વલસાડ, 30 મે (હિ.સ.) : વલસાડ જિલ્લા પોલીસની સ્પેશિયલ ઓપરેશન ગ્રુપ (એસઓજી) ટીમે નાનાપોંઢા તાલુકાના કોચરવા ગામના વડીયાવાડ વિસ્તારમાં દરોડો પાડી ગાંજાના જથ્થા સાથે ત્રણ આરોપીઓને ઝડપી પાડ્યા છે. પોલીસે તેમની પાસેથી 0.416 કિલોગ્રામ ગાંજો, ત્રણ મોબાઇલ ફોન, રોકડ રકમ તથા અન્ય સામગ્રી સહિત કુલ રૂ. 58,590નો મુદ્દામાલ કબજે કર્યો છે.

એસઓજી વલસાડના પીઆઈ ડી.ડી. પરમારની રાહબરીમાં કાર્યવાહી હાથ ધરવામાં આવી હતી. મળેલી બાતમીના આધારે એસઓજી ટીમે કોચરવાના વડીયાવાડ વિસ્તારમાં અશોકભાઈની ચાલીની પાછળ આવેલા ખુલ્લા મેદાનમાં દરોડો પાડ્યો હતો. કાર્યવાહીમાં કલીમ ઉર્ફે હકલા સૈયદ (ઉ.વ. 32), વિશાલ ગંજુ (ઉ.વ. 25) અને આકાશ ગુપ્તા (ઉ.વ. 24)ને ગેરકાયદે રીતે ગાંજાનો જથ્થો રાખતા ઝડપી પાડવામાં આવ્યા હતા. તપાસ દરમિયાન તેમની પાસેથી રૂ. 20,800 કિંમતનો 0.416 કિલોગ્રામ ગાંજો, રૂ. 32,000 કિંમતના ત્રણ મોબાઇલ ફોન, રૂ. 5,290 રોકડ, એક પ્લાસ્ટિક ખુરશી તેમજ ગાંજાના પેકિંગ માટે વપરાતી ખાલી પ્લાસ્ટિક પડીકીઓ મળી આવી હતી. આરોપીઓ વિરુદ્ધ NDPS એક્ટ, 1985ની કલમ 8(C), 20(B)(II)(A) અને 29 મુજબ ગુનો દાખલ કરી નાનાપોંઢા પોલીસ સ્ટેશનમાં વધુ તપાસ શરૂ કરવામાં આવી છે.

પોલીસ તપાસમાં સામે આવ્યું છે કે ત્રણેય આરોપીઓ સામે અગાઉ પણ વિવિધ પોલીસ મથકોમાં મારામારી, ચોરી, જુગાર, પ્રોહિબિશન અને અન્ય ગુનાઓ નોંધાયેલા છે. ખાસ કરીને મુખ્ય આરોપી કલીમ ઉર્ફે હકલા સામે 14 જેટલા ગુનાઓ નોંધાયેલા હોવાનું પોલીસ રેકોર્ડમાં સામે આવ્યું છે. એસઓજી વલસાડની આ કામગીરીમાં પીઆઈ ડી.ડી. પરમાર, પીએસઆઈ વાય.પી. હડીયા, પીએસઆઈ એસ.આર. સુસલાદે સહિત પોલીસ સ્ટાફના સભ્યોએ મહત્વની ભૂમિકા ભજવી હતી.

---------------

હિન્દુસ્થાન સમાચાર / Krishna Ghanshyam Jha