ભાવનગર, 10 જૂન (હિ.સ.) વડાપ્રધાન નરેન્દ્ર મોદીના નેતૃત્વ હેઠળ કેન્દ્ર સરકારના સફળ 12 વર્ષ પૂર્ણ થવાના અવસરે “12 વર્ષ વિશ્વાસના, વિકાસના અને જનકલ્યાણના” અભિયાન અંતર્ગત મહુવા તાલુકાના વડલી ગામે વિવિધ જનજાગૃતિ કાર્યક્રમોનું આયોજન કરવામાં આવ્યું હતું. આ કાર્યક્રમો દ્વારા ગ્રામજનોમાં સ્વચ્છતા, પર્યાવરણ સંરક્ષણ અને સામાજિક જવાબદારી અંગે જાગૃતિ ફેલાવવાનો પ્રયાસ કરવામાં આવ્યો હતો.

આ અભિયાનના ભાગરૂપે વડલી ગ્રામ પંચાયત ખાતે “પ્લાસ્ટિક મુક્ત ગ્રામ દિવસ”ની ઉજવણી કરવામાં આવી હતી. કાર્યક્રમ દરમિયાન ગામના મુખ્ય માર્ગો, જાહેર સ્થળો અને સામૂહિક વિસ્તારોમાં વિશેષ સ્વચ્છતા અભિયાન હાથ ધરવામાં આવ્યું હતું. ગ્રામજનો, યુવાનો અને સ્થાનિક આગેવાનોના સહયોગથી ગામ વિસ્તારમાં પડેલો પ્લાસ્ટિક કચરો એકત્રિત કરવામાં આવ્યો હતો તેમજ તેના યોગ્ય નિકાલ અંગે લોકોને માર્ગદર્શન આપવામાં આવ્યું હતું.

કાર્યક્રમ દરમિયાન પ્લાસ્ટિકના વધતા ઉપયોગથી પર્યાવરણને થતા નુકસાન અંગે માહિતી આપવામાં આવી હતી. સાથે જ એક વખત ઉપયોગમાં લેવાતા પ્લાસ્ટિકનો ત્યાગ કરી કપડાની થેલીઓ અને પર્યાવરણમૈત્રી વિકલ્પો અપનાવવા ગ્રામજનોને અપીલ કરવામાં આવી હતી. ઉપસ્થિતોએ ગામને સ્વચ્છ, સુંદર અને પ્લાસ્ટિક મુક્ત બનાવવા માટે સંકલ્પ પણ લીધો હતો.

આ પ્રસંગે તાલુકા પંચાયતના સ્વચ્છ ભારત મિશન (SBM)ના ક્લસ્ટર કો-ઓર્ડિનેટર, ગ્રામ પંચાયતના પ્રતિનિધિઓ, સ્થાનિક આગેવાનો તેમજ મોટી સંખ્યામાં ગ્રામજનો ઉપસ્થિત રહ્યા હતા. તમામે મળીને સ્વચ્છતા અને પર્યાવરણ સંરક્ષણનો સંદેશ જનજન સુધી પહોંચાડવા પ્રતિબદ્ધતા વ્યક્ત કરી હતી.

“પ્લાસ્ટિક મુક્ત ગ્રામ દિવસ”ની આ ઉજવણી માત્ર એક કાર્યક્રમ પૂરતી મર્યાદિત ન રહી, પરંતુ ગ્રામજનોમાં સ્વચ્છતા પ્રત્યે જવાબદારી અને પર્યાવરણ પ્રત્યે સંવેદનશીલતા વિકસાવવાનો એક સકારાત્મક પ્રયાસ સાબિત થઈ હતી. વડલી ગામની આ પહેલ અન્ય ગામો માટે પણ પ્રેરણારૂપ બની છે.

હિન્દુસ્થાન સમાચાર / DISHANT NANDRAMBHAI GONADLIYA