જામનગર, 28 મે (હિ.સ.) જામનગર જિલ્લામાં ગઈકાલે બનેલા બે અલગ અલગ માર્ગ અકસ્માતોમાં બે વ્યક્તિના મૃત્યુ નિપજતા અરેરાટી ફેલાઈ હતી. બંને બનાવ અંગે સંબંધિત પોલીસ સ્ટેશનોમાં ગુનાઓ નોંધી વધુ તપાસ હાથ ધરવામાં આવી છે.

પ્રથમ બનાવ મેઘપર (પડાણા) વિસ્તારમાં જામનગર-ખંભાળિયા હાઈવે ઉપર આશાપુરા હોટલ નજીક બન્યો હતો. અહીં એક બુલેટ મોટરસાયકલ ચાલકે બેફિકરાઈ અને ગફલતભરી રીતે વાહન હંકારી રોડ ક્રોસ કરી રહેલી જેઠીબેન ભલાભાઇ ફફફલ નામની 55 વર્ષની પ્રૌઢ મહિલાને હડફેટે લીધી હતી.

અકસ્માતમાં મહિલાને ગંભીર ઇજાઓ પહોંચતા તેમનું મૃત્યુ નિપજ્યું હતું. બનાવ અંગે મેઘપર (પડાણા) પોલીસ સ્ટેશનમાં ગુનો નોંધવામાં આવ્યો છે અને પોલીસે આગળની કાર્યવાહી હાથ ધરી છે.

બીજો બનાવ જામજોધપુર તાલુકાના શેઠ વડાળા પોલીસ મથક વિસ્તારમાં વનાણા ગામ નજીક ભટીયા પુલ પાસે બન્યો હતો. અહીં એક કાર ચાલકે પુરઝડપે અને ગફલતભરી રીતે કાર ચલાવી મોટરસાયકલને ટક્કર મારતા બાઈક સવાર રાજાભાઈ નામના 40 વર્ષના યુવાનનું મોત નિપજ્યું હતું, જ્યારે અન્ય એક વ્યક્તિને સામાન્ય ઇજા પહોંચી હતી.

અકસ્માત બાદ કાર ચાલક સ્થળ પરથી ફરાર થઈ ગયો હોવાનું પોલીસ તપાસમાં સામે આવ્યું છે. બનાવ અંગે શેઠ વડાળા પોલીસ સ્ટેશનમાં ગુનો નોંધી તપાસ શરૂ કરવામાં આવી છે. પોલીસ તંત્ર દ્વારા બંને અકસ્માતોની વધુ તપાસ હાથ ધરવામાં આવી રહી છે.

હિન્દુસ્થાન સમાચાર / Dhaval Nilesh bhai bhatt