મહેસાણા, 10 જૂન (હિ.સ.)મહેસાણા જિલ્લાના ઊંઝા તાલુકાના ઐઠોર ગામે ‘સ્વચ્છતા સપ્તાહ’ અભિયાન અંતર્ગત તળાવની આજુબાજુ વિશેષ સફાઈ અભિયાનનું આયોજન કરવામાં આવ્યું હતું. ગામના જાહેર સ્થળોને સ્વચ્છ અને સ્વસ્થ રાખવાના હેતુથી યોજાયેલા આ કાર્યક્રમમાં ગ્રામજનો અને સ્થાનિક આગેવાનોએ ઉત્સાહપૂર્વક ભાગ લીધો હતો.
અભિયાન દરમિયાન તળાવની આસપાસ એકત્ર થયેલા કચરાનું નિરાકરણ કરવામાં આવ્યું હતું તેમજ પ્લાસ્ટિક અને અન્ય બિનજરૂરી કચરો દૂર કરીને સમગ્ર વિસ્તારને સ્વચ્છ બનાવવામાં આવ્યો હતો. સાથે જ સ્વચ્છતા જાળવવાના મહત્વ અંગે લોકોને જાગૃત કરવામાં આવ્યા હતા. ગ્રામજનોને જાહેર સ્થળોએ કચરો ન ફેંકવા તેમજ પર્યાવરણની સુરક્ષા માટે સહભાગી બનવા અપીલ કરવામાં આવી હતી.
સ્વચ્છતા અભિયાનથી તળાવ વિસ્તાર વધુ સ્વચ્છ અને સુંદર બન્યો હતો, જેના કારણે ગામના પર્યાવરણ અને સ્વાસ્થ્ય પર પણ સકારાત્મક અસર જોવા મળશે. કાર્યક્રમ દરમિયાન સ્વચ્છતા જાળવવા અને ગામને કચરામુક્ત બનાવવાના સંકલ્પ સાથે સૌએ સહભાગિતા દર્શાવી હતી.
સ્થાનિક તંત્ર અને ગ્રામજનોના સહયોગથી યોજાયેલ આ અભિયાન ગામમાં સ્વચ્છતા અંગે જાગૃતિ ફેલાવવા તેમજ સ્વચ્છ ભારતના સંકલ્પને વધુ મજબૂત બનાવવા માટે મહત્વપૂર્ણ સાબિત થયું હતું.
---------------
હિન્દુસ્થાન સમાચાર / RINKU AMITKUMAR THAKOR
