નવી દિલ્હી, 10 જૂન (હિ.સ.) અભિનેતા રામ ચરણની સ્પોર્ટ્સ એક્શન-ડ્રામા ફિલ્મ 'પેડ્ડી' બોક્સ ઓફિસ પર સતત કમાણી કરી રહી છે. બુચી બાબુ સનાના નિર્દેશનમાં બનેલી આ ફિલ્મે કામકાજના દિવસોમાં પણ મજબૂત પકડ જાળવી રાખી છે અને હવે તે ઝડપથી 200 કરોડ રૂપિયાની ક્લબ તરફ આગળ વધી રહી છે. ફિલ્મમાં રામ ચરણ સાથે જાહ્નવી કપૂર મુખ્ય ભૂમિકામાં છે.

સેકનિલ્કના પ્રારંભિક આંકડા અનુસાર, 'પેડ્ડી'એ રિલીઝના છઠ્ઠા દિવસે 9.65 કરોડ રૂપિયાનો બિઝનેસ કર્યો હતો. આ સાથે જ ઘરેલું બોક્સ ઓફિસ પર ફિલ્મનું કુલ નેટ કલેક્શન 179.35 કરોડ રૂપિયા સુધી પહોંચી ગયું છે. જ્યારે વિશ્વભરમાં ફિલ્મે 261.23 કરોડ રૂપિયાનું ગ્રોસ કલેક્શન નોંધાવ્યું છે. ફિલ્મમાં રામ ચરણ ઉપરાંત દિવ્યેન્દુ, બોમન ઈરાની અને શિવ રાજકુમાર પણ મહત્વની ભૂમિકામાં જોવા મળી રહ્યા છે.

બીજી તરફ, વરુણ ધવન, મૃણાલ ઠાકુર અને પૂજા હેગડે અભિનીત રોમેન્ટિક-કોમેડી 'હૈ જવાની તો ઈશ્ક હોના હૈ'ની કમાણી કામકાજના દિવસોમાં સ્થિર રહી છે. ફિલ્મે પાંચમા દિવસે 3.50 કરોડ રૂપિયાનો બિઝનેસ કર્યો હતો, જે ચોથા દિવસની કમાણી જેટલો જ છે. આ સાથે ફિલ્મનું કુલ નેટ કલેક્શન 31 કરોડ રૂપિયા સુધી પહોંચી ગયું છે. જોકે, 12 જૂને 'મેં વાપસ આઉંગા', 'ગવર્નર' અને 'ભારત ભાગ્ય વિધાતા' જેવી નવી ફિલ્મો રિલીઝ થયા બાદ, તેની સામે કપરો પડકાર ઊભો થઈ શકે છે.

હિન્દુસ્થાન સમાચાર / લોકેશ ચંદ્ર દુબે / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ