નવી દિલ્હી, 01 મે (હિ.સ.) આગામી જુલાઈમાં યોજાનારી ભારતની બ્રિક્સ અધ્યક્ષતા હેઠળ મહિલા કાર્ય જૂથની બેઠકની તૈયારીઓના સંદર્ભમાં શુક્રવારે મહિલા અને બાળ વિકાસ મંત્રાલય દ્વારા પ્રથમ બેઠક યોજવામાં આવી હતી. જેમાં મહિલાઓના નેતૃત્વ હેઠળના વિકાસ પર વિશેષ ભાર મૂકવામાં આવ્યો હતો.

બ્રિક્સ મહિલા કાર્ય જૂથની પ્રથમ તૈયારી બેઠક વર્ચ્યુઅલ માધ્યમથી આયોજિત કરવામાં આવી હતી. આ બેઠકમાં બ્રિક્સ દેશોના પ્રતિનિધિઓ સાથે ભારત સરકારના વિવિધ મંત્રાલયો અને વિભાગોના વરિષ્ઠ અધિકારીઓએ ભાગ લીધો હતો. યુએન વુમન અને ફિક્કી જેવા ભાગીદારો પણ આમાં જોડાયા હતા. બેઠકની અધ્યક્ષતા મંત્રાલયના અધિક સચિવ કેરાલિન ખોંગવાર દેશમુખે કરી હતી. તેમણે તમામ પ્રતિનિધિઓનું સ્વાગત કરીને ચર્ચાની રૂપરેખા રજૂ કરી હતી.

મંત્રાલયે શુક્રવારે એક નિવેદનમાં જણાવ્યું હતું કે, ભારતની બ્રિક્સ અધ્યક્ષતાની થીમ ‘લચીલાપણું, નવીનતા, સહકાર અને સાતત્ય માટે નિર્માણ’ ને અનુરૂપ બેઠકમાં મહિલાઓને સ્પર્શતા વૈશ્વિક મુદ્દાઓ પર ગહન ચર્ચા કરવામાં આવી હતી. આ દરમિયાન ચાર મુખ્ય ક્ષેત્રો પર વિશેષ ધ્યાન આપવામાં આવ્યું હતું- શાસન અને નેતૃત્વમાં મહિલાઓની ભાગીદારી, નાણાકીય અને ડિજિટલ સમાવેશ, મહિલા સાહસિકતા અને કૌશલ્ય વિકાસ તેમજ જળવાયુ પરિવર્તન પ્રક્રિયા, ખાદ્ય સુરક્ષા અને પોષણમાં મહિલાઓની ભૂમિકા.

બેઠકમાં ભારતે મહિલાઓને આર્થિક વિકાસ, સુશાસન અને સામાજિક પરિવર્તનનો મુખ્ય આધાર ગણાવીને મહિલાઓના નેતૃત્વ હેઠળના વિકાસ પ્રત્યેની પોતાની પ્રતિબદ્ધતા દોહરાવી હતી. બ્રિક્સના સભ્ય દેશોએ ભારતની અધ્યક્ષતાનું સ્વાગત કર્યું હતું અને સૂચિત પ્રાથમિકતાઓને ટેકો આપીને સહયોગ વધારવા પર ભાર મૂક્યો હતો.

નોંધનીય છે કે, બેઠકમાં થયેલી ચર્ચાઓ આગામી બ્રિક્સ મહિલા કાર્ય જૂથની બેઠક (6–7 જુલાઈ 2026) અને બ્રિક્સ મહિલા મંત્રી સ્તરની બેઠક (8–9 જુલાઈ 2026) માટે માર્ગદર્શક સાબિત થશે, જે કેરળના કોચ્ચિમાં આયોજિત કરવામાં આવશે.

હિન્દુસ્થાન સમાચાર / વિજયાલક્ષ્મી / પવન કુમાર

હિન્દુસ્થાન સમાચાર / માધવી વ્યાસ