણે આશા વ્યક્ત કરી કે પશ્ચિમ એશિયાની આ ઘટનાઓ યુક્રેનમાં શાંતિના પ્રયાસોને પણ પ્રોત્સાહન આપશે.

ખાણો અને વીજ ઉત્પાદન કેન્દ્રોમાં કોલસાનો પૂરતો જથ્થો

કોલસા મંત્રાલયના સંયુક્ત સચિવ સંજીવ કુમાર કાસીએ જણાવ્યું કે, ખાણો, વીજ ઉત્પાદન પ્લાન્ટો, બંદરો અને ટ્રાન્ઝિટમાં કોલસાનો પૂરતો જથ્થો ઉપલબ્ધ છે, જેને ખૂબ જ ઓછા સમયની સૂચના પર ગ્રાહકોને પૂરો પાડી શકાય છે. તેમણે જણાવ્યું કે વીજ ઉત્પાદન મામલે કોઈ પણ પ્રકારની અછત નથી અને કોલસાનું ઉત્પાદન તથા તેનો ઉપયોગ લગભગ સમાન ગતિએ ચાલી રહ્યો છે.

તેમણે દાવો કર્યો કે, ભારત પાસે હાલમાં ખાણો અને વીજ ઉત્પાદન પ્લાન્ટોમાં પૂરતો કોલસાનો જથ્થો છે, જેથી જરૂર પડે ત્યારે ખૂબ ઓછા સમયમાં સપ્લાય ઉપલબ્ધ કરી શકાય. વીજ ઉત્પાદન ક્ષમતામાં કોઈ અછત નથી, કારણ કે કોલસાનું ઉત્પાદન તેની ખપતના સ્તર સાથે સંતુલિત રીતે ચાલી રહ્યું છે.

તેમણે વધુમાં જણાવ્યું કે, કોલસા આધારિત વીજળી દેશની ઊર્જાની જરૂરિયાતોના લગભગ 70 ટકા ભાગને પૂર્ણ કરતી રહી છે. સંકલિત પ્રયત્નો દ્વારા ભારતે કોલસાની સસ્તી અને પૂરતી સપ્લાય જાળવી રાખી છે અને સતત બીજા વર્ષે 1 અબજ ટન કોલસા ઉત્પાદનનું લક્ષ્ય હાંસલ કર્યું છે.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / માધવી વ્યાસ