કચ્છ, 10 જૂન (હિ.સ.) : ભુજ શહેરમાં લગભગ ત્રણ મહિના અગાઉ બનેલી મોટરસાયકલ ચોરીની ઘટનાનો ભેદ ઉકેલી ભુજ શહેર બી ડિવિઝન પોલીસે મહત્વપૂર્ણ સફળતા મેળવી છે. સતત તપાસ, સર્વેલન્સ અને વાહન ચેકિંગ દરમિયાન મળેલી બાતમીના આધારે પોલીસે આરોપીને ઝડપી પાડી ચોરી કરાયેલ મોટરસાયકલ પણ કબજે કરી છે.

પશ્ચિમ કચ્છ જિલ્લામાં મિલકત સંબંધિત ગુનાઓને અટકાવવા તેમજ અગાઉ નોંધાયેલા અને હજુ સુધી ન ઉકેલાયેલા ગુનાઓનો ભેદ ઉકેલવા માટે પોલીસ વિભાગ દ્વારા વિશેષ ઝુંબેશ હાથ ધરવામાં આવી રહી છે. સાથે જ નંબર પ્લેટ વગર ફરતા વાહનો અને કાળા કાચ ધરાવતા વાહનો સામે પણ સઘન કાર્યવાહી કરવામાં આવી રહી છે. આ અભિયાનના ભાગરૂપે ભુજ શહેર બી ડિવિઝન પોલીસ સ્ટેશનના અધિકારીઓએ અલગ-અલગ ટીમો બનાવી વિવિધ વિસ્તારોમાં વાહન ચેકિંગ શરૂ કર્યું હતું.

આ દરમિયાન સર્વેલન્સ ટીમ 36 ક્વાર્ટર ચાર રસ્તાથી લખુરાઈ પુલ તરફ જતા માર્ગ પર અચાનક વાહન ચેકિંગ કરી રહી હતી. ત્યારે પોલીસને ખાનગી બાતમી મળી હતી કે એક વ્યક્તિ નંબર પ્લેટ વગરની કાળા રંગની એચ.એફ. ડિલક્સ મોટરસાયકલ લઈને વિસ્તારમાં ફરી રહ્યો છે અને વાહન અંગે કોઈ આધાર-પુરાવા તેની પાસે નથી. બાતમીના આધારે પોલીસે શંકાસ્પદ વાહનને અટકાવી તપાસ હાથ ધરી હતી.

વાહનચાલક પાસે મોટરસાયકલના કોઈ દસ્તાવેજો ન મળતા પોલીસે વધુ પૂછપરછ શરૂ કરી હતી. શરૂઆતમાં ટાળટૂળ કરનાર વ્યક્તિએ અંતે કબૂલાત કરી હતી કે તેણે આ મોટરસાયકલ ત્રણ મહિના અગાઉ ભુજના આર.ટી.ઓ. સર્કલ નજીકથી ચોરી કરી હતી. આરોપીની કબૂલાત બાદ પોલીસે અગાઉ નોંધાયેલા ચોરીના ગુનાની તપાસ આગળ વધારી અને સમગ્ર ઘટનાનો ભેદ ઉકેલી નાખ્યો હતો.

પકડાયેલા આરોપીની ઓળખ રાહુલ નગ્ગાલાલ ચંદ્રવંશી (ઉંમર 25 વર્ષ) તરીકે થઈ છે. તે હાલમાં ભુજના આર.ટી.ઓ. સર્કલ નજીક ઝૂંપડપટ્ટીમાં રહેતો હતો, જ્યારે તેનું મૂળ વતન મધ્યપ્રદેશ રાજ્યના મંદસૌર જિલ્લાના સુવાસરા તાલુકાના ગુરાડિયા પ્રતાપ ગામમાં આવેલ છે.

પોલીસે આરોપી પાસેથી ચોરી કરાયેલ એચ.એફ. ડિલક્સ મોટરસાયકલ, જેની અંદાજિત કિંમત રૂપિયા 25 હજાર છે, તે જપ્ત કરી કાયદેસરની કાર્યવાહી હાથ ધરી છે. આ કામગીરી ભુજ શહેર બી ડિવિઝન પોલીસ સ્ટેશનના અધિકારીઓના માર્ગદર્શન હેઠળ સર્વેલન્સ સ્ટાફ, પોલીસ કર્મચારીઓ અને નેત્રમ કમાન્ડ એન્ડ કંટ્રોલ સેન્ટરના કર્મચારીઓના સંયુક્ત પ્રયાસોથી સફળ બની હતી.

આ સફળ કામગીરીથી માત્ર એક જૂનો ચોરીનો ગુનો ઉકેલાયો નથી, પરંતુ વાહનચોરી જેવી ગુનાહિત પ્રવૃત્તિઓ સામે પોલીસની સતર્કતા અને અસરકારક કામગીરી પણ ફરી એકવાર સાબિત થઈ છે.

---------------

હિન્દુસ્થાન સમાચાર / Rohit Ramjibhai Padhiyar